Tempo Timor Online

Futuru Taekwondo Presija Dezenvolve



Tempo Timor: Federasaun Taekwondo Timor-Leste (FTTL) daudauk ne’e hala’o hela kompetisaun Taekwondo hodi buka atleta ne’ebé maka iha kapasidade ka skill di’ak hodi prepara ba tuir eventu internasional iha futuru oin mai.
Prezidente Federasaun Taekwondo, Angelo Neves hateten, eventu ne’e hanesan etapa preparasaun ida oinsa buka atleta jerasaun foun ne’ebe mak iha talentu di’ak kona ba taekwondo. “Hau espera katak iha futuru, atleta taekwondo preparadu ona atu kompete iha eventu internasional,” dehan Angelo bainhira hala’o diskursu iha eis GMT foin lalais.


Angelo haktuir, federasaun iha komitmentu boot atu fasilita no fo apoiu ba atleta sira, ne’e duni, husu ba atelta taekwondo tomak bele compete esportif no tenke hatudu ida – idak ninia kapasidade no espritu desportu ne’ebe ho kualidade.


Angelo rekonese katak, kada tinan numeru atleta taekwondo nian sempre aumenta ba bebeik, ne’e duni nia parte konvida atleta hotu-hotu atu hamutuk hodi dezenvolve di’ak liu tan federasaun taekwondo atu nune’e bele ba kompete iha rai liur.


“Ami Federasaun mesak labela halo buat ida. Ne’e duni, liu husi strutura foun federasaun taekwondo Timor-Lesta nian, ami husu ba Embaixador Korea, Koica no Governu Timor-Leste atu kolabora hamutuk ho federasaun hodi bele fó apoiu hodi dezenvolve taekwondo Timor-Lesta.”  Angelo argumenta. (**)

Publika iha Desportu



Tempo Timor Dili, – Tuir nota de imprensa ne;ebe fo sai husi Ministeiru Negósiu Estranjeiru no Koperasaun (MNEK) Timor-Leste informa Ministru Hernani Coelho halao hela vizita ofisial ba Portugal iha loron 30 Juñu – 04 Julhu 2015. Vizita ida ne’e sai nudar vizita ofisial daha’at, hafoin vizita ofisial ba Repúblika Indonezia iha fulan Abril, Australia no Nova Zelandia iha fulan Maiu 2015.

Iha loron 3 Julhu 2015, Ministru Hernani Coelho hasoru malu ho nian homologu, Ministru Estadu no Negósiu Estranjeiru Portugal, Rui Machete, iha edifisiu MNE Lisboa.

Sorumutu entre parte rua ne’e hodi diskute konabá kestaun hirak ne’ebé iha relasaun ho koperasaun entre Timor-Leste ho Portugal no sai mos nudar momentu ida atu fahe informasaun konabá dezenvolvimentu rai rua ne’e nian iha aspetu oin-oin.

“Enkontru ne’e aborda kestõens barak ne’ebé iha relasaun ho koperasaun entre Timor-Leste ho Portugal, kestaun judisial ho nian koperasaun teknika no nian aspetu estratejiku,” katak Hernani Coelho.

Ministru Hernani Coelho aproveita mos biban ne’ebá hodi hato’o ba nian homologu informasaun konabá programa no planu hosi estrutura VI Governu Konstitusional tuir vizaun no objetivu Planu Estratejiku Dezenvolvimentu Nasional 2011 - 2030. Alende ne’e, parte rua mos troka hanoin konabá servisu ne’ebé halao ona, atividade ne’ebé presija hadia no programa foun ne’ebé Timor-Leste ho Portugal possivelmente presija hare hamutuk hodi lao ba oin. Assuntu CPLP, avaliasaun konabá situasaun iha rejiaun Europa, Azia, liu-liu konabá prosesu adezaun Timor-Leste nian ba ASEAN no mos organizasaun sira seluk ne’ebé Timor-Leste prepara atu adere ba, sai mos nudar topiku diskusaun iha sorumutu entre Ministru Hernani Coelho ho Ministru Rui Machete.

