“Kazu Elemloi sei iha prosesu hela. Parte intelejénsia, sei kontinua nafatin kolekta informsaun, tantu mós iha lokál krime husi komunidade ne’ebé mak hela iha área ne’eba, atubele kolabora no fó informsaun lolos, hodi nune’e ita bele identifika lalais autór ne’ebé deskonfia halakon ita-nian sidadaun Antonio de Jesus nia vida”, dehan Komandate Armando Monteiro, iha Kuartel Jerál PNTL, Kaikoli, segunda (07/03).
Ba kazu ne’e rasik, maske fulan-ida ona, maibé PNTL seidauk ema ida hanesan suspeitu prinsipál, tanba ne’e sei kontinua prosesu investigasaun.
“Ita seidauk detein suspeitu prinsipal ba kazu ne’e, ita sei kontinua hela buka tuir autór ne’ebé mak halo ita-nia sidadaun nia vida lakon iha Elemloi”, afirma nia.
Ba kazu refere antes ne’e PNTL halo ona identifikasaun ba ema na’in-11, hodi dezenvolve hanesan informasaun hodi buka tan informasaun balun kompleta atubele identifika lalais autór prinsipál.
Enkuantu kona-ba kazu Bebonuk, ne’ebé deskonfia Levi Gomes oho-aan iha Fahi Luhan iha loron 8 fulan-fevereiru, iha ona prosesu nia laran, maibé seidauk bele fó sai, tanba tribunál mak bele deklara.
“Ha’u hanoin kazu rua ida Elemloi no Bebonuk ne’e hanesan iha ona prosesu nia laran. Rezultadu otopsia ba ema na’in-rua ne’e, ida ne’e segredu husi prosesu ninian. So iha tribunál mak bele hatene no lee sai kona-ba rezultadu ida ne’e. PNTL so kompleta dokumentu ba prosesuál de’it”, esplika nia. (*)