Tanba atu taka dalan luron sira ba lia, tenke husu pedidu ba PNTL hodi haree hafoin bele fó autorizasaun ba hala'o atividade.
"Taka dalan luron ba serimónia ruma, ida ne'e labele, tanba kompeténsia atu taka dalan ne'e, sira tenke hato'o pedidu mai iha komandu, depois komandu hatun ekipa ba haree, katak dalan ne'e atu taka ne'e, taka iha ne'ebe. La'ós dehan ita taka tomak tiha dalan ne'e. Dalan ne'e, depois de hato'o pedidu ba, observa, dalan ne'e so autoriza taka ne'e, sorin de'it, sorin ne'e halo movimentu nafatin. Sé ita taka hotu dalan, depois ema atu halo movimentu ne'e liuhusi ne'ebé", dehan Henrique da Costa, iha Kaikoli, kinta (09/09).
Tanba ne'e, husu ba komunidade sira karik hetan informasaun ruma kona-ba ema taka dalan ba serimónia balu, atu informa lalais ba Polísia hodi hola medida tuir lei.
"Ne'ebé, husu ba komunidade sira tenke aprezenta ba ita-nia polísia, atu nune'e ita haruka ita-nia ekipa ba hodi ko'alia ho Uma-na'in", informa nia.
Maibé komunidade balu iha kapitál Dili taka dalan luron hodi dada tenda ba halo lia, nune'e difikulda motorista sira atu ultrapasa. (*)