"Durante tinan 2021 ne'e, Seksaun Tránzitu rekolla reseita hamutuk US$9,300.00 hodi kuntribui ba kofre Estadu, no osan hirak ne'e husi atividade check point, ne’ebé mak halo hodi kontrola movimentu transporte hotu iha Ermera, no rekolla hirak ne'e mós husi motorista na’in-50 ne’ebé mak kontra regra tránzitu, ne'ebé ita aplika infrasaun multa ba sira”, dehan Komadante PNTL Munisípiu Ermera, Superintendente Ludgério Lay, iha eskuadra Ermera, kinta (13/01).
Aleinde ne’e komandu PNTL Munisípiu Ermera rejista mós kazu asidente tráfiku hamutuk 32.
"Husi kazu asidente tráfiku 32 ne'e, iha kazu rua mak gravé, no restu n’ee kazu Kaman”, informa nia.
Nune'e kompara asidente tráfiku iha tinan 2021 ho 2020, kazu menus liu mak iha 2021, tanba rejistu de’it 32, maibé iha tinan 2020 kazu rejista hamutuk 100.
Maibé husu ba motorista sira banhira halo movimentu tenke utiliza kapasete no kompri sinál tránzitu.
Entretantu iha 2021 rejista mós insidente hamutuk 278, husi númeru ne'e maioria mak kazu ofensa integridade fiziku no violénsia domestika no kazu hirak ne'e balun submete ona ba ministériu públiku hodi prosesa tuir lei.
Diretór Interior Fundasaun Mahein, Sancho Xavier hatete, kada tinan reseita ne'ebé mak hatama ba kofre estadu ho montante boot ne’e husi Instituisaun PNTL.
Tanba ne’e, husu ba Governu atu haree kondisaun hirak ne’e hodi kompleta sira-nia fasilidade liliu transporte atubele fasilita sira hala'o servisu ho di'ak.
"Osan ne'ebé sira hetan ne'e husi atividade operasaun iha kalan no loron, polísia sira servisu maka’as hodi asegura nian komunidade maibé Governu laiha vontade hodi kria kondisaun ba sira, nune'e husu Governu toma atensaun ba ida ne'e, tanba ita haree polísia sira ne’e servisu di’ak maibé fasilidade no ekipamentu hodi fasilita sira hala’o kna’ar ne’e mak falta”, afirma nia. (*)