PM Taur fó ona instrusaun ba Ministru Defeza atu kria politika ida oinsa integra sistema defeza. Signifika formasaun ka treinu mós tenke integradu.

"Se lae hanesan uluk iha krize 2006, kooperasaun PNTL ho F-FDTl la'o hamutuk mas PNTL la hatene saida mak regra kombate, entaun ne'e hanesan ita lori fali ema halo toos nian ba fali halo natar. Entaun, sistema ne'e tenke integradu", dehan nia, iha Palásiu Prezidensiál, Bairru-Pité, Kinta (9/5).

Ne'e duni, Xefe Governu husu ba Ministru Defeza atu tau atensaun ba formasaun treinu labele halo keta-ketak, maibé halo ida deit depois mak ba fahe iha leten para labele duplika.

PM mós rekoñese, Timor-Leste iha ema no infraeatrutura barak ne'ebé tenke halo. Entaun, labele halo duplikasaun para to'o loron ida governu laiha kbiit atu finansia. Tanba politika Governu nian maka halo poupasa buat ne'e iha no produz barak liután para fahe ba sira ne'ebé laiha.

"Ita tenke poupa osan para sira seluk mós lao no ida ne'ebé duplika ita tenke koa para ita labele gasta demais, tanba ita-nia polítika maka oinsa konsentra ba kombate kiak no mukit, inklui fó oportunidade servisu hanesan ba ema hotu", dehan Matan Ruak.