Komandante Polísia Munisípiu Dili, Superintendente Xefe Henrique da Costa informa, atividade operasaun pasa revista kalan-kalan kontinua la'o, hodi bele halo prevensaun ba asidente tráfiku, no krime seluk.
“Passa revista iha kapitál Díli ba hodikalan (05/03), iha tuku 08-10:00, ita-nia PNTL konsege prende motorizada hamutuk 55, tanba dokumentu sira la kompletu no laiha”, dehan Komadante Henrique, liuhusi WhatsApp, domingu (06/03).
Operasaun hirak ne'e hala'o husi eskuadra Kristu Rei, Nain Feto, Vera Kruz no forsa rezerva inklui apoiu mós husi Unidade Polísia Maritima (UPM).
Nune'e evidénsia hirak ne'e, tránzitu munisípiu Dili mak pasa bilete ba infratór sira hodi ba selu iha banku no oinsá mak sira bele mai foti fali evidénsia hirak ne'e, responsável iha ona tránzitu sira. (*)