Xefe Governu esplika, prosesu atu halo rekrutamentu ba foun FFDTL hamutuk ema na'in atus-neen (600) ne'e, tenke bazeia ba iha orsamentu husi ministériu defeza nian rasik, sé osan laiha, labele ko'alia.
"Ministériu Defeza ho Fosa Armada, sira tenke servisu baze osan ne'ebé sira iha. Osan ne'ebé seidauk iha, sira lalika ko'alia, ne'e tau fali ba tinan oin," PM Taur Matan Ruak, ko'alia iha Palásiu Prezidensiál, Bairru-Pité, kinta (04/02).
Nia dehan, governu halo servisu bazeia ba planu ne'ebé planeia ona, tanba planu ne'ebé governu atu halo iha tempu agora, ninia orsamentu tau tiha ona iha tinan kotuk, planu ne'ebé halo ba tinan 2022, ninia orsamentu sei tau ba 2021 nian.
"Ne'ebé kada tinan ita halo de'it buat ne'ebé ita planeia no ita osan iha ona. Ida be ita seidauk planeia, osan laiha, ne'e ita lalika ko'alia", dehan nian.
Maske nune'e, PM Taur dehan, ba tinan ida ne'e sei halo duni rekrutamentu ba membru foun tanba bazeia ba orsamentu ne'ebé MD iha.(*)