Tuir Informasaun ne'ebé www.tempotimor.com asesu iha Pájina Servisu Relasaun Públika, kuarta (10/08) katak, autor ne'e husi Suku Kaibada, Postu Administrativu Baukau, Munisípiu Baukau no hela iha Suku Bekora, ne’ebé durante ne’e na’ok motorizada iha kapitál Dili.
Iha prosesu identifikasaun suspeitu FdF deklara nia na’ok ona motorizada 14, laptop 3, bisikleta, mákina tesi dut, telefone iha fatin ne’ebé lahanesan no sasán hirak ne’e balu fa’an ona no balu asegura hela iha suspeitu ES nia uma iha área Tasitolu no Munisípiu seluk tán.
Ekipa konjunta kaptura suspeitu FdF iha nia rezidénsia besik Prizaun Bekora nia sorin tuku 02:12 hamutuk ho evidénsia motorizada ida hafoin simu informasaun husi fonte destakadu no lori kedas ba edifísiu SIPN iha Kaikoli.
Suspeitu FdF mós foin sai husi prizaun iha loron 27 fulan-maiu tinan 2022, hafoin kumpri pena prizaun durante tinan 6 iha prizaun Bekora tanba komete kazu hanesan.
Husi deklarasaun hirak ne’e, ekipa konjunta tula suspeitu FdF hodi hatudu fatin akontesementu no evidénsia hirak ne’ebé nia fa’an inklui ema sira ne’ebé sosa no rekolla hikas motorizada 7, laptop 2 no telefone 1 iha área Tasitolu restante seidauk hetan tanba fa’an ona ba ema seluk.
Daudaun ne’e, Xefe SIP Nasionál orienta ona ekipa konjunta dezenvolve kazu no fahe ekipa halo vizilánsia totál menus husi 24 horas nia laran hodi rekolla tán evidénsia seluk hanesan motorizada, laptop inklui sindikatu sira ne’ebé envolve iha kazu refere. (*)
