“Hodi ida ne'e, ita foti inisiativa ida ne'e, para bele iha formasaun ba ita-nia ajente sira, ida ne'ebé mak loroloron mak iha kampu, hamutuk ho ita-nia komunidade sira atubele responde ba komunidade sira ninia pedidu ba prevensaun konflitu nian”,

“Nomós responde ho nível prevensaun konflitu nian nomós responde atuasaun ho servisu ida ne’ebé mak asmas teb-tebes para hodi bele hamate, ka hemenus atuasaun ne’ebé mak uza liu emosaun, duke uza hanesan ita-nia kakutak malirin para hodi bele rezolve problema", dehan Sekretáriu Estadu Protesaun Sivíl (SEPS), Joaquim Gusmăo dos Reis, iha Salaun Ministériu Interior (MI), Vilaverde, kuarta (23/06).

Tanba durante iha tinan ida-resin, ho situasaun Covid-19, Timor-Leste mós hasoru kalamidade iha dezastre naturál ne'ebé mak iha presaun maka'as mós liliu kona-ba atuasaun membru PNTL sira ne'ebé destaka iha kampu.

Nune'e, SEPS ho PITL servisu hamutuk hodi konsiénsializa membru sira-nia mentalidade oinsá hadi'a ida-idak nia atendimentu iha nível komunidade, ligadu ho matéria "Jstaun ba Emosaun" ninian, inklui prevensaun konflitu ba labarik no feto sira.

Dadaun ne'e, protesaun sivíl nian liuhusi diresaun nasionál konflitu komunitáriu hamutuk ho Plan International, ho ajentes PNTL sira.

“Ida ne'e mak ita-nia foku primeiru, tanba ita haree durante iha tinan ida nia laran ne'e, iha akontesimentu barak iha kampu ne'ebé mak ita presiza atu fó hanoin fali, halo filafali trainin, formasaun para atuasaun sira ne'e bele iha nível atendimentu ida di'ak liu hodi nune'e bele manán filafali konfiansa husi ita-nia komunidade sira", haktenik nia.

Entretantu Komandante PNTL Munisípiu Dili, Superintendente Xefe Polísia, Henrique da Costa informa, komandu Munisípiu Dili nomeia membru na'in-15 hodi partisipa iha sensibilizasaun kona-ba jestaun emosaun ninian, nomós prevensaun ba konflitu ninina.

"Tanba saida mak presiza partisipasaun membru PNTL nian iha ne'e, ita hatene katak ita-nia membru PNTL sira lorloron servisu diretamente iha terrenu, hasoru komunidade, hasoru envairomentu ne'ebé mak diferente. Ida ne'e konsekuénsia, fó kedan impaktu ba iha rezultadu servi atendimentu sira-nian ba ita-nia públiku", dehan nia.

Tanba ne'e, membru sira presiza halo jesatun hodi koñese didi'ak sira-nia aan, atu oinsá bele prevene sira-nia an hodi halo filafali atendimentu ka atuasaun ne'ebé mak dala-ruma aas liu.

"Ita mós ohin halo komunikasaun ho parte Plan International ninian ho mós diretór DNPKK, atu nune'e ita-nia ema mós hetan konsellu, tanba laiha ema ruma atu fó konsola sira, ida ne'e mós impaktu ba atendimentu sira nian", nia hakotu. (*)