“Iha programa haat, ne’ebé hato’o ba ita katak, iha parte operasaun, formasaun no parte lojistik, buat sira ne’e hotu mak ninian sub-programa to’o iha 14, sira mantein nafatin apoiu masimu ba PNTL too iha tinan 2027. Ita kontinua hetan apoiu husi parseiru TLPDP husi nasaun Austrália to’o iha tinan 2027 kona-ba programa hamutuk 14 atu dezenvolve instituisaun PNTL inklui kapasita membru Polísia iha área formasaun”, dehan Calistro hafoin enkontru ho parseiru TLPDP iha Kuartel Jerál PNTL, Kaikoli, tersa (28/06).

Ba enkontru ne’e parte rua diskute kona-ba kooperasaun servisu ba oin hodi dezenvolve instituisaun PNTL iha área oioin ne’ebé mak parseiru TLPDP komprometidu atu apoiu.

Dala barak TLPDP apoiu PNTL iha área formasaun, tanba reprezenta TLPDP mós iha hela Sentru Formasaun Akademia Polísia-Komoro hodi fasilita kursu investigasaun, tránzitu, polísia komunitária no espesialidade balun mós sira fó apoiu to’o iha infraestrutura.

“Iha área infraestrutura sira ita hotu hatene dadaun TLPDP apoiu hari’i postu abulante UFP iha ita-nia Fronteira, tanba ne’e ita ko’alia mós kona-ba Unidade Polísia Maritima nian kuartel, maibé ida foin mak aprezenta sira mós tau hela iha sira-nian programa, ha’u hanoin katak diskusaun tuir mai ita sei haklean kona-ba asuntu programa sira ne’e”, afirma Nia.

Kona-ba área konstrusaun ba postu UPM ne’e depende iha teritóriu husi Kosta Súl no Kosta Norte inklui iha Tasi iha lubuk ida mak presiza dezenvolve iha área konstrusaun, maibé diskusaun sira ne’e tékniku mak sei deside hodi estabelese postu sira ba UMP.

“Ita-nia territóriu husi Kosta Norte to’o ba Súl mós, ita iha área tasi no tantu buat lubuk ida mak ita presiza dezenvolve iha área konstrusaun, ha’u hanoin diskusaun tékniku mak sei deside, oinsá mak postu hira mak atubele deside iha dezenvolvimentu ne’e ha’u hanoin depois, kona-ba halo manutensaun ba ró mós sei inklui m’os iha diskusaun klean ita sei ko’alia para to’o iha tinan 2027 sira bele apoiu ita”, hatete nia.

Dadaun ne’e mós apoiu hela rekursu superior na’in ida feto komandante PNTL, Superintendente Xef Natercia Martins ne’ebé frekuenta hela kursu Estadu Maior Defeza iha Austrália durante tinan ida ho balun.

Tanba ne’e, membru PNTL sira ba tuir kursu iha Austrália ne’e, kursu ida nível superior nian, atu kompleta kursu ida-ne’e bele mai mós fó apoiu tomak husi TLPDP oinsá bele haree asuntu sirkuritaria ba nível Estadu nian no nível ne’ebé mak boot.

“Ita-nia membru superior PNTL na’in-tolu iha kuartel jerál naran mak ha’u la bele fó sai ne’e orsida gabinente jerál mak informa maibé ha’u hatene sira prontu atu ba Austrália tuir kursu iha tinan ida-ne’e tan”, deha nia.

Antes ne’e, Xefe TLPDP iha Timor-Leste, Darren Booy hatete, TLPDP kontinua apoiu PNTL tuir akordu koperasaun ne’ebé mak iha hodi hadi’a dezafiu nune’e bele progresu husi rezultadu estabelesimentu kooperasaun ne’ebé maka parte rua estabelese ona antes ne’e.

Tuir dadus iha fulan-juñu 2021, TLPDP apoiu komputadór 10 ho mákina impresora-fotokopia, no mós meza no kadeira hamutuk 25.

Nune’e, iha fulan-janeiru 2020, TLPDP apoiu formasaun lian inglés ba membru polísia Unidade Espesiál (UEP) hamutuk ema na’in-24.

Iha tinan 2019, Timor-Leste Police Development Programe apoiu orsamentu rihun $30 hodi hari’i uma Unidade Pesoál Vulneravel kompleta ho fasilidade servisu nian ho Komputadór 8, meza-kadeira no mós apoiu sira seluk tan.

Entretantu iha enkontru avalisaun ne’e dirije husi Komandante Jerál PNTL, Komisáriu Faustino da Costa ho Segundu Komandante Jerál PNTL, Komisáriu Mateus Fernandes no partisipa husi Komandante Operasaun no Administrasaunn Komandu Jerál PNTL ho parseiru TLPDP iha kuartel jerál PNTL, Kaikoli. (*)