Nia ko'alia ne'e tanba nia simu informasaun balun husi Hospital Nacional Guido Valadares (HNGV) katak, to'o agora pesoál saude inklui doutór sira ninia salariu over time governu seidauk selu.

"Dala-ida tán ha'u hakarak atu ko'alia, señora ministra da saude la'os sai ministra ba COVID-19 nian de'it, ministra ministériu tomak, entaun asuntu saúde sira-ne'ebe maka iha presiza tenke tau atensaun ba hotu-hotu," dehan nia iha Parlamentu Nasionál, tersa (9/2).

Nia preokupa, tanba iha ministeriu seluk funsionáriu ne'ebé servisu over time simu hotu ona maibé enfermeiru, doutór sira ka médiku jerál sira to'o agora governu la fó sira-nia over time.

"Sira sente hanesan diskriminativu iha HNGV, sasán sira-ne'e presiza ministra tenke hatene," nia lamenta.

Nia haktuir, la'ós ida-ne'e de'it mak akontese, maibé iha mós problema seluk kona-ba ai-moruk iha Dili laran tanba ai-noruk laiha.

Hatán ba kestaun ne'e, Ministru ba Asuntu Parlamentár no Komunikasaun Sosiál (MAPKOMS) Francisco Jerónimo, lori governu nia naran agradese wain ba deputadu sira-nia krítika no ejizénsia.

"Ami hakarak agradese ba deputadu sira hotu nia krítika, no foti problema ne'ebé relasiona ho povu ninia nesesidade, ami hanesan reprezentante governu nian, ami rejista orsida ami haruka kedas ba ministru sira-ne'ebé tutela ba área sira-ne'e," dehan nia.(*)