“Kandidatu FRETILIN nian ida de'it, laiha rua, kandidatu FRETILIN nian mak Francisco Guterres 'Lú Olo'. Ha'u lakoi rona ema dehan, la’e, ha'u konsiénsia atu vota ba ema seluk, liliu kamarada feto sira tenke fó ezemplu ba ida ne'e, laiha kandidatu rua iha FRETILIN, bele ema FRETILIN rua ka tolu, mais kandidatu FRETINLIN nian ida de'it”, dehan Alkatiri iha konferénsia nasionál OPMT-Fretilin ba dala-4 ho tema “OPMT Rejilente! Hori Uluk, Ohin loron no Aban Bainrua, iha salaun Katedral Bebora, sesta (11/02).

Deklarasaun ne’ebé líder Partidu Istóriku fó sai ba públiku tanba konsidera loron importate no oportunidade ida di'ak iha konferénsia nasionál.

“Ha'u ko'alia ida ne'e, tanba komesa halo konfuzaun iha povu nia leet, uluk kedas ha'u dehan, ita-boot sira ke mai husi foho ne'e tenke tuur hamutuk e hetan opiniaun ida fó mai ha'u, e mós ha'u dehan kedas bainhira ha'u ko'alia hanesan ne'e, sei laiha entedementu entre sira, ha'u hanesan Sekretáriu Jerál FRETILIN ha'u asume responsabilidade intitusionál e estrututara”, hatete nia.

Bainhira Prezidente Partidu iha atu kandidata, iha institutu dehan laiha ema seluk atu kandidata, atu nunene'e institutu haree. Maibé importante liu atu tetu didia'ak konflitu jerasionál bainhira atu foti ema ba sai líder.

“Konflitu jerasionál la'ós idade, jerasaun polítiku, polítiku bele lori valór aprezentadu atu dudu organizasaun ba oin, la'ós ha'u la sa'e ohin, entaun ha'u katuas ona, ha'u ferik ona, la'ós ba ha'u 50 ona, la hetan tan tinan 5, ha'u halo saida tan, la’e, importante ba organizasaun é transformasaun mentalidade e inkapasidade organizativa atu supera difikuldade ho obstaklu, katuas ka ferik, labarik feto ka labarik mane la'ós problema”, afirma Alkatiri.

Tanba ne'e, eleisaun Prezidentesiál, Prezidente Francisco Guterres ‘Lú Olo’, hatudu ona tinan lima nia laran, saida mak nia hakarak atu halo hodi hametein Estadu direitu, atu hametin nasaun iha Timor-Leste.

“Ita tenke aproveta oportunidade ida ne'e, atu ita hotu atu halo organizasaun masa, organizasaun sira seluk tan, tur hamutuk servisu hamutuk para tun ba povu, mobiliza povu, la'ós povu hothotu FRETILIN, atu mobiliza povu tomak atu proteze interese povu tomak nian”, dehan nia. (*)