Komandante Polísia Tránzitu Munisípiu Dili, Inspetór Domingos Sarmento Gama hatete, dadus asidente Trafégu ne’ebé akontese iha semana kotuk sidadaun na’in-rua lakon vida.
Ba asidente Trafégu ne’ebé akontese iha área Bekora iha loron 12 marsu tuku 07:50 kalan motorista ho inisiál AAS idade 24 konduz motorizada Honda Beat Street ho sapa matrikula M. 6022 halai ho velosidade maka’as lakontrola ema la’o ain hakat hela estrada mak soke vítima Manuel de Andrade Mendonça idade 36, hafoin lori ba ospitál lakonsege salva vítima nia vida.
Alende iha loron 13 marsu tuku 08:00 kalan akontese mós asidente trafégu ida iha Hera Bundaran suspeitu ho inisial BM idade 21 kondisaun lanu konduz karreta truck ho sapa matrikula A.51-101 TL, halai ho velosidade maka’as lakon kontrola hodi halai tama dalan motorizada nian hodi hamosu asidente soke vítima Germano Sarmento idade 36 ne’ebé konduz motorizada Yamaha Vixion sapa matrikula L. 3518 TL rezulta ain tohar.
“Husi asidente trafégu vitima na’in-rua halo evakuasuan ba Ospitál Nasionál Guidu Valadares atu hetan tratamentu intensive, maibeé médiku sira la konsege salva sira-nia vida”, dehan Inspetór Domingos Sarmento Gama, iha Komandu Munisípiu Dili, Kaikoli, kuarta (23/03)
Husi asidente trafégu rua ne’e suspeitu na’in-rua koopera ho família vítima hodi rezlove kona-ba prosesu funebre nia, maibé kona-ba prosesu lei parte polísia investigasaun konklui hodi submete ba Ministériu Públiku mak bele foti desizaun.
“Kazu asidente rua ne’e ita-nia investigasuan konlui ona, suspeitu sira oras ne'e iha ona prosesu laran hein submete ba ministériu públiku hodi hein rezultadu finál”, informa nia.
Antes ne’e, iha períodu Kampaña eleitorál to’o elisaun prezidensiál Polísia Nasionál Timor-Leste(PNTL) rejista kazu asidente trafégu iha teritóriu Timor laran hamutuk 50 no mate na’in-tolu.
Asidente Tragfégu ne’e akontese kauza husi motorizada ho karreta soke malu, tanba lakon kontrolu husi sidadaun sira iha estrada públiku, bainhira konduz transporte, tanba ne’e ikus mai akontese asidente hodi rejulta vítima hamutuk 50, na’in-tou lakon vida. (*)
