Prezidente Komisaun B deputadu José Agostinho Sequeira "Somotxo" dehan, lei utilizasaun arma ba PSIK rasik aprova liuhusi Konsellu Ministru iha guvernu konstitusional dalima, tanba ne'e governu atuál ezekuta tuir dekretu governu anteriór.
"Situasaun hanesan ne'e ha'u lakohi halo komentariu barak, maibé sei konvoka ho Ministru Justisa (MJ) no Ministru Defeza no Seguransa para ko'alia kona-ba situasaun ne'ebé ohin loron ita-nia sidadaun no organizasaun naun govermental kestiona," dehan Somotxo ba www.tempotimor.com iha PN, Segunda (19/10).
Nia mós preokupa ba tipu pistola ne'ebé governu aranzu ba PSIK, tanba pistola ne'e ladun nesesáriu.
"Ha'u preukupa ne'e tipu ho kilat, serake PSIK nia servisu ho nia karakteristiku propriu uzu kilat ida ne'e," nia dehan.
Deputadu ne'e mós dehan, pozisaun konkreta tenki iha konsesu, intendementu kona-ba tipu kaliber ho kilat ligadu ho natureza servisu no kompeténsia PSIK nian.
"Kompetensia no servisu ne'e oinsa, tanba ne'e hau labele dehan kontra maibe presija iha intendementu," dehan Somotxo.
Molok ne'e, governu mós halo ona alterasaun dahuluk ba dekretu lei númeru 21/2014 iha 6 Agostu kona-ba dekretu lei númeru 15/2014, iha 14 Maiu, lei orgánika PSIK, hatuur PSIK nu'udar korpu superiór polísia kriminál, ne’ebé organiza tuir irarkia iha Ministru Justisa nia mahon ho autonomia administrativa, finanseira no patrimoniál.
Entretantu iha artigu 20 estatutu PSIK nian katak, pesoál investigasaun kriminál no pesoál ausiliár investigasaun kriminál nian iha direitu ba uzu no porte ba kilat servisu nian, kaliber no tipu ida tuir diploma ministerial Ministru Justisa.(*)