Iha sorumutu ne’e, Ministru Rui Machete hato’o mos sira nian preokupasaun konabá implementasaun vistu ne’ebé Timor-Leste foin assina ho Uniaun Europeia ke iha implikasaun ba akordu vistu espesial ba sidadaun Portugal, ne’ebé mak eziste ona entre Timor-Leste ho Portugal. Hatan ba kestaun ne’e, Ministru Hernani Coelho hato’o katak antes atu assina akordu izensaun vistu ne’e, Timor-Leste mos estuda tiha ona konsekuensia konabá implementasaun ba akordu refere, liu-liu nian impaktu ba sidadaun Portugueza. Ministru Hernani hatutan katak Ministériu Interior iha ona preparasaun ida hodi responde ba kestaun sira ne’ebé sei mosu, relasiona ho konsekuensia hosi assina akordu izensaun vistu ho Uniaun Europeia.


Iha oportunidade ne’e, Ministru Hernani mos foti kestaun konabá akordu kuadru koperasaun ne’ebé Timor-Leste ho Portugal assina iha tinan 2002 no públika iha Jornal Diariu Republika iha Portugal iha 2004. Ministru Hernani husu ba nian homologu atu hare hikas fali akordu refere atu nune’e, bele responde ba realidade ne’ebé iha.

Hatan ba kestaun ne’e, Ministru Rui Machete hato’o katak Portugal mos iha interese bo’ot atu hare hikas fali akordu ne’e, hodi halo ajustamentu no halo atualizasaun ba akordu refere. Em prinsipiu, parte rua aseita ona no hein katak iha tempu badak tekniku sira bele estuda fali akordu ne’e atu nune’e bele hare proposta revizaun ba akordu refere.

Ikus liu, Ministru na’in rua koalia mos konabá akordu entre instituisaun diplomatika Portugal ho instituisaun diplomatika MNEK Timor-Leste, ne’ebé hare’e liu ba koperasaun teknika, sientifika no eventuais. 

Iha loron hanesan Ministru Hernani Coelho ho komitiva hasoru malu mos ho Prokuradora Jeral Portugal, Joana Marques Vidal. Iha sorumutu ne’e, parte rua koalia mos konabá assuntu judisial no justisa tamba assuntu rua ne’e iha ligasaun ba malu.

Prokuradora Jeral Joana hato’o katak sira prontu atu kopera ho Timor-Leste iha aspetu ne’ebé nessesariu hanesan apoiu tekniku, formasaun no estajiu no mos iha area seluk tan ne’ebé Timor-Leste presija. Maibé kondisaun ida para atu hahu fali koperasaun iha area hirak ne’e, parte rua tenke reativa hikas fali programa judisial atu nune’e fo dalan ba atividade sira seluk nian lalaok ba oin.

Ministru Hernani Coelho afirma katak Timor-Leste sei hare ida ne’e no Governu Timor-Leste iha empeñu no kompromisu atu hare ba oin.

“Buat ne’ebé liu-liu ona no ita presija hare ba oin atu nune’e, koperasaun ne’e bele sai diak liu tan, sustentavel no fo benefisiu ba rai rua ne’e,” katak Hernani Coelho.

Entertantu, iha loron 02 Julhu 2015, Ministru Hernani Coelho vizita mos sede CPLP no hasoru malu ho Embaixador sira hosi Estadu Membru CPLP nian, ne’ebé lidera hosi Sekretáriu Ezekutivu, Embaixador Murade Murargy.

Embaixador Murade hato’o agradesimentu ba apoiu tomak ne’ebé Governu Timor-Leste hato ona durante ne’e, ba Estadu membru CPLP, liu-liu ba Guiné-Bissau.

Iha biban ne’e, Ministru Hernani Coelho informa Embaixador sira hosi Estadu Membru CPLP konabá servisu ne’ebé Timor-Leste kumpri ona, halao hela no sei halao durante assume prezidensia rotativa CPLP to 2016, tuir rezolusaun ne’ebé hasai ona hosi Chefe Estadu no Governu sira iha tinan 2014, iha Dili. Ministru Hernani mos hato’o konabá preparasaun ne’ebé Timor-Leste halo dadaun relasiona ho enkontru Konselhu Ministrus CPLP ne’ebé tuir planu sei halao iha fulan Julhu nian laran, iha Dili.

Embaixador sira hosi Estadu membru CPLP hato’o agradesimentu bá Timor-Leste nian esforsu tomak durante ne’e no hato’o mos hanoin balun konabá assuntu importante hirak ne’ebé presija atu koloka iha ajenda hodi diskuti iha reuniaun preparatoria no mos reuniaun Konselhu Ministru sira nian iha Dili.

Iha loron hanesan, Ministru Hernani Coelho hasoru malu mos ho Ministra Justisa Portugal, Paula Teixeira Cruz.

