“Ha'u triste loos tanba Timoroan uluk bainhira ita luta ba ukun-an iha fatin-fatin jagoan loos foti Bandeira Timor, maibé ukun-an tiha balun iha mala’e nia-rain hatun fali ita-nia Bandeira RDTL, ne'e ladún di'ak no fó imajen la di'ak no hatudu katak ita Timor ne'e so hatene mak halo problema no ida-ne'e labele”, dehan nia hafoin audénsia ho Prezidente Repúblika (PR), José Ramos Horta, iha Palásiu Prezidensial Bairo Pite, kinta (28/07).

Ba preokupasaun ida-ne'e, nu’udar aman no Maun nomós nu’udar Xefe Governu hakarak husu ba sidadaun sira hotu atu hatudu komportamentu di'ak.

Tanba Timor-Leste nu’udar nasaun ida, entaun sidadaun nia komportamentu iha ema nian rai ne'e tenke sebilizadu , atu buat ne'ebé halo iha fatin seluk labele hamonu imajen nasaun nian.

“Hanesan ita-boot sira hatene sira ne'ebé kaben na'in bainhira oan sira halimar estraga ema nia sasán no halo at ema nia buat ruma iha jardim ema trata to'o inan-aman katak inan-aman la hanorin”, esplika nia.

Maibé loloos ne'e inan aman la sala buat ida, ne'e mós hanesan sira ne'ebé halo iha ema nia rain, nasaun Timor mak lori todan, tan de'it ema ida-rua nia hahalok.

“Entaun hakarak hatete sira tenke revee sira-nia komportamentu hodi hatudu buat ne'ebé di'ak atu halo morin la'ós de'it sira nia naran no sira nia família maibé halo moris nasaun no povu Timor-Leste nia naran no ida-ne'e nu'udar orgullu boot ida reprezentate sira lori Bandeira RDTL atu hatudu katak iha rai ne'ebé Timoroan iha Timor iha ne'eba”, afirma nia. (*)