Vise Prezidente CNE, Domingos Barreto hatete, komandu Jerál PNTL realize atividade workshop ida ne’e envolve komandante PNTL Munisípiu sanulu-resin-rua inklui RAEOA, tanba CNE mós hola parte atu halo koopersaun di’ak hodi garante kampaña ho eleisaun Prezidensiál iha tinan 2022.
“Ita-nia PNTL konvida ha’u mai esplika ba sira kona-ba saida mak krime eleitorál, kona-ba hahalok sira ne’ebé sei akontese iha tempu kampaña, eleisaun no iha kontajen votu, tanba ne’e ha’u mai la’ós atu hanorin PNTL, maibé fahe esperiénsia hodi halo liña kordenasaun di’ak liután iha tempu kampaña ho eleisaun prezidensial nian”, esplika Domingos, iha Salaum Maubara Room, Timor Plaza, kuarta (16/02).
Ba krime eleitorál mak krime ida ne’ebé hakerek ona iha kódigu penál iha artigu 229 to’o iha 249 iha ne’eba sei regula hahalok ema sira ne’ebé hakarak impede ema seluk nia direitu iha tempu kampaña ho eleisaun prezidensiál nian.
“Ita halo kordenasaun servisu atu evita kazu hanesan sidadaun ida tenke vota dala ida, ema ida labele impede ema seluk nia direitu iha tempu voltasaun, tanba ne’e ema hotu iha direitu hanesan, maibé tenke kumpri ba regra durante iha eleisaun”, dehan nia.
Nune’e iha loron 02 fulan-Marsu tama ona kampaña eleitorál, tanba Tribunál Rekursu fó sai ona kandidatu admitidu atu konkore iha eleisaun prezidensiál.
Antes ne’e, Komandante Operasaun Nasional PNTL, Superintendente Xefe Pedro Belo hatete, orientasaun komandu jerál PNTL komisáriu Faustino da Costa ba komandu operasaun atu orienta komandante Munisípiu sanulu-resin-rua inklui RAEOA ho Unidade tolu tenke hetan formasaun kona-ba uza forsa hodi garante eleisaun prezidensiál ida tenke seguru no livre.
“Ami hahú halo preparasaun ba Komandu PNTL Munisípiu sira no Unidade tolu hahú halo ona preparasaun uza forsa atu garante sidadaun iha eleisaun prezidensiál ida seguru no livre”, dehan Pedro Belo.
Ho ida ne’e, parseiru Timor-leste Police Development program (TLPDP), apoiu formasun ba komandu PNTL durante loron rua ho Normas Organizasun Prosedimentu (NOP), foun oinsá polísia uza forsa garante eleisaun prezidensiál ho seguru. (*)
