Sekretáriu Estadu Protesaun Sivíl (SEPS), Joaquim Gusmão hatete, atividade validasaun planu ba dahuluk remata iha tinan 2021, kona-ba feto paz no seguransa nian, tanba ne’e iha tinan 2022 kontinua halo validasuan ba daruak nia, tanba iha ona ezbosu finál ida sei implementa iha tinan 2022.

“Atividade ohin halo validasaun ba planu asaun anual 1.325, daruak nia, kona-ba feto paz no seguransa, ita halo hotu tiha ona faze dahuluk, iha tinan kotuk, dadaun ne'e ita komesa hakerek nomós iha ona esbozu finál ida, ba planu asaun anuál 1325 nia, ne'ebé mak sei implemeta iha tinan 2022 to’o iha 2026”, dehan Joaquim hafoin partisipa atividade validasaun ba planu asaun annuál 1325 iha Timor Plaza, tersa (15/02).

SEPS liuhusi DNPKK hetan apoiu husi UNWomen hamutuk ho liña ministeriál no insituisaun Governu ne’ebé mak sai hanesan implementadór ba planu asaun anual 1325 kona-ba feto paz no seguransa iha ida-idak nia insitituisaun rasik.

Antes ne’e Ministériu Interiór (MI) liuhusi SEPS iha DNPKK mak responsável ba esbosu Planu Asaun Nasionál (PAN), ne’ebé antes ne’e halo ona konsultasaun iha munisípiu-sira, hodi dezenvolve no artikula planu.

Iha esbosu PAN ne’e kontinua prioritiza no reforsa igualdade jéneru, sensibilizasaun jéneru, lideransa, prevensaun konflitu no sira-seluk.

Tanba Timor-Leste nu’udar menbru husi Organizasaun Nasaun Unida (ONU) iha devér atu implementa planu asaun ba rezolusaun konsellu seguransa ONU 1325 ba feto paz no seguransa.

Nune’e implementasaun PAN ne’e suporta atividade-sira promove no garantia feto sira-nia partisipasaun iha pozisaun no prosesu ba foti no halo desizaun sira, inklui setór defeza no seguransa, hari’i paz no dezenvolvimentu. (*)