Iha oportunidade ne’e, Ministru reiteira fali Timor-Leste nian interese atu kopera nafatin ho instituisaun judisial iha Portugal no nessesidade atu halao akordu ne’ebé iha ona entre Timor-Leste ho Portugal, liu-liu iha area justisa, ne’ebé permite profesionais hosi Portugal mai iha Timor-Leste, nune’e mos Timor oan sira ne’ebé ba halo formasaun ka interkambiu iha Portugal.

“Ita hatene kazu ne’ebé akontese iha tinan kotuk. Ne’e duni, vizita ida ne’e, importante para hato ba Portugal konabá kompromisu dispozisaun no hanoin ne’ebé Timor-Leste iha ba oin,” dehan Ministru Hernani Coelho.

Hatan ba kestaun ne’e, Ministra Paula Teixeira Cruz simu hanoin hirak ne’e no hein katak iha tempu badak akordu ne’e bele finaliza, atu nune’e, bele reativa fali koperasaun iha area judisial entre Timor-Leste ho Portugal.

Iha loron hanesan, Ministru Hernani Coelho hamutuk ho komitiva hasoru malu mos ho Prezidente Konselhu Superior Majistura Portugal nian, Antonio Silva Henrique Gaspar.

“Objetivu hosi enkontru ho Prezidente Konselhu Superior Majistura Portugal nian ne’e, hodi koalia konabá assuntu ne’ebé relasiona ho aspetu tekniku no politiku entre Timor-Leste ho Portugal iha area justisa nian,” katak Hernani Coelho.

Parte rua koalia mos konabá akontesimentu iha tinan kotuk no mos medida sira oinsa atu bele reativa fali koperasaun ne’ebé uluk iha ona. Responde ba ida ne’e, hosi instituisaun Magislatura nian hato’o katak iha mos interese ne’ebé diak atu servisu hamutuk ho Timor-Leste iha futuru. Parte Magislatura mos afirma katak ho prezensa Ministru Hernani Coelho nian hatudu Timor-Leste nian komitimentu atu hametin liu tan koperasaun iha area justisa no hatutan katak importante mak governante rai rua nian bele kontinua servisu hamutuk atu hametin liu tan koperasaun entre Timor-Leste ho Portugal.  

Vizita Ofisial hosi Ministru Negósiu Estranjeiru no Koperasaun Timor-Leste, Hernani Coelho, hakotu ho partisipasaun iha seremonia transladasaun restu mortais jogador Portugal nian, Eusébio da Silva Ferreira ba iha Panteaun Nasional. 

Publika iha Nasional

Telkomcel Akan Bersinar di Bumi Loro Sa'e

Tempo Timor - Kepala Marketing Communication Manager Telkomcel, Lintong  Simaremare mengatakan,  staff  local Telkomcel di Timor-Leste saat ini proporsinya sudah mencapai 80%, jadi hanya 20% yang bukan staff lokal.


Dari komposisi tersebut ada pegawai local yang posisinya sebagai senior account manager, atau setinkat manager. Harapan kita bagaimana teman–teman local dapat memahami proses kerja Telkomcel dengan cepat sehingga saat memindakan kekuasaan setidaknya mereka sudah siap.

Publika iha Ekonomia



RENETIL: Husi Relativismo ba “Consciência da Determinação Histórica” 

Martinho G. da Silva Gusmão
Docente Filosofia Política
ISFIT Dom Jaime Garcia Goulart, Dili


Husi 2007 to’o 2012, Fernando La’ Sama de Araújo mak sai hanesan Presidente do Parlamento Nacional. Iha 2008, Deputado/a sira husi bancada FRETILIN – Domingos M. Sarmento; Francisco M. Branco; Maria M. dos Reis e Costa; José M. da Silva Fernandes; Estanislau C.A.M da Silva; Inácio F. Moreira; David A. Ximenes; Josefa A. P. Soares, José A. F. Teixeira; Aniceto G. Lopes; Antoninho Bianco; António C. C. Machado no Joaquim dos Santos – husu ba Tribunal de Recurso atu bele halo parecer da inconstitucionalidade hasoru Lei 6/ 2008 – Regime Jurídico do Financiamento dos Partidos Políticos. Iha alegação ida hasoru PN, sira hakerek nune’e, “Teremos nós de pedir a uma criança da escola primária, que nos nos faça as contas para que constatemos que a divisão de 50% da subvenção em partes iguais por todos os partidos políticos representados no Parlamento Nacional, como representação tão como 21 deputados, na bancada minoritária e 2, 3 ou 6 deputados nas bancadas da maioria, viola o sistema proporcional?” (Cf., Proc. 01/2008/TR, Dili, 28 de Julho de 2008). Liafuan hirak ne’e hakerek ba TR nu’udar documento oficial ho norma jurídico folin aas tebes: husu fiscalização da constitucionalidade. Ida ne’e acto solene ida. Maski nune’e, Deputado/a sira husi FRETILIN hakerek no alega PN atu di’ak liu lalika halo-an hanesan labarik ki’ik sira iha escola primaria nebe fohin mak hahu hatene sura matemática. Nu’udar Comissário iha Comissão Nacional de Eleições (CNE), ha’u le documento ne’e ... laran makili fali!

