"Iha operasaun ne'e, ekipa investigasaun hetan ema joga bola gulin ne'e iha Aimeti-Laran, konsege kaptura suspeitu na'in-3 ho ninia inisiál JDS, JP Dias, JFDS ho evidénsia mak hanesan osan ho montante US$1,322, ho meza bola gulin, water pass, ho tan pó ho tan sasán sira seluk”, informa Komandante PNTL Munisipiu Dili, Superintendente Henrique da Costa, sexta (01/10).
Sidadaun na’in-3 ne’e hetan kaptura iha loron kinta (30/09) oras 11:20 kalan, bainhira ekipa servisu investigasaun kriminál Munisípiu Dili ninian halo operasaun iha Kapitál Dili, hodi buka tuir ema hirak ne'ebé mak halo jogu ilízitus ka bola gulin ninian.
Suspeitu na'in-tolu ne'e, Komandu Dili, liuhusi Servisu Investigasaun Kriminal (SIK) halo kapturasaun, tanba kontra lei kódigu penal, artigu 322 kona-ba esplorasaun ilízitus ninian, "bola-gulin" nian ne'e bandu.
"Suspeitu na'in-3 ne'e mak ita kaptura ne'e, agora iha ona sela detensaun komandu Munisípiu Dili ninian atu nune'e kontinua prosesu e sei aprezenta ba Ministériu Públiku”, dehan nia.
Evidénsia hirak neebé halo ona aprensaun, Komandu Munisípiu Dili sei aprezenta hotu ba ministériu públiku, hafoin deside atu entrega filafali ba na'in ka, atu hatama filafali ba kofre Estadu.
"Iha ne'ebá mak deside. Maibé ha'u bele hatete katak, esperiénsia sira uluk ne'e, sira ne'e sei entrega hotu ba iha kofre Estadu ninian”, informa nia.
Komandu Dili mós nota katak, suspeitu sira ne'ebé kapturadu, durante ne'e, sira sempre halo atividade jogu ilízitu ho ilegál iha kapitál nasaun.
"Ida bola gulin iha Dili laran ne'e, ema hatene malu hela, ne'ebé sira ne'e la'ós matan foun e iha fatin barak ne'e sira mak sei nafatin sei iha ne'ebá. Depois mak ita sei cross cheeck iha ita-nia dadus, sira komete ona dala-hira", hatete nia.
Antes ne’e, Komandu Dili fó orientasaun ona ba eskuadra sira hodi halo operasaun atu fó hatene ba família sira ne’ebé hader mate uma atu labele autoriza ema loke jogu (bola-gulin).
"Mais sira nafatin kontinua, entaun ita hatun ita-nia operasaun ne'ebé mak dirije husi parte investigasaun ninian hodi halo operasaun, e horikalan hodi kaptura. Operasaun ne'e sei la para iha ne'e de'it, e ita sei kontinua nafatin buka iha fatin seluk”, deklara nia. (*)