Iha komemorasaun tinan ida ne'e, timoroan hotu rekoñese, Pandemia Covid -19, ne'ebé sa'e maka'as iha TL no kalaminidade, loron 4 fulan Abril hatudu ita nia Nasaun iha situasaun difisil nia laran.
"Ita hotu mós rekoñese, propagasaun Covid-19, reduz atividade ekonómika kauza ba problema oioin iha moris família no traballadór Timoroan sira-nian”, dehan Ministru Asuntu Parlamentár no Komunikasaun Sosial (MAPKOMS), Francisco Jerónimo Martins da Costa Pereira iha nia kna'ar fatin, Palásiu governu Dili, tersa (18/05).
Pandemia Globál mós ameasa ba kapasidade ekonómika empreza timoroan sira, tanba kauza husi dezastre naturál ne'ebé mosu iha loron 4 fulan-abril tinan 2021, ne'ebé halakon ema nia vida no harahun infraestrutura fizika públika no privadu nian, inklui estrada, ponte no instalasaun sira ne'ebé prepara atu fó resposta ba kombate pandemia covid-19 sai difísil liután.
“Ho problema sira ne'ebé ita-nia nasaun hasoru, ita-nia Estadu no Governu mós foti ona medida sira ho imediata hodi fó resposta ba estabiliza ekonomia, proteje saúde povu nian no konstroe fali ita-nia infraestrutura sira”, hateten nia.
Tanba ne'e, ho espiritu Restaurasaun Independénsia nian, nia husu timoroan hotu tau forsa hamutuk hodi bele hakat liu difikuldade sira ne'ebé TL hasoru dadaun ne'e.
“Parabéns Povu Timor-Leste ba Komemorasaun 20 de Maio tinan 2021”. (*)