Wainhira iha entrevista ida, Timor Post hatun ha’u nia liafuan “di’ak liu fila ba ensino básico”, Deputado Eládio Faculto foti problema, ha’u sente estranho (aneh) fali. Se linguagem hanesan ne’e baibain ona iha FRETILIN nia let, tan sa mak Deputado ida husi partido ida ne’e halo reação violento hanesan ne’e? Husi biban seluk, liafuan hirak nebe ha’u hasai atu hatan ba jornalista nebe husu ba ha’u kona ba livro Carlos da Silva L.F.R Saky hakerek “RENETIL Iha Luta Libertasaun Timor-Lorosa’e. Antes Sem Titulo, Do Que Sem Pátria!” (sei habadak ho RENETIL, 2013). Dehan katak, deputado/a sira husu atu “congela” (“congelamento” = pembekukan) tiha livro ida ne’e. Ha’u hakfodak. Tan iha Lei-Inan dehan, “O exercício da liberdade de expressão e de informação não pode ser limitado por qualquer tipo de censura” (artigo 40o n. 2). Congelamento ne’e hanesan mos censura ida nebe at los hanesan ditadarua nia hahalok. Oinsa mak Deputado/a sira brani tebes atu hakat liu Lei-Inan? Se, livro ne’e viola principio “... respeito pela dignidade da pessoa humana” (CR artigo 1o), tan sa mak la lori ba processo civil ka processo penal? Tan ne’e lori liafuan FRETILIN nian karik ha’u mos dehan, “Teremos nós de pedir a uma criança da escola primária, ...” atu lori hanorin ita konaba Lei-Inan no lei-oan sira?

Deputado Francisco da Costa Araújo (CNRT) mai rasik iha Manatuto (11 de Junho de 2015) hodi halo explicação badak. Nia hato’o ninia discordia, “Maun Amo, ha’u mos la setuju ho Amo nia liafuan ... desculpa”. Maibe, nia mos hato’o aspecto seluk, “... ha’u la taka matan ba Amo nia ain-fatin iha clandestina Baucau, liu-liu 1999”. Ba ha’u, Deputado Francisco hatudu nia posição honesto no sincero atu contra ha’u nia liafuan, maibe, liu-liu ninia defesa maka’as ba papel intelectual sira nian. Ha’u hanoin hetan liafuan balun, “Numa sociedade arcaica e sem elite, quer burguesa quer intelectual, ‘em que a esmagadora maioria é analfabeta ... a sua capacidade de revolucionaria não podia evidentemente ser grande” (Dr. Paulo Pires, TIMOR: 23). Los duni, iha 1975 ita halo revolução maibe namtate mak barak wainhira quadro dirigente sira mate mohu, balun halai ba rai liur no lakon liderança. Maibe, liu tiha tempo naruk ida foinsae balun hahu halo processo evolução no involução iha luta nia laran. Prefácio nebe Dom Carlos F.X. Belo SDB hakerek (RENETIL: ix) no Prof. António Barbedo de Magalhães hakerek (RENETIL: xiv), hatudu duni processo ida ne’e. Bele dehan, papel intelectual nian hanesan mensagem São João Paulo II nia liafuan, “imi masin rai nian ... imi naroman mundo nian” (Taci-tolu, 12 Outubro 1989). Nu’udar masin, intelectual sira conserva luta hasoru “brain washing” (fase kakutak) brutal husi militar indonésio nian. Nu’udar naroman, intelectual sira “orienta luta” liu husi dalan foun no pensamento critico no criativo.

