“Atu ko’alia kona-bá kondisaun saúde, membru sira iha kondisaun di'ak hotu. Ita ko’alia kona-bá kondisaun fasilidade, iha Suailoro, anteriormente Suailoro ne'e fatin Navál husi Indonézia nian iha tinan 1999, sira husik hela iha ne'ebá, foin tinan liuba ita prega tiha kalen balu, fatin abandonadu sira ne'e, tanba estragu tiha ona, ita hadi’a ho karater hanesan emerjénsia, ita uza fatin ne'e sai postu UPM nian hodi halo vizilánsia, seguransa ba ekipamentu sira ne'e, siknifika katak fatin ida bele dehan katak emerjénsia tebes”, informa Komandante Unidade Polísia Marítima (UPM), Superintendente, Basílio de Jesus, iha kna'ar fatin Lesidere, kinta (07/10).

Iha loron domingu (03/10) ne'e, Kompaña Perfurasaun Mina, Timor Resource hatun ona ekipamentu ba perfurasaun mina nian ho ró husi Surabaya-Indonézia, mai iha Portu, no oras ne'e asegura ona husi membru UPM sira iha Postu Seguransa Suailoro.

Maibé, publikamente hato'o ba públiku, kondisaun sira ne'e sei la sai obstakulu ida atu UPM ezerse nia funsaun, maske membru sira-nia toba fatin naton.

“Kuandu ita bele ba karik haree ho matan, uma oan ida ki'ik, maibé ita koloka iha ne'ebá, ema agora dadaun hamutuk 18 pesoál. Mais ho kondisaun ida ne'e ha'u dehan katak la hamate ita-nia espiritu nasionalízmu atu servisu liliu atu halo seguransa ba postu Suailoro, atu asegura atividade ou movimentu ekipamentus ne'ebé mak mai estranjeiru hatun iha Postu Suailoro”, afirma nia.

Totál membru UPM sira ne'ebé oras ne'e asegura hela ekipamentu perfurasaun mina iha Postu Suailoro, hamutuk na'in-18, maibé sei halo rotasaun tuir nesesidade servisu. (*)