Ministru Asuntu Parlamentar no Komunikasaun Sosial (MAPKomS), Francisco Martins Jerónimo, rekoñese eletrisidade iha laran iha suku hitunolu (70) resin mak seidauk utiliza prepagu maibé sei uza konvensional, tanba ne'e iha tinan 2021 suku 32 mak tama uluk iha faze eletrisifikasaun.
“Ko'alia kona-ba eletrisidade iha Timor laran tomak, ida ne'e ami rekoñese katak barak mak seidauk iha prepagu, Prepagu iha de'it nivel Munisípiu no postu maibé ba liu suku sira ne'e prepagu laiha no sei uza mak konvensional tanba ne'e iha tinan 2021 suku 32 mak tama uluk iha faze eletrisifikasaun, no sira seluk ne'e sei halo iha tinan 2022”, dehan Ministru Francisco iha Palásiu Governu, tersa (08/06).
Iha tinan 2021 suku 32 mak sei eletrisifikasaun uluk no konkursu públiku loke ona, no hein de'it kontratór sira ne'ebé mak konkore no ida ne'ebé mak manán sira mak sei ba halo montazen ka dada eletrisidade iha fatin sira ne'ebé mak identifika ona.
“Ida ne'e servisu ida ne'ebé mak EDTL,ep tenke haree no reorganiza, atu nune'e hothotu bele muda ba prepagu, atu hetan reseita tanba prepagu iha fatifatin barak mak tinan haat ou lima ona seidauk iha prepagu no sei gratutuita, entaun sira seidauk kontribui ka selu ba estadu”, afirma nia. (*)