Ba ha’u, hakerek obra mahar hanesan (livro) RENETIL hatudu duni oinsa mak papel intelectual mos forte iha momento nebe difícil tebes no todan. La’os de’it frente clandestina. La’os de’it frente Armada. La’os de’it frente diplomacia. Intelectual, hanesan mos papel Bispo no Padre sira hanesan “masin” no “naroman” ba luta nian. Maski seidauk iha medalha ba intelectual sira. La iha pensão vitalícia ka lei konaba veterano/ eis combatentes. Ate, hetan ataque husi PN. Maibe, Carlos Saky luta nafatin liu husi aspecto intelectual. Ha’u iha experiencia aat ida wainhira sai Comissário iha CNE, hau hakerek artigo 20 resin no livro 4, inclui palestra iha rai liur no rai laran. Maibe, iha comissário ida ka rua mak despreza hau nia obra hodi dehan, “lalika hatudu o nia intelectual iha ne’e, ema dasa rai mos intelectual”. Ne’e duni, wainhira Presidente da República Taur Matan Ruak hakarak nomeia fali atan ha’u ba Comissário, ho delicadeza tomak ha’u labele simu – tan, ha’u la hakarak serviço ho “intelectual dasa rai” sira nebe re-eleito nafatin iha CNE. Hotu-hotu iha dignidade hanesan; maibe la’os hotu-hotu iha qualidade hanesan. Ba ha’u, compara intelectual ho dasa-rai ne’e hanesan humilhação ba ema sira nebe serviço iha lu-ron ninin hamos jardim no cidade, ho honestidade ...

Carlos Saky iha coragem atu hari’i “monumento” foun ida ba RENETIL liu husi ninia livro. Baibain, hakerek livro história ida, autor sempre hare husi sikun “factum” no “facientes”. Liafuan “Factum” katak saída mak nia hakerek ne’e mai husi documento no testemunho barak nebe iha tiha ona. Husi biban seluk, “facientes” katak Saky formula ka hakerek tuir lógica ida nebe nia hatene  no la’o tuir. Maibe, ho dalan ida ne’e, Saky bele monu iha “the genetic fallacy”. Ne’e katak, Saky hamrik iha risco ida nia oin: buat nebe nia haktuir iha RENETIL, balun bele los balun bele sala.

Maibe, Carlos Saky la pretende atu hakerek dogmatismo histórico ida. Matenek na’in sira la iha ida mak aceita história nu’udar “dogma” – doutrina fiar nian nebe la muda ona. Tan ne’e reação husi Deputado/a sira iha PN ne’e tristeza bo’ot ida ba Timor Leste. Saida mak mosu iha PN halo ha’u hanoin hikas wainhira iha Italia, 2004, mosu debate entre Presidente de Senato (Presidente do Senado), Prof. Marcelo Pera (professor filosofia política iha Universidade Pisa) hasoru Cardeal Joseph A. Ratzinger (Perfeito da Congregação da Doutrina de Fé). Ha’u mos tuir conferencia ne’e iha Universidade Pontifícia Laternense, Roma. Ikus mai mosu livro ida, Marcello Pera & Joseph Ratzinger, Senza Radici. Europa, Relativismo, Cristianesimo, Islam (Milano VII, 2005). Maski ida “ateu” no ida seluk “religioso”, maibe sira na’in rua to’o iha conclusão katak político na’in sira hakarak halo “Estado laico” maibe sira hatudu hahalok ho forma dogmática no arrogante liu husi “ideologia laicista” ida. Nune’e, política ohin loron hatudu forma foun ida, hanaran “a ditadura do relativismo” (a dictatorship of relativism). Tuir Cardeal Ratzinger, “Enquanto o relativismo, isto é, deixar-se levar "aqui e além por qualquer vento de doutrina", aparece como a única atitude à altura dos tempos hodiernos. Vai-se constituindo uma ditadura do relativismo que nada reconhece como definitivo e que deixa como última medida apenas o próprio eu e as suas vontades” (Santa Missa “Pro Eligendo Romano Pontifice, 18 de Abril de 2005).

*****
Ba ha’u, halo congelamento ba livro RENETIL to’o hamrik atu baku malu ne’e mai husi hahalok “ditadura do relativismo”. Ema sira nebe tur iha PN hanoin katak “critério da verdade” ne’e mai husi político sira. Professor Pera despreza ukun na’in sira nebe hatudu forma dogmática no arrogante husi “ideologia laicista” – katak, los ka sala labele depende ba intelectual ka padre sira, halakon tiha Verdade Absoluta husi Maromak, no lori sira nia ideologia política nu’udar sasukat. Tan ne’e, nia dehan Europa ohin loron la iha ona hun no abut (senza radici), moris namlele no la iha ona mahan ba Europeu sira. Ha’u hanoin, alarme husi professor Pera iha folin mos ba ita iha Timor Leste. Oinsa mak professor Pera aborda ditadura do relativismo ne’e? Ha’u koko atu habadak ...

