Ho formasaun ba lideransa iha asaun ne'e durasaun loron tolu, ho formadór sira husi Austrália institution of police management, husi pasific facult of police.
“Semináriu ba lideransa iha asaun, ne'e ba ofisiál mediu jerál, inspetór sira nomós sarjentu sira, ita fó formasaun ba sira tanba sira mak loroloron liga direita, situasaun iha terenu, entaun presiza iha formasaun sira hanesan ne'e para, sira bele hetan perspetiva foun, formadór ba formasaun ne'e mai husi Austrália, no TLDP mak apoiu Orsamentu hamutuk $40 mil”, dehan Komandante Sentru Formasaun Polísia (CFP), Superientidente Xefe Arquimino Ramos, iha Komoro, tersa (21/06).
Formadór sira husi Austrália ne'e, uluk sira mai dezenvolve ona diploma iha ne'e, diploma ba jestaun ezekutivu Polísia, no agora kontinua ho kursu sira hanesan ne'e ba nível médiu, para sira bele halao servisu di'ak liután.
“Formasaun ba nível médiu ne'e, oinsá mak sira-nia lideransa iha asaun, asaun ne'e mak importánte, teoria ita aprende, lee iha livru, partisipa kursu barabarak, mais iha semináriu ne'e lori ita atu, oinsá mak halo, la'ós ita dekor ona konseitu lideransa. Oinsá mak ita lori konseitu sira ne'e ba prátika lorloron, ita halo buat ruma foun, halo mudansa ruma, ba ita-nia organizasaun ne'e mak importánte”, esplika nia.
Formandu ba formasaun ne'e mai husi postu sarjentu nomós inspetór sira husi munisípiu inklui nasionál ne'ebé totál hamutuk iha ema na’in-40.
“Depois de formasaun ne'e sei halo mós selesaun ba sira ne'ebé Inglés di'ak sei rekomenda para sira kontinua estudu iha Austrália, ida-ne'e kooperasaun ne'ebé iha tiha ona ba AFP ho programa TLPDP nia, agora ita kontinua”, hatete nia.
Tanba ne’e, nível hothotu, hanesan nível ezekutivu, Superior, médiu, no formasaun sira ne'e presiza kontinua, para oinsá mak hadi'a kualidade atendementu públiku, nune'e sosiedade bele hetan atendementu ida ne'ebé di'ak, no instituisaun merese hetan respeitu husi komunidade bainhira PNTL iha atendementu di'ak.
“Tanba mudansa ne'e, di'ak ba ita-nia instituisaun no ita-nia sosiedade nia di'ak”, afirma nia. (*)
