“Kampaña eleisaun prezidensiál iha dia 2 abril to’o mai ohin loron ne’e, ami seidauk rejista insidente ka asidente ruma durante kampaña eleisaun prezidensiál segunda ronde”, dehan Superintendente Xefe Armando Monteiro iha Kuartel Jerál PNTL, Kaikoli, sesta (08/04).

Iha kazu insidente balun ne’ebé akontese iha terminál Baukau, maibé ida ne’e laiha ligasaun ho atividade kampaña nian. Tanba kazu ne’e rasik kona-ba greve ne’ebé halo husi motorista sira ba folin mina ne’ebé sa’e.

“Mosu dezentendimentu entre motorista sira iha terminal Baukau, iha ne’ebé motorista asaltu malu, halo estragu ba karreta balun no ita-nia Komandu PNTL Munisípiu Baukau rasik, halo identifikasaun maluk sira no suspeita ema na’in-ualu ba kazu ne’e”, esplika nia.

Kestaun ne’e laiha problema tanba Komandu PNTL Munisípiu Baukau halo ona intervensaun no suspeitu hirak ne’e identifikadu ona hodi halo prosesu.

Maibé husu nafatin ba ekipa susesu kandidatu Prezidente Repúblika, entidade orgaun eleitorál hotu, atu koopera nafatin ho parte PNTL, hodi asegura nafatin situasaun la’o di’ak.

“Husu ba ekipa susesu kandidatu Prezidente Repúblika na’in-rua, hamutuk STAE no CNE kolabora ho PNTL nafatin, hodi fó susesu ba prosesu kampaña eleitorál, nune’e bele la’o ambitu hakmatek”, hatete nia.

Ba kampaña ikus iha Dili, PNTL kontinua komunika ho parte ekipa susesu kandidatu na’in-rua nian no orgaun eleitorál sira hodi bele asegura seguransa.

“Ami nafatin koordena no komunika ho ekipa susesu husi kanidatu Prezidente Repúblika na’in-rua, hodi ita hotu hamutuk asegura seguransa, nune’e ita-nia kampaña ikus iha Dili, bele la’o di’ak”, dehan nia.

Komamdu PNTL mós relata, durante fulan-marsu no inisiu fulan-abril PNTLrejista kazu insidente balun, asidente tráfigu hamutuk 196, husi kazu sira ne’e, iha kazu asidente trafigu grave hamutuk 44 restu kanek kaman no óbitu na’in-10. (*)