Ida uluk (I), nia dehan “Il relativismo dei contestualisti” – katak, wainhira ita haksesuk malu konaba se mak los liu, se mak kleuk liu, ikus mai ita to’o iha situação ida: ida-idak ko’alia tuir ninia “comunidade” (grupismo político). Wainhira grupo A no grupo B haksesuk malu, la iha sasukat “inter” – katak, iha A no B nia let ida-idak lao tuir nia hanoin, no la hasoru malu ona iha ponto comum ida. La iha mos “meta” ba A ho B, katak sira kaer metin de’it sira nia hanoin no hakarak, depois lakohi hakat hamutuk ba horizonte nebe luan liu no klean liu. Nune’e, A ho B iha de’it sasukat “infra” (uma laran): ida be ninian de’it mak los liu, ema seluk nian sala hotu. Maibe, oinsa mak sai husi uma hodi hasoru ema seluk nia “verdade”? Resposta: depende ba contesto. Atu sai concreto liu – ita husu se “Mau Hudo Ran Kadalak ne’e herói ka traidor” ne’e depende ba Carlos Saky nia livro ka Nino Konis Santana nia carta ba Xanana Gusmão iha Cipinang ka Eládio Faculto nia liafuan iha PN ka comentário Pe. Martinho Gusmão nian iha jornal? La iha ona sasukat atu hatudu se nian mak los, maibe se nian mak “migliore” (melhor; di’ak liu). Tuir Prof. Pera nia liafuan, (1) “migliore ... significato”, wainhira grupo A bele resiste husi critica ka objeção husi grupo B – la’os tan hakerek livro seluk atu contra maibe lori força política (= ditadura?) atu halakon ka ameasa intelectual sira. Iha ne’e la’os “power of logic” (lori ulun malirin atu hanoin didi’ak ninia lógica), maibe “logic of power” (ameasa no hamrik atu baku malu). Ne’e duni, buat nebe iha significado di’ak mak ida nebe brani hamrik atu baku malu! Que dispara. Tuir mai (2) “migliore epistemicamente” wainhira ema bele hatudu se mak hatene barak liu ka di’ak liu sira seluk. Hakerek livro mahar, hatudu iis naruk no hanoin klean atu hatudu memoria iha passado. Ne’e hatene barak! Maibe, atu hatene di’ak liu, mosu wainhira ita iha coragem atu hasoru critica husi fatin seluk. Hela aat, wainhira político sira tama klaran hodi muturabu fali. Ida ne’e mak halakon gosto no “prazer do pensar” – halo ita baruk tiha de’it! Relativismo nia tentação mak hakarak duni atu hamaten gosto ida ne’e hodi halo baruk ema atu hanoin naruk no klean. Ida tan, (3) “migliore assiologicamente” wainhira hatudu se mak defende valor ukun-rasik-an hodi luta maka’as liu no se mak la luta. Hau conta história ida ba Deputado Eládio Faculto – wainhira ha’u sei sai Comissário iha CNE, ha’u ba halo visita oficial ida iha Komisi Pemilihan Uumum (KPU) iha Jakarta ho Com. Arif Abdullah Sagran (representante Islam iha CNE). Ha’u nia laran dodok no moe bo’ot, wainhira Arief Sagran hateten iha Komisaris KPU sira nia oin katak nia moe no fuan moras tan mai Jakarta lori fali passaporte Timor Leste nian (Sagran nia liafuan hau sei hanoin, “saya itu sudah 17 tahun di Jakarta punya rumah di sini, sekarang datang di rumah sendiri harus pakai passport rasanya sakiiit!”). Nia ko’alia ida ne’e ho lian grosso – maski ami na’in 2 representa CNE iha visita oficial nian (acompanha husi Secretário Embaixada RDTL, Crisogno de Araújo). Maibe, to’o ikus, Arief Sagran saí “único candidato” husi FRETILIN nian atu tama hikas iha CNE. Ha’u nia belun lubuk ida FRETILIN iha Baucau no Viqueque, hau husu ba sira “La iha tan ema seluk iha FRETILIN mak di’ak liu nia?” Ninia resposta claro: “axiológico” FRETILIN la depende ona ba norma no valor partido histórico ne’e rasik, maibe depende ba se mak ukun no se mak manda iha FRETILIN. Lori de’it FRETILIN nia naran, ema hirak nebe la luta ba ukun-an (ate sei fuan kanek tan ita ukun rasik an) mos bele sai herói loron mean. Hau hili se Carlos Saky hakerek sala no ita sei bele haksesuk malu, do que Arif Sagran nebe iha oin defende FRETILIN, maibe iha kotuk sei joga foer atu hametin grupo oan ida nia interesse. FRETILIN sofre demais ona ho “migliore assiologicamente” ida ne’e. Ikus liu, (4) “migliore politicamente” wainhira ita hanoin katak Deputado/a FRETILIN sira mak iha liu dignidade oficioso atu hateten PN hanesan “uma criança da escola primaria”, maibe se Pe. Martinho Gusmão mak halo comentário  hanesan ne’e, então rai naben no tsunami político sae kedas! Prof. Pera nia liafuan: “Questo relativismo ha cosi tanto apetito per i fondamento delle altre dottrine che, alla fine, mangiato tutto, diventa autofagito e inghiotte se medesimo”. Atu dehan “relativismo ida ne’e (político sira nian) hanesan kan-ten bo’ot sira nebe hakarak tolan tomak ema seluk nia fundamento fiar nian, to’o ikus mai, han mohu, tetak no fai rahun nia an rasik”. Ha’u rona husi ibun seluk, katak, Deputado/a sira insulta ha’u no Carlos Saky ho “tanto apetito” (membabi buta) – hanesan atu tolan tomak de’it ami.

