Komandante Komandu PNTL Munisípiu Dili, Superintendente Xefe Henrique da Costa informa, kazu ne'e akontese horikalan wainhira membru PNTL sira halo hela seguransa ba serimónia graduasaun ba PSHT iha Timor Loudge ne’e mak hetan tuda iha área Komoro nia.

“Suspeitu sa’e motorizada mak tuda bomba molotov ba sira wainhira sira hala’o hela seguransa iha Timor Lodge ba serimónia graduasaun PSHT nian. Kazu ne'e mosu tanba membru PNTL hapara sira latau helem ne'e mak diskute malu, ida tun tebe ajente polísia ida depois ajente seluk halai ba ajuda ne'e mak sira soe marotok tan sira na’in-2”, dehan Henrique, iha nia kna’ar fatin Kaikoli, sesta(19/08).

Nia dehan, suspeitu ida konsege halai maibé ida seluk konsege asegura no PNTL prende mós motorizada ne'ebé mak sira uza hodi halo asaun.

“Husi akontesementu ne'e polísia asegura ona suspeitu ida ho naran inisiál RBH, tinan 24, hela iha Aldeia Niken, Suku Bairo Pite, Postu Dom Aleixo inklui motorizada ne'ebé uza hodi halo asaun brutal hasoru polísia ne'e no buka tuir suspeitu seluk ne’ebé hakanek membru polísia na’in-2”, dehan nia.

Komandante Henrique hatutan, oras ne'e daudaun membru PNTL na’in-2 ne'e halo tratamentu saúde iha Klinika Kampu Baru enkuantu suspeitu RBH detein durante oras 72 hodi kompleta prosesu.

Entretantu membru PNTL na’in-2 ne’e ho naran, ajente Leonito C. Goncalves no Ajente prinsipál Nicolao dos Santos, husi eskuadra Dom-Aleixo hetan kanek iha ulun no ain rezulta suku pontu lima. (*)