“Ida ne'e, ita iha ona enkontru ida ho parte DNTT, ami konkorda ona, Ministériu rua hanesan Ministériu Transporte no Komunikasaun, no Ministériu Interior hodi bele halo alterasaun ba despaixu konjuntu ida uluk nian, ita autoriza fali karreta kontentór sira ne’e bele sirkula iha tempu kalan”, dehan Komandante Tránzitu Munisipiu Dili, Inspetór Domingos Sarmento Gama bainhira halo sensibilizasaun sinál tránzitu iha Rotunda Prezidente Nicolau Lobato, Komoro, tersa (29/03).

Nia dehan, informasaun husi Diretór Jeral Transporte no Telekomunikasaun katak sei adianta lei ne'e atu autoriza karreta tula kontentór sira sirkula iha tempu kalan.

“Agora ita seidauk bele implementa, tanba sei iha prosesu diskusaun, bainhira Governu aseita ona mak ita bele divulga informasaun ba ita-nian komunidade sira kona-ba sirkulasun karreta kontentór iha kapitál Dili”, informa Domingos.

Antes ne’e Diretór Jerál Ministériu Transporte no Komunikasaun, Gaspar de Araújo hatete, hahú 01 fevereiru tinan kotuk 2021, karreta sira ne’ebé tula kontentór hodi halo sirkulasaun Dili sei halo operasaun tuir oráriu.

“Atu hamenus engrafamentu iha estrada Dili laran, Governu liuhusi Ministériu Transporte no Komunikasaun (MTK), Ministériu Interiór (MI) ho entidade sira seluk hanesan Autoridade Portuarias de Timor-Leste (APORTIL) no Polísia Nasionál Timor-Leste, iha 05 janeiru liuba, hasai ona despaisu ba karreta tula kontentór sira”, esplika nia.

Tuir oráriu ne’ebé mak iha, husi dader tuku 07:00 to’o 09:00 labele la’o, iha meudia 12:00 to’o 14:00 labele la’o no parte lorokraik tuku 17:00 to’o 21:00 kalan.

“Ami husu ba ami-nia parseriu sira atubele kumpri despaisu ida ne’e, tanba despaisu sai ho sansaun, se la kumpri ka la obedese ba despaisu ne’e sei hetan sansaun, bazeia ba artigu 10 Kódigu Estrada, infrasaun másimu $75”, informa nia.

Komandante Tránzitu Nasionál, Superintendente Xefe João Belo hatete, parte polísia tránzitu sei ezekuta despaisu refere ho rigorozu.

“Bazeia ba despaisu konjuntu ne’ebé mak iha ona, parte polísia tránzitu sei implementa ida-ne’e ho rigorozu”, dehan nia.

Tuir observasau www.tempotimor.com iha tereinu nota katak, transporte Públiku tula sai kontentór iha portu Dili maioria la kumpri oráriu sikulasaun ne’ebé mak parte DNTT ho Polísia tránzitu antes ne’e hasai ona iha tinan kotuk hodi hamosu engrafamentu iha kapitál Dili. (*)