Tuir mai (II), “Il relativismo dei deconstruttivisti” (liu-liu filosofo Jacques Derrida) – katak, ita ko’alia ka hakerek hodi sobu-rahun (demolição; ka desconstrução) ema seluk nia opinião original hodi lori fila ba fatin seluk.  La tuir buat nebe ema/ autor hakarak hato’o! To’o ponto ida, bele hamrik atu baku malu. Ida ne’e hanaran “desconstrucionismo violento”, la’os de’it ba texto ida, maibe mos contexto no pre-texto. Ha’u hanoin, reação nebe Deputado Eladio Faculto hatudu, fou-foun mai husi violência textual ida wainhira nia hasai de’it frase balun husi Carlos Saky nia livro konaba “Mau Hudo Ran Kadalak” no manobra ida ne’e hodi sai fali texto integral ida. Maibe, ita hare didi’ak karik, Saky  nia afirmação furak tebes no emblemático, “... iha faktu ida, Hodu Ran Kadalak mate iha militar Indonezia ho milisia sira pro-autonomia nia liman. Ida ne’e hatudu katak Hodu la husik hela luta ba ukun-rasik-an” (RENETIL: 84). Iha ne’e ita hare katak Carlos Saky no Eládio Faculto ninia contexto leitura mak la hanesan. Sai confusão wainhira, Deputado Francisco (CNRT) lori tama fali “pre-texto” konaba Pe. Martinho Gusmão nia luta iha Baucau, no oituan iha Malang (Carlos Saky, RENETIL: 136). Wainhira “pre-texto” no “contexto” kotu ka “la nyambung”, ikus mai hamosu violência textual. Ninia resultado, ita halakon tolerância atu hato’o opinião maibe impõe lia-los ho violência. Tan ne’e, wainhira halo missa reconciliação iha Manatuto, iha presença Presidente da República nian oin, Bispo Baucau no Administrador Apostólico Dili (Presidente Conferencia Episcopal Timorense) ho Núncio Apostólico representa Vaticano, ha’u hato’o Desculpa iha publico ba Parlamento Nacional (especial ba Deputado Francisco da Costa Araujo nebe defende atan ha’u). Ha’u hanoin hikas Prof. Pera nia liafuan konaba “la decostruzione della democrazia”. Nia dehan, totalitarismo no nazismo mos bele to’o iha poder liu husi dinâmica eleitoral husi ponto de vista formal, normal no democrático. Maibe, nia hatur pergunta complicado no delicado tebes, dehan: “Una democrazia deve forse lasciare in libertà e nella posizione di esercitare il potere coloro che potrebbero attentare alle libertà democratiche e mettere fine alla libertà democratica in mome della democracia e della maggioranza dei consensi che potrebbero in effeti raccogliere?” (Senza Radici: 19). Iha democracia ita hili ema balun atu kaer no halao ukun sira (esercitare il potere). Los! Maibe, hili tiha sira, sira bele koko atu halakon tiha liberdade democratica hodi democracia nia naran? Ah, agora mak confusão! Maski lori “majoritária” nia naran hodi bele hetan kbiit ne’e? Hau hanoin, Lei-Inan Timor Leste ko’alia barak liu konaba participação democrática – katak, maski ita hili ona ema balun hodi sai Deputado/a, maibe la significa eleitor sira tur patarata iha uma hein fula-fulan simu hahan no osan hodi hein mate. Lae! Ita nia Lei-Inan ko’alia konaba “cultura democrática” – wainhira valor intelectual no espiritual mos hetan fatin atu haburas Nação. PN la’os escola ka kampus. PN la’os Igreja ka Mesquita. Ne’e duni, hakerek livro no halo debate intelectual ne’e tenki sai “zona especial” ida no região autónomo ida. Maski nune’e, ita mos tenki agradece ba Eládio Faculto, tan hodi ninia reação mak ita bele hatene katak iha “fatti fuori-testo” nebe bolu nafatin ita nia atenção. Liu-liu ba Carlos Saky. Ha’u sei fila ba assunto ida ne’e iha kraik mai.

