Tempotimor (Dili)-Ekipa konjunta servisu sekreta husi Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) kaptura ona suspeitu ba kazu omesidiu ne’ebé akontese iha loron domingu (30/01) dader iha área Tasitolu-Masilidun, Aldeia 12 outubru, Suku Komoro, Postu Administrativu Dom-Aleixo, Munisípiu Dili.

Xefe Ekipa Operasaun, Inspetór Asistente Nelson Herculano, nu'udar Xefe Sub Servisu eksterna Servisu Informasaun Polísia (SIP) hatete, ekipa konjunta konsege kaptura suspeitu ne'e iha nia rezidénsia Aimutin.

"Ohin tuku hitu dader ita ekipa konjunta SIP (Servisu Informasaun Polísia) no SIM (Servisu Informasaun Militar) kaptura ona suspeitu ho inisiál JD ne’ebé halai ses husi lokál krime mai iha Aimutin tanba komete kazu omesidiu ne’ebé hamate matebian NS iha área Tasitolu iha oras tuku haat dader ne'e”, informa Nelson, iha nia kna’ar fatin kaikoli, domingu (30/01).

Hafoin akontesementu família evakua kedas vítima NS ba karreta kamioneta ida hodi lori ba halo tratamentu iha ospitál, maibé lakonsege salva matebian nia vida antes to'o iha ospitál tanba rán sai barak liu.

"Tuir kronolojia festa na’in hanesan mós sasin haktuir katak, kazu ne'e akontese iha seremónia koremetan família uma mane, mane foun nia iha Tasitolu no suspeitu ho nia grupu tama ba tenda laran halo konfrontu hodi hamate matebian ho tudik”, haktuir nia.

Daudaun ne’e, suspeitu iha ona PNTL-PNSIK nia liman hodi halo investigasaun no vítima ne’ebé mate dadaun  ne'e sei iha Muartuariu Ospital Nasional Guido Valadares(HNGV) hodi halo prosesu autopsia. (*)