Tuir informasaun ne’ebé www.tempotimor.com, asesu iha pájina relasaun públika PNTL, segunda (08/08) katak, hafoin simu informasaun, Xefe SIP orienta kedas membru sira halo vizilánsia durante oras 24 nia laran hodi buka informasaun no konsege kaptura EPS iha nia uma Kaikoli no rekolla mós evidénsia laptop rua ho marka Asus ne’ebé mak nia fa’an ona ba ema estranjeiru ida husi Indonézia.
Tuir deklarasaun husi suspeitu, iha loron domingu 31 jullu 2022, tuku 13:00 otl nia ho motorizada marka Revo Fit, kór azul xapa matríkula M.4222 TLS, ba área Aldeia Baio Leste, Suku Manleuana, suspeitu haree uma kór mutin portaun loke hela nuneé nia tama ba vítima nia uma laran hodi na’ok laptop ho marka Asus hamutuk 2 no lori kedas ba fa’an ho presu $300, ba sidadaun Indonézia ida ho naran Edi Sulikin, iha área Audian fatin hadi’a telefone iha loja Sahabat nia sorin.
Ekipa servisu halo kontaktu kedas ba vítima ho naran Kapila prasanna no Steve Fernandes, ne’ebé hatama ona keixa hodi mai haree nia laptop, infelizmente dadus apaga hotu no halo ona instalasaun foun nune’e vítima nain-2 lamenta no husu atu sidadaun Indonézia ne’e responsabiliza nia aktu ne’ebé kontribui ba krime refere.
Vítima sira hato’o agradesementu ba SIP-PNTL nia profesinalizmu tanba halo servisu extraordinária iha loron ida de’it buka hetan suspeitu hamutuk kedas ho sira-nia laptop ne’ebé lakon no nia husu atu prosesu ba sidadaun Indonézia ne’e kontinua la’o nafatin.
Hafoin halo identifikasaun, Xefe Ekipa SIP Nasionál entrega suspeitu EPS hamutuk ho evidénsia laptop 2 no motorizada 1, ba Servisu Investigasaun Kriminál Eskuadra Dom Aleixo Komoro, hodi halo prosesu investigasaun no detein durante oras 72 hodi submete ba prosesu investigasaun tuir lei ne’ebé iha, antes submete ba tribunál hodi tuir porsesu julgamentu.
Antes ne’e suspeitu EPS mós komete kazu na’ok osan ne’ebé mak rejista ona iha PNTL. (*)