Tuir informasaun ne’ebé www.tempotimor.com, asesu iha pájina servisu relasaun públika (SRP, domingu (17/07) katak, atividade ne’e hala’o atu halo kontrola komunidade sira liliu pasajeiru no motista sira ne’ebé lori sasán kontra bandu sira.
Komandante PNTL Munisípiu Bobonaro, Superintendente Antonino Mauluta hatete, atividade pasa revista ne’e prende karreta no motorizada ne’ebé laiha dokumentu.
“Ohin dadeer ita halo atividade pasa revista ba karreta no motorizada sira iha área Lahomea-Maliana no halo aprensaun ba karreta Angguna 2, bus 5, kamioneta 2 no motorizada 11, nune’e aprensaun ba viatura hamutuk 20”, informa Komandante Mauluta, liuhusi telefone.
Ba ekipa konjunta prende viatura hirak ne’e tanba motorista sira komete infrasaun hanesan, la uza asesór viatura liliu ispellu no xapa matríkula, dokumentu no karta kondusaun liu prazu no barak liu, laiha karta kondusaun.
“Ekipa operasaun pasa kedas koima ba infratór sira no evakua ona evidénsia sira ne’e mai iha tránzitu Komandu PNTL Munisípiu Bobonaro, no kontinua submete ba prosesu hafoin sira selu tiha iha Banku mak mai foti fali sira evidénsia sira ne’ebé prende”, afirma nia.
Operasaun konjunta ne’e hetan apoiu hosi Seksaun Tránzitu Rodoviaria na’in-5, membru Sesaun Operasaun na’in-1, membru Sesaun Justisa na’in-1, membru Sesaun Administrasaun 1, membru SIP 1, no membru Polísia Komunitária 1. (*)
