"Ha'u husu ba públiku labele fiar demais filmajen ne’ebé mak la'o, tanba agora teknolojia modernu ne'e ema bele edit buat tun sa'e”, dehan Komadante Henrique, iha komandu Munisípiu Dili, Kaikoli, kinta (03/02).
Enkuantu, filmajen ne’ebé viral iha mídia Sosiál facebook, hatudu iha membru PNTL ida ne’ebé kaer hela arma, hamrik iha portaun pertamina iha Fatuhada hanesan fó apoiu ba joven sira tuda malu iha loron (01/02) wainhira joven sira akompaña mate isin ida ne’ebé deskonfia mate tanba oho husi ema grupu arte rituál balun iha Maslidun Tasi Tolu.
Tanba ne'e se públiku sente la satisfas bele hato'o keixa, nune'e komandu bele loke prosesu, tanba liuhusi prosesu ne’e mak bele hatene lolos kronolojia husi filmajen ne'e.
"Ha'u hanesan komandate Munisípiu, ha'u la akuza ha'u nian membru sein liuhusi prosesu investigasaun ida, tanba ha'u hatene ha'u-nia membru sira iha terenu ne'e halo servisu maka’as ona, sira la deskansa, sira laiha folga, entaun akuzasaun sira ne'e persiza haree, iha nia faktu ka la'e”, hatete nia.
Entretantu Komandu la akuza membru sira tanba dadaun ne'e teknolojia avansadu, ema oknum balun mak bele edita buat sira ne'e.
Maibe Komadante Munisipiu Dili dehan, Komunidade hato'o keixa mak los duni entaun oknum refere prontu simu sansaun husi komandu, maibé se laiha nia labele akuza tanba laiha evidénsia.
"Ha'u rejeita tanba laiha prosesu ida, seidauk iha prosesu, bele iha keixa mós tenke liuhusi prosesu, se laiha prosesu ne'e halo nusa mak ita bele deside ita-nian ema ne'e sala”, hatete nia:
Maske iha filmajen ne'e hatudu loos duni oknum ne'e nu’udar membru PNTL, maibé tenke liuhusi prosesu bele hatene ema ne'e sala ka la'e. (*)