Tuir informasaun ne’ebé www.tempotimor.com asesu iha pájina Servisu Relasaun Públika, loron segunda (09/01), Komandante Komandu PNTL Munisípiu Dili, Superintendente Polísia, Joni Viana das Regras, haktuir, atividade ne’e halo hodi eduka nafatin sidadaun sira atu respeita kódigu estrada.

“Ita halo aprensaun ba viaturas hamutuk 13, kompostu husi motór hamutuk 12 inklui kareta-1, ne’ebé viola dekretu lei no.6/2003, Kódigu Estrada”, dehan Komandante Joni.

Atividade ne’e, halo hodi kontrola jestaun veíkulus no kria ambiente kondusaun seguru ne’ebé efikas no efisiente ba motorista sira inklui haree mós ba sasán kontra bandu sira seluk.

“Ohin ita orienta membru tránzitu sira hotu kontinua halo kna’ar operasaun rutina hodi halo check point ba kareta no motorizada sira ne’ebe kontinua viola kódigu estrada, nune’e bele eduka nafatin ita-nia sidadaun sira hodi respeita leis tránzitu aumesmu tempu halo mos prevensaun ba asidente tráfiku no dezenvolve kampaña seguransa rodoviária”, nia haktuir

Atividade pasa revista ne'e, konsege identifika sidadaun barak mak kontra kódigu Estrada, tanba la monta xapa matríkula, asesores lampu no espellu laiha, la uza kapasete, no maioria dokumentu viaturas invalidu. (*)