Tempotimor (Maubara) – Prezidente Repúblika (PR), Francisco Guterres Lú Olo, Sesta (09/08/19) presta omenajem ikus ba saudozu José Cirilio Nunes "Maubrani" iha saudozu nia knua, Maubara, Likisa.

 

"Lakon saudozu José Cirilio Nunes “Maubrani” halo família hahú moris ho laran-susar no mata-been. Povu Timor-Leste mós lakon oan murak ida. Ha’u sente triste hanesan mós oan sira no família rasik sente. Maibé sentimentu ida ne’e kahor mós ho orgullu boot teb-tebes tanba saudozu Maubrani deside fó an tomak ho brani ba ita nia kauza nasionál "Ukun Rasik An," espresa PR Francisco Guterres Lú Olo.

 

Tuir PR Lú Olo, hafoin TL hetan liberdade espresaun iha 1974, saudozu Maubrani fó an kedas ba kauza nasionál TL. "Hafoin ita hetan liberdade espresaun iha tinan 1974,  saudozu Maubrani fó an kedas ba kauza nasionál ne’e liuhosi ASDT/ FRETILIN. Saudozu prova ninia dedikasaun ba kauza ne’e ho hahalok barak, liuliu iha komponente armada. Ho ninia kapasidade no matenek rasik, saudozu ne’e partisipa iha ita nia rezisténsia organizada nu’udar Komandante setór sentru Leste no Komandante Brigada de Choque," tenik Lú Olo

 

PR Lú Olo konta istória katak, komandante sira iha funu laran sempre hafanun malu ho lian brani katak "Ha'u Sei La Rende, Kilat Musan Ikus Liu Ha'u Nian".

 

Xefe estadu akresenta, iha 28 Novembru 2006 estadu TL kondekora saudozu Maubrani nu'udar kombatente ne'ebé harii Movimentu Libertasaun Nasionál.

 

"Iha 28 Novembru 2006, estadu Timor-Leste kondekora Saudozu Maubrani nu’udar kombatente ne’ebé harii ka funda Movimentu Libertasaun Nasionál. Hamutuk ho família, estadu Timor-Leste sei haloot saudozu ninia restus mortais iha Jardim dos Heróis da Pátria, iha Metinaro, fatin ne’ebé fó hanoin ita nia pasadu eróiku no hamanas ita nia laran atu haree ba futuru ho fiar metin katak ita sei manán luta hasoru kiak, mehi erói hotu-hotu nian," PR dehan.