Faustino hateten lia hirak ne’e, hafoin halo abertura ba kolókiu nasionál ne’ebé hala’o iha Tower bar Fatuhada.

“Kazu ne’e iha prosesu hela, vítima mós sei akompaña hela, maibé insidente ne’e akontese kuandu vítima na’in rua ne’e partisispa iha serimónia funerál sira-nia mestre ka treinadór nian, maibé depois ema halo asaltu ba sira iha dalan, ne’ebé prosesu ne’e la’o hela,” Faustino hateten iha Fatuhada, Sesta (11/12).

Komandante ne’e mós dehan, pistola ne’ebé ema deskoñesidu uza ne’e illegál ka legal nia parte seidauk hatene.

“Kona-ba pistola ne’e ilegál ka lae, maibé prosesu la’o hela, ne’ebé atu dehan pistola ka arma seluk,” nia dehan.

Iha fatin seluk, Komandante Unidade Polísia Militar Maijór Infantaria Abel da Costa Xavier (Niki) hateten katak, Polísia Militar halo kapturasaun ba ema ida ne’ebé deskonfia halo aan hanesan polísia military.

“Kona-ba ema ne’ebé dehan nia militar ne’e informasaun seidauk klaru, agora iha hela prosesu investigasaun, iha hela ami-nia liman, entaun ha’u seidauk bele ko’alia, nia membru PSIK ka Polísia ka husi ne’ebé,” nia dehan.

Entretantu kazu tiru joven Alexandre da Cruz ne’e akontese iha suku komoro, iha Kuarta Feira (09/12) maizumenus tuku 21:00 kalan bainhira joven ne’e hein hela bus atu viajen ba Munisípiu Covalima, maibé derrepente nia hetan tiru husi ema deskoñesidu.(*)