Kapturasaun ne’e, tanba servisu makas husi ekipa konjunta, ne’ebé kompostu husi Aranha, Makikit, F&P, Unidade Falintil, SNI, patrullamentu husi Esquadra Nain-Feto, Esquadra Cristo Rei, Task Force no ofisiál Delta 31.

Tuit informasaun ne'ebé www.tempotimor.com asesu iha pájina ofisial Servisu Relasoens Públikas katak, iha loron 18 fulan-janeiru tinan-2023, pur-volta oras 23:30 parte kalan, joven ho grupu kompostu husi ema na'in-9, tenta halo perturbasaun orden públiku nian no tuda komunidade nia uma.

Autor hirak ne’e, lori tudik no katana hodi taa ema nia kereta arbiru, iha estrada área Suku Akadiru-Hun nian, tanba kondisaun lanu, nune’e rezulta komunidade ho inisial O.B.T, idade-34, nu’udar Dona da Casa, hela fatin Bidau Akadiru Hun, Aldeia Kuluhun de Baixu, no advodadu internasional ho inisial C.T.B.F husi Mozambique-Maputo sai vítima.

Maibé ekipa konjunta lori ona autor sira ba Eskuadra Nain-Feto Dili, hodi submete ba prosesu investigasaun no kontinua ba detein iha sela Komandu Polísia Nasioná Timor-Leste (PNTL) Munisípiu Dili.

Enkuantu, joven hirak ne’e hosi Suku Gariuai, Postu Administrativu Baukau Vila, Munisípiu Baukau, no sira hotu servisu iha kompaña lokál ida ne’ebé halo fornesimentu aihan liu husi programa nasional Sesta Bázika. (*)