Segundu Komandante PNTL Dili, Superintendente Polísia, Euclides da Costa Belo hatete, sidadaun mane ida, PNTL detein tanba viola rezolusaun governu nian ne'ebé fó sai kona-ba serka sanitária.
"Iha sidadaun ida maka tenta atu hakat liu Tasi-tolu no ita halo identifikasaun, nune'e mós sidadaun sira ne'e la liuhusi estrada boot, maibé buka atu dezvia liu filafali dalan klandestina nian, ita nafatin foti medida. Sidadaun ne'e mane", dehan Euclides Belo iha nia servisu fatin Kaikoli, kuarta (10/03).
PNTL munisípiu Dili mos detein sidadaun mane ida iha sela Polísia nian, tanba lori motorizada, maibé laiha karta kondusaun.
"Embora la kumpri regra, maibé kontra mós lei tránzitu seguransa rodaviária, karta kondusaun laiha, mais dezvia para depois polísia labele deteta. Mais realidade ita deteta, bainhira liuhusi identifikasaun ne'ebé mak halo iha ekipa jestaun krize nian, identifika pesoál laiha karta kondusaun no agora dadauk nia tama hela sela PNTL munisípiu Dili nian", dehan Euclides.
Tanba sidadaun sira ne’ebé PNTL detein liu oras sanulu-resin-rua (12) tenke submete ba primeiru interogatóriu iha Ministériu Públiku (MP), tanba sira maka na’in ba prosesu.
Maibé identidade husi sidadaun mane na’in-rua ne'ebé Polísia detein, dadaun ne'e parte investigasaun sei halo identifikasaun ba nia naran no orijinalidade, hafoin fó sai ba públiku.(*)