Vise Prezidente Parlamentu Nasionál (PPN), deputada Maria Angelina Sarmento hatete, estadu oferese arma (pistola) no formasaun oioin ba membru sira atu asegura interese estadu, maibé la'ós uza ba proteze família uma laran.

"Estadu fornesa sira formasaun e arma sira ne’ebé mak sira kaer iha liman, la'os sira lori ba uma atu rezolve sira-nia problema privadu ka família”, dehan nia iha PN, segunda (07/06).

Tanba, haree akontesimentu membru PNTL ne’ebé komete kazu omesidu ida ne'e, intoleravel no la'os foin primeira ves, maibé akontese ona.

" Krime omesidu oho ema iha fatin ne’ebé mak sira uza farda e uza armas atu rezolve sira-nia problema privadu ne'e intoleravel”, dehan nia.

Iha fatin hanesan Deputadu FRETILIN, Joaquin Dos Santos hatete, hakarak ka lakoi kazu ne'e tenke prosesa tuir lei.

"Nia hatene katak, lei bandu no hakarak halo ne'e krime, tenke prosesu tuir lei, fora husi nia atu iha problema psikolojiku, ka nia ema normal ka mais ninia atu ne'e viola ona be lei e tenke lori ba prosesu iha tribunal”, dehan nia.

Husu ba instituisaun PNTL atu aprende ho situasaun sira hanesan ne'e atu hadi'a jestaun servisu organizasaun ninian, karik lei balun la fó marjen atu rezolve problema, entaun halo proposta ba lejislador sira atubele hadi’ak, tanba ida ne'e funsaun estadu nian.

Nune’e, Deputadu Partidu Demokrátiku (PD), Mariano "Asanami" Sabino, konsidera agora tempu ona atu estadu tau atensaun ba PNTL liliu hadi’a estatutu atu bele la'o los.

"Ita haree katak membru polísia iha fatin barak, iha postu sira ne'e la dun di’ak la dun tau atensaun, tanba ne'e mak ha’u ne'e momentu para tenke hadi’a, polísia ne'e ho didi’ak, fó pezu ba komandante sira, estatutu Polísia tenke la'o los”, afirma nia. (*)