Ba kontrusaun postu polísia sira iha Munisípiu Dili durante ne’e hakarak atu apoiu Estadu hodi fasilita seguransa ne’ebé di’ak ba komunidade, tanba laiha intensaun aat ba Estadu no PNTL, maibé hanesan timoroan buat ne’ebé bele ajuda Estadu hodi hadi’a fasilidade ba PNTL ho dignu.
“Ha’u halo fasilidade hamutuk 15, tanba ne’e postu polísia 14 iha Munisípiu Dili no ida iha fatin treinu karega tiru iha Kaitehu-Likisá, kompleta ho fasilidade hanesan AC, jeleira no haris fatin, tanba ne’e difísil ba ema atu tuda rahun fali”, dehan Mahoka, hafoin partisipa komemorasaun aniversáriu PNTL ba dala-22, iha Sentru Formasaun Polísia, Komoro, domingu (27/03).
Tanba ne’e hanesan sidadaun timoroan hadi'a postu polísia tránzitu iha Munisípiu Dili 15 inklui ida iha Kaitehu ida ne’e laiha intensaun ruma ba Estadu hodi fó apresiasaun ho sertifikadu ida hanesan ne’e, maibé hakarak atu fasilita PNTL ho fatin servisu ne’ebé dignu.
Ba kualidade postu polísia tránzitu ida uluk Governu halo ona kompara ho ida agora ida ne’e públiku mak bele hatene nia kualidade, maibé ida agora kompletu ho fasilidade ba polísia uza durante 24 oras.
“Diferente postu polísia ne’ebé uluk Governu halo ho ida agora ne’e ha’u labele hateten di’ak liu, maibé públiku sira mak bele hatene, tanba ha’u so hatene halo de’it ida ne’e di’ak liu imi mak hatene”, afirma nia.
Tanba ne’e, postu polísia sira uluk Governu gasta osan halo, sidadaun sira tuda rahun hotu, maibé ida agora emprezáriu timoroan apoiu ne’e difísil ema atu tuda rahun.
“Ha’u sente postu polísia sira ne’e ema atu tuda rahun fali hanesan uluk ne’e labele, tanba ha’u halo di’ak no kaulidade vidru sira kompleta ho rede atu asegura no ha’u rasik garante ita-nia polísia sira uza halo servisu durante oras 24, tanba kalan ha’u liu ba mai iha postu polísia sira ne’e ha’u haree polísia sira iha ne’eba servisu permanente”, dehan nia.
Antes ne’e iha loron 13 otubru 2021, Primeiru Ministru no Ministru Interiór, Taur Matan Ruak, akompaña husi komandante Jerál Polísia Nasionál Timor-Leste (PNTL), Komisáriu Faustino da Costa, ofisiálmente inaugura ona postu polísia tránzitu ne’ebé konstrui husi emprezáriu timoroan, Salvadór Henrique ‘Mauhoka’ iha Bairopite.
Iha diskursu PM Taur Matan Ruak, apresia no orgullu ba emprezáriu ‘Mauhoka’ tanba hatudu sentimentu solidaridade hodi konstrui postu polísia tránzitu ho kualidade.
“Ohin, ita iha infraestrutura di’ak oferta husi emprezáriu Timoroan ida no veteranu oan-ida, ha’u husu ba Komandante atu okupa postu ne’e durante oras 24 no husu Vise Ministru atu tau-matan loroloron no kuidadu didi’ak”, dehan Taur. (*)