“Sim, liga ho konfrontu ne'ebé akontese, PNTL tarde atu halo atuasaun, lolos ne'e iha komboiu sira hanesan ne'e, PNTL akompaña, tanba ho masa barak, maibé durante ne'e ita haree PNTL tarde atu halo atuasaun entaun ida ne'e mós provoka problema mosu iha tempu kampaña”, dehan Sancho iha kna’ar fatin, Bairu Sentrál, kinta (10/03).

Tanba haree ba kazu sira ne'ebé akontese iha Munisípiu Baukau no Vikeké, hafoin problema akontese ona mak PNTL foin halo atuasaun

“Ha'u hanoin, importante liliu iha situasaun sira hanesan ne'e, PNTL haree ona lisaun sira ne'ebé akontese ona ne'e, tanba ita espera iha komisu ne'ebé sei halo mai ne'e, posibilidade sei iha problema, tanba lisaun ida rua ne'ebé hatudu ona iha fatin balun, ha'u hanoin PNTL tenke aprende ona lisaun ida ne'e, oinsá atu halo vizilánsia hodi akompaña komboiu ne'e ba fatin ida ba fatin seluk, no hatene ona oinsá atu evita, konfrontu sira iha dalan ne'e”, hatete nia.

Durante FM halo observasaun iha iregularidade barak ne'ebé mak mosu, liga ho lei kampaña eleitorál ninia, nune'e mós liga ho kódigu estrada, inklui lei Arte Marsiál nia.

“Ita haree, iha kampaña balun, sira utiliza simbolu Arte Marsiál, iha kandidatu balun ne'ebé aprezenta Arte Marsiál, tuir lolos iha lei númeru 5 ne'e bandu partidu polítiku sira labele utiliza Arte Marsiál ne'e ba sira nia interese, e iha Arte Marsiál balun mós uza atributu ba kampaña, aleinde ne'e, iha ema balun halo komboiu ne'e mós la uza kapasete, depois balun tur karreta nia leten ba, tanba masa barak liu, e PNTL rasik la Konsege kontrola ida ne'e, ha'u hanoin ida ne'e iregularidade ida ne'ebé ita rejistu, iha tempu kampaña ne'e”, deklara nia. (*)