Deputadu Partidu Demokrátiku (PD), Mariano ‘Asanami’ Sabino hatete, Governu presiza aselera estatutu PNTL, tanba ne’e tenke fó apoiu hodi hala’o servisu ho profesionál liután.
“Hakarak hato'o parabéns maske tarde oituan ona, hato'o parabéns nafatin ba PNTL e husu ba Governu atu aselera estatutu PNTL nian ne'e, hanoin ita tenke fó apoiu tomak ba PNTL para halo ninia servisu profesionál ho di'ak e mós tau atensaun ba polísia iha fronteira, liliu sira ne'ebé iha fronteira Oekussi nian ne'e”, dehan Asanami iha Parlamentu Nasionál, tersa (29/03).
Tanba ne'e husu mós ba Governu atu apoiu polísia ne'ebé desloka ba fronterlira Oekussi uluk kondisaun ne'e at tebes bainhira mantein nafatin ho situasaun ne'e.
Deputadu partidu KHUNTO, Luis Roberto hatete, estatutu PNTL mak sai matadalan ba polísia sira hadi’a sira-nia servisu maibé to'o agora estutu seiduak iha.
“Ha'u ko'alia kona-ba ezisténsia ita-nia PNTL iha Timor-Leste ne'e komesa 2002, to'o 2022 halo ba tinan 22 aniversáriu sira-nia, maibé los duni hanesan deputadu Asanami foin ko'alia ate a data sira seidauk iha estatutu PNTL nian seidauk iha, tanba estatutu ne'e mak sai matadalan ida ba ita-nia PNTL sira para bele hadi’a sira-nia servisu”, haktuir nia.
Tanba ne'e, husu ba Sekretáriu Estadu Komunikasaun Sosiál atu hato'o informasaun ne'e ba Prezidente Konsellu Ministru hodi bele aselera estatutu PNTL nian.
“Ida ne'e mak señor Sekretáriu Estadu mak ne'e halo hansa para bele enkamiña informasaun ne'e ba Prezidente Konsellu Mimistru halo nusa para bele aselera lalais estatutu PNTL nian”, haktenik nia. (*)