Xefe Departamentu Relasaun Públiku Komandu Jerál PNTL, Superintendente Xefe Armando Monteiro hatete, krime eleitorál akontese durante kampaña loron 04 to’o 06 iha Munisípiu Baukau, Vikeke no Manufahi, Polísia loke ona prosesu invetigasaun.

Durante iha kampaña krime eleitorál ne'ebé akontese iha Munisípiu Baukau, Manufahi, no Vikeke envolve militante partidu politiku sira asaltu tuda malu hodi rezulta sidadaun sira-nia sasán hetan estragu, no ema na’in-16 sai vítima.

Nune’e iha Munisípiu Vikeke bainhira apoiante no simpatizante sira remata kampaña fila ba ida-idak nian rezidénsia, mak halo agresaun fizika hasoru malu iha suku Makadiki, Postu Administrativu Uatulari, Munisípiu Vikeke.

Aliende ne'e mós akontese iha Postu Administrativu Venilale, Kelikai, no Baukau Villa hodi rezulta estragu uma no sidadaun balun sai vítima, tanba hetan tuda.

“Ita husu ba ekipa susesu kandidatura prezidente repúblika na’in-16 atu kolabora nafatin, ho autoridade seguransa para hamutuk hodi kontrola unidade, amizade, promove kultura, no haburas demokrasia iha Timor-Leste, atu nune’e akontesimentu ne'ebé mak akontese iha Manufahi, Vikeke no Baukau labele akontese iha loron tuir mai iha munisípiu sira seluk”, dehan Armando, iha Kuartel Jerál PNTL, Kaikoli, Dili (07/03).

Tanba ne’e, PNTL mós husu ba públiku atu hakmatek labele rona boatus, maibé nafatin kontribui ba prosesu kampaña to’o iha eleisaun prezidensiál.

Krime eleitorál ninian prosesuál, tenke iha koordenasaun ho komunikasaun di'ak entre orgaun Komisaun Nasionál ba Eleisaun sira (CNE) ho PNTL, nune'e hamutuk evita krime eleitorál ne'ebé akontese iha Vikeke, Baukau, no Manufahi.

“Agora dadauk PNTL halo ona identifikasaun ba ita-nian autór sira ne'ebé mak deskonfia iha kazu ida ne'ebé akontese iha Baukau Villa, Postu Administrativu Venilale no Kelikai sei iha prosesu identifikasaun nia laran, tanba ne’e ita hein atualiza relatóriu iha loron tuir mai”, afirma nia.

Enkuantu, iha Munisípiu Vikeke prosesu la'o ona, polísia detein ona ema na’in-tolu no loke ona prosesu ba investigasun sira, tanba deskonfia sira mak komete iha krime eleitorál.

“Krime eleitorál iha Vikeke iha detein ona ema na’in-tolu atu halo invetigasaun hodi prosesu tuir dalan legál”, dehan nia.

Enkuantu krime eleitorál ne'ebé sidadaun na’in-rua halo impedementu ba militante partidu CNRT iha Postu administrativu Holarua, Munisípiu Manufahi dadaun ne'e PNTL ho CNE sei komunika malu ona hodi haree kestaun refere.

“Agora dadauk ita-nia PNTL iha terenu hamutuk ho CNE, atu halo koordenasaun oinsá haree asuntu ne'ebé sai viral los iha mídia sosiál, foin mak ita bele hatene nia prosesu akontesimentu”, afirma nia.

Tanba ne’e, proseu ba kazu krime eleitorál sira ne’e akontese iha Munisípiu tolu, dadaun ne’e ekipa PNTL ho CNE sei koordena ho ekipa susesu ba kandidatu sira hodi loke investigasaun kona-ba asaltu tuda malu no halo impedementu atividade kampaña nia.

“Ita labele halo hanesan aisasik de’it, tanba ne’e ita-nia ekipa sira iha terenu hamutuk ho CNE ho ekipa susesu husi ita-nia kandidatura loke prosesu investigasaun mak ita bele hatene, tanba sitasuan jerál iha munisípiu sira seluk la’o di’ak no kontroladu”, dehan nia. (*)