“Atu informa de’it katak, konstrusaun foun ba Eskuadra PNTL Dom Aleixo hahú halo ona no daudaun ne’e muda provizóriu mai iha Kolejiu PNTL Komoro. Tanba ne’e atu informa ba komunidade sira ne’ebé hela iha área Komoro karik atu mai hatama keixa ruma ka trata dokumentu ruma bele mai direta Kolejiu PNTL besik kedas Kapela PNTL nian sorin”, informa Henrique, iha nia kna’ar fatin Komandu Munisípiu Dili, tersa (04/10).
Mesmu fatin muda ona maibé Komandante Eskuadra Dom Aleixo hamutuk ho nia membru sira nafatin halo servisu hanesan baibain hodi fó atendiemntu ba komunidade sira.
“Agora daudaun ita hetan apoiu transporte husi Gabinete Vise-Ministru Interior, Kuartel Jerál no Komandu Munisípiu Dili rasik hamutuk ho rekursu ne’ebé iha komesa lalin ona ekipamentu servisu sira ne’e ba Kolejiu PNTL Komoro nune’e orsida kalan sira bele hahú servisu provizóriu iha ne’ebá”, subliña nia.
Entretantu, kompaña ne’ebé manán hodi halo obra ne’e mak kompaña Quatro Colegas Lda no Joint Venture ho Carya Timor-Leste Lda ne’ebé manán konkursu husi Ministériu Interior. (*)