Xefe bankada Fretilin, Francisco Miranda Branco hatete, nia parte sente triste, wainhira líder Karismátiku Xanana Gusmão ne’ebé halo deklarasaun katak Covid-19 hanesan politika de'it.

"Ema Balun mak halo rezisténsia hasoru desizaun estadu nian, hodi dehan covid-19 ne'e politika de'it, liután kuandu deklarasaun sira hanesan ne'e sai husi líder boot nasaun nian, eis prezidente republika, eis primeiru ministru balun, ha’u sita senhor Xanana Gusmão nian deklarasaun”, dehan Branco iha plenária PN, segunda (22/03).

Hanesan deputadu presiza kurize situasaun sira hanesan ne'e, tanba sidadaun hotu hatene katak estadu Timor-Leste nu’udar Tepublika Demokrátika, ne’ebé hari’i ho ema rihun-atus-rua nia isin no rán.

"Orgaun soberani estadu ida ne'e deside dekretea estadu emerjénsia ida ne'e, ita presiza hakruk ba ida ne'e, laiha esensaun, estadu ne'e la'ós ema ida nian”, afirma nia.

Maibé, deputadu bankada CNRT, Marcos Xavier, sadik governu bainhira brani halo kapturasaun Xanana Gusmãoiha nia rezidénsia, hodi halo investigasaun.

Tanba ne’e husu ba deputadu sira atu labele halo deklarasaun politik iha Parlamentu Nasionál, maibé halo asaun hodi kaer líder nasionál ne’e.

"Husi bankada Fretilin hatete katak, iha líder nasionál balun katak Covid ne'e, Covid boatu, ha’u hanoin ita-boot sira ko’alia refere ba maun boot Xanana, nia loroloron la'o hela iha Díli laran, sé agora governu imi mak kaer, tanba saida imi laiha kbiit, imi bele tesik ba iha ninia rezidénsia iha Lecidere bele kaer kedan iha ne'eba, hodi investiga took, tanba saida maun boot Xanana hasai ninia deklarasaun ida hanesan ne'e, lalika ita mai iha PN mai hatete hanesan ne'e, no fim ita-boot sira mós la brani”, deklara nia.(*)