Tanba ne’e, Sekretáriu Jerál Partidu FRETILIN, Marí Bin Amude Alkatiri, hein hela karta formal husi Lere Anan Timur atubele loke inskrisaun ho tipu espesiál hodi bele produz kartaun militante refere.
“Tuir regra ami taka tiha ona inskrisaun, so ha'u sekretáriu jerál de'it mak bele loke filafali ba isu espesiál, ba ida ne'e ha'u-nia Jenerál Lere tenke hakerek uluk mai ha'u, la hakerek ha'u la bele loke, ha'u sekretáriu jerál servisu formal”, deklara Alkatiri hafoin partisipa iha Konferénsia Nasionál Organizasaun Mulher Popular Timor-FRETILIN iha salaun Katedral Bebora, sesta (11/01).
Nune’e, Alkatri hein to’o agora seidauk iha karta karta ofisiál husi Lere Anan Timur, atubele autoriza ekipa iha Komité Sentrál Fretilin (CCF) loke inkrisaun.
Iha loron 01 fulan-fevereiru 2021, tuku 6:00 oras timor-leste (otl) Eis Xefe Estadu-Maiór Jenerál Falintil-Forsa Defeza Timor-Leste, Tenente Jenerál Reformadu Lere Anan Timur, ho nia ekipa ba simu kartaun militante iha CCF, Komoro Dili, maibé la konsege tanba inkrisaun ba kartaun militante konsege taka.
Haree ba situasaun ne’e, kandidatu Independente Prezidente Repúblika períodu 2022-2027, Lere Anan Timur, seidauk iha kartaun militante FRETILIN nian.
Maske Lere hanesan segundu jerasaun ne’ebé sai Membru CCF iha tinan 1981, liuhusi primeiru konferénsia Nasionál Maubai, iha rejiaun Vikeké, ne’ebé Lere Anan Timur eleitu sai membru Komité Sentrál FRETILIN no assume kargu hanesan Komisáriu Polítiku no responsável polítiku prinsipál Rejiaun Funu Sei Nafatin. (*)