“Ha’u hanoin, presiza update ba públiku kona-bá reseita ne’ebé maka ami kontribui ba kofre estadu hosi sirkulasaun transporte veíkulu estranjeiru ne’ebé maka halo sirkulasaun ba ita nia nasaun. Ita estabelese postu tránzitu iha postu integradu rua mak, Mota-ain no Salele. Husi ne’e, totál ita hahú monta postu iha loron 08 fulan-Jullu 2021, to’o data ohin, ita kontribui ona reseita ba estadu kuaze rihun US$34”, informa Diretór Departamentu Tránzitu Seguransa Rodoviáriu Nasionál, Superintendente Xefe, João Belo dos Reis, iha Komandu Jerál PNTL, Kaikoli, segunda (08/11).
Totál hirak ne'e, PNTL rekolla husi transporte estranjeiru sira ne’ebé durante ne'e halo movimentu husi rai viziñu Indonézia mai Timor-Leste (TL) bazeia ba dekretu lei númeru 28/2017, kona-bá sirkulasaun transporte estranjeiru nian.
Tanba iha lei númeru 28/2017, kona-bá sirkulasaun transporte estranjeira ne’e, regula mós kona-bá kategória atu selu kada transporte, sura tuir loron. Bainhira tama loron ida, ba karreta lijeiru hira, no karreta pezadu hira.
“Ha’u foti ezemplu simples, karreta pezadu, mak karreta sira ne’ebé mak tula naha-todan. Nia kuandu tama mai iha territóriu Timor-Leste, loron lima US$30. Depois sé nia fila kedas, iha US$7 no US$5 ne’e iha. Tanba ne’e, tabela kona-bá selu nian iha tiha ona”, esplika nia.
Bainhira transporte estranjeiru sira ne’e tama mai Timor-Leste, haree mós kona-bá nia durasaun no lisensa no membru tránzitu sira ne’ebé destakadu, sei marka ka taka mós stiker ho kór mean ba loron lima, no metan vale ba loron ida.
Iha parte seluk, atu labele hadau direitu ba sirkulasaun importadór sira, karreta estranjeiru ne’ebé mak tama mai ne’e, tenke fó guia da marcha, ba ninia destinasaun ida de’it.
Entretantu reseita ne’ebé rekolla iha fulan-outubru nia rohan ne’e, hatama husi postu Batugade, hamutuk US$5.500, no postu Mota-masin, US$2.280.
Aleinde ne'e mós totál taxa ne’ebé PNTL rekolla husi komandu munisípiu 13, iha fulan-outubru nian, hamutuk rihun US$42,393 ne’ebé mak kontribui ona ba kofre estadu. (*)
