Komandante Jerál PNTL, Komisáriu Faustino da Costa hatete, instituisaun PNTL prontu asegura atividade hotu, maibé hasoru dezafiu fasilidade transporte, tanba viatura sira ne’ebé dadaun ne’e iha apoiu husi Governu bazeia ba proposta Komandu Jerál PNTL nia.
“Ita-nia proposta husu karreta ba Governu apoiu mak hamutuk 36, maibé karreta sira ne’e la’ós foun, maibé uzadu ona, tanba ne’e Governu apoiu ba ita atu uza ba servisu atu garante kampaña iha eleisaun prezidensiál”, dehan Faustino, hafoin entrega karreta ba komandu PNTL Munisípiu iha Kuartel Jerál PNTL, Kaikoli, tersa (22/02).
Ba karreta hirak ne’e apoiu husi Ministériu Finansa husi Diresaun Nasionál Patrimóniu Estadu, hodi distribui ba komandu PNTL Munisipiu ida hetan rua no balun balun sei hetan tolu, haree ba área juridiku sira.
Maibé transporte hira ne’e utiliza durante iha kampaña to’o iha eleisaun remata sei entrega fali ba Governu, tanba ne’e PNTL sei la uza permanente karreta uzadu sira ne’e iha munisípiu.
“Kareta sira ne’e propriu duni ba ita atu uza, maibé ida ne’e impresta de’it, tanba uza sei la hela permanente ho ita-boot sira iha munisípiu, maibé ita uza de’it halo servisu hahú husi kampaña to’o tribunál rekursu anunsiu rezultadu eleisaun”, dehan nia.
Bainhira Komandu Jerál PNTL simu husi Patrimóniu Estadu marka ho liafuan Kareta Estadu, tanba ne'e atu evita karreta Estadu labele halo movimentu livre mak PNTL hetan apoiu husi parseiru federal Austrália hodi halo stiker taka ba kareta sira ho marka polísia.
“Ha’u husu ba komandu PNTL munisípiu sira uza karreta sira ne’e tenke ho kuidadu, tanba karreta sira ne’e komplete kedas ho dokumentu propriu, tanba ne’e kondutór sira tenke prense formuláriu tiket iha ida ne’e obrigatóriu, bainhira uza ba atividade seguransa ho urjente”, dehan nia.
Antes ne’e, Xefe Deparmemtu Administrasaun PNTL, Superintendente Xefe José Soares informa, Komandu Jerál PNTL, iha alternativa seluk mak komandu PNTL koloka ona orsamentu balun atu aluga karreta hamutuk unidade 32 no hetan apoiu mós husi Ministériu Finansas liuhusi Patrimoniu Estadu sei apoiu tan karreta unidade 36 hamutuk 68 viatura PNTL sei uza iha tempu kampaña ho eleisaun prezidensiál.
“Entaun iha 68 unidade viatura mak ita sei apoiu ba komandu Munisípiu sira, no iha munisípiu ida sei koloka karreta tolu”, dehan na.
Vise Ministru Interior, Antonio Armindo hatete, asuntu ne'e deputadu komisaun B ne’ebé trata asuntu defeza no seguransa konvida ona Vise Ministru Interior no Ministru Finansas hodi aprezenta planu ba kampaña no eleisaun prezidensiál iha fulan-marsu tinan 2022.
Nune'e Governu preve osan millaun $4 atu antesipa ba kampaña, ho eleisaun prezidensiál. Tanba ne’e Governu liuhusi Ministru Interior aprezenta ona planu hirak ne'e, no husu tan Ministáriu Finansas $1 millaun resin atubele ajuda ba suplementu iha membru sira ne’ebé koloka no ba mina ne’ebé atu kobre ba viatura sira ne’ebé aluga.
“Ita sei aluga 45 viatura, depois ita mós iha ita-nian karreta Governu nian ne’ebé mak durante ne'e la uza para distribui ba fatin sira ne’ebé mak ita persiza atu koloka ba”, informa nia.
Ba karreta ne’ebé mak Governu atu aluga apoiu ba servisu PNTL hodi halo servisu durante iha kampaña no eleisaun prezidensial to’o loron 30 nia laran de’it.
“Ita haree dala ruma ita-nian kampaña loron 15, mais ita antesipa nafatin ba kualker situasaun ne’ebé sei akontese, ita més antesipa ba segundu ronde nian hotu to’o iha remata eleisaun prezidensiál”, esplika nia.
Tanba ne’e, osan ne’ebé propoin hodi aluga karreta hamutuk rihun-$243, maibé entegra hamutuk iha millaun $4 ne’ebé mak propoin iha Orsamantu Jerál Estadu 2022. (*)
