Komandante Unidade Espesial Polísia, Superintendente Xefe, Orlando Gomes hatene, sidadaun na'in-4 iha ne'ebé deskonfia husi membru Grupu Arte Marsial (GAM), iha área mota Malibaka atu hakat Ilegál liuhusi fronteira terestre Timor-Leste no Indonézia.
Joven mane na'in-haat ne'e, kipa konjunta husi komandu PNTL kaptura iha loron kuarta (18/08), maizumenus oras dadeersan, iha Aldeia Huluati, Suku Memo, Postu Administrativu Maliana, Munisípiu Bobonaro.
“Atu informa de'it foin daudaun ita nia membru COE ho mós BOP ne’ebe horikalan kedas fo apoiu ba UPF iha liña fronteira Suku Tapo/Memo, ida dader ne’e konsege kaptura tan joven mane na’in -4 hamutuk ho evidénsia komprovativu sira hanesan farda treinu PSHT iha área fronteira ne’ebé ho intensaun ba sa’e sabuk iha Indonézia”, informa Orlando Gomes, liuhusi karta komunikadu ne'ebé www.tempotimor.com asesa, kuarta (18/08).
Sidadaun timoroan ne’e, iha na'in-tolu ho inisial EF, LfL no OC, orijinalidade husi Aldeia Atus, Suku GIldapil, ne'ebé hakata ba Indonézia iha (22 /07), 2021 no sa'e sabuk iha 16 agostu 2021.
Enkuantu na'in-ida seluk ho inisial MA, husi Aldeia Coshal, Suku Saburai no sira na'in-haat ne’e husi Munisípiu Bobonaro.
Hafoin kapturasaun, ekipa operasaun konjunta ne'ebé lidera husi Komandante BOP husi Kompaña Delta, Inspetór Rosalino dos Santos, ho Komandante Pelutaun COE, Inspetór Asistente Polísia, Julio Bosco, entrega kedas ba komandu PNTL Munisípiu Bobonaru hodi kontinua ba prosesu investigasaun. (*)