"Ami iha ona kordenasaun ho DNTT, atu blokeia hotu sidadaun sira hamutuk na’in-471 ne'e nia dokumentu transporte, bainhira sira ba perpanjang dokumentu iha ne'ebá, tanba sira hirak ne'e komete iha kazu infrasaun nia maibé la selu too agora”, dehan Inspetór Domingos, iha komandu Munisípiu Dili, tersa (18/01):
Bainhira DNTT blokeia hotu ona motorista sira hakarak atu renova fali dokumentu, tenke kumpri sira-nia dever hodi selu iha Banku Nasionál Timor-Leste (BNCTL) hafoin polísia Tránzitu Dili halo fali karta autorizasaun ba DNTT hodi loke hikas sira-nia dokumentu
Motorista sira hamutuk na’in-471 ne'e komete infrasaun iha tinan 2020 no 2021, ne’ebé iha tinan 2020 totál motorista hamutuk 207 ho Orsamentu ne'ebé sira atu selu ne'e US$5.162.00, iha 2021 hamutuk 264 ho totál osan US$13.054.00
"Sira hirak ne'e halo tiha infrasaun polísia Tránzitu Dili passa tiha nota infrasaun atu kumpri sira-nia dever hodi selu multa ne'ebé mak sira envolve iha infrasaun ne'e, atu ba selu iha BNCTL, maibé sira hasees-an husi responsabilidede la selu multa ba aktu infrasaun ne'ebé mak sira Komete”, esplika ina.
Ho razaun hirak ne'e Polísia Tránzitu Dili apela ba komúnidade sira, karik iha tinan rua nia laran ne'e envolve iha infrasaun ruma mak la kumpri nia dever hodi ba selu, husu atu hakbesik-an ba BNCTL atu selu nune'e lori resivu hodi bele foti fali dokumentu sira ne'ebé Polísia Tránzitu Dili rai hela. (*)