Ikus liu (III), “Il relativismo dei teologi” – ida ne’e mak Cardeal Joseph Ratzinger (Papa Bento XVI) dehan, “il relativismo in certo qual modo è diventato la vera e própria religione dell’uomo moderno” (= dehan lolos karik relativismo sai los tiha ona religião própria ba ema moderno sira). Papa Francisco husu ba Igreja Catolica iha Timor Leste atu sai “consciência critica da nação”. Nia hatudu katak, maski ohin loron ema hakarak halakon Igreja Catolica nia mensagem ba justiça, paz no integridade da criação, maibe sarani sira labele hakiduk no subar. Agora ha’u hatur pergunta ba Carlos Saky – Se ita boot mak hakerek konaba religião Islam no Arabe hanesan saída mak ita bo’ot hakerek konaba Vaticano, Nuncio Apostolico Mgr. Francesco Canalini (ka, Mgr. Pablo Puente) no Igreja Catolica (RENETIL: 120-122), saída mak mosu? Hakerek konaba OJECTIL, oinsa mak reação husi juventude católica sira? Maibe, la iha ema católico ruma mak halo ação violento hasoru Carlos Saky! Se Timor Leste ne’e mak Islam nakonu, no FRETILIN mak Islam – hau fiar katak Carlos Saky sai tiha ona “calderada” hanesan Taliban, Mujahidin ka ISIS nia hahalok. Maibe, lae! No fundo, maski FRETILIN ne’e moris naruk tan Igreja Católica ninia serviço (liu-liu, religiosidade husi Francisco Xavier do Amaral; Nicolau Lobato, no líder lubuk ida tan), maibe, husik nafatin espaço ba “Estado laico” no respeito nafatin “comunidade política” nia autonomia. Maibe, confusão hahu mosu wainhira Deputado/a sira nebe hakarak “laicidade” husi Estado, hatudu fali forma dogmática no arrogante husi “ideologia laicista”. Katak saída? Ideologia laicista katak pensamento brutal ida hodi elimina Igreja (no confissões religiosa seluk?); nega mata-matak Bispo no Padre sira, Igreja Catolica nia involvimento político. Maski Lei-Inan reconhece no valoriza Igreja Catolica nia luta ba libertação (Prembulo & artigo 11o no. 2), maibe Deputado/a sira – tan la gosta Bispo no Padre – hateten katak labele halo política. Pior, hanoin katak “comunidade política” ninia knar bele tama hotu iha “comunidade académica”. Tan ne’e mak ha’u dehan, sai Deputado/a ka Ministro/a la’os sai professor catedrático nebe bele “halo ona lalehan no rai, no buat hotu ema hare no mos la hare”. Dala barak ideologia laicista ne’e hanesan maoismo ho ninia slogan dehan “politicamente correta” (political correctness), katak, lia los ka legitimidade no legalidade ne’e iha wainhira partido político ida (FRETILIN?) mak ko’alia. Ema seluk mak ko’alia ne’e rai bele naben, tsunami bele sae! Nune’e, partido (líder partido) sai ona hanesan sasukat ba verdade no Verdade. La iha dialogo. La iha tolerância.

*****

Ha’u koko le Carlos Saky nia livro RENETIL atu bele halo recensão badak ida ne’e. Livro ida ne’e hatudu autobiografia ida. Hakerek-na’in la’os de’it hatur história nu’udar “factum”, maibe mos “facientes”; la’os de’it “patos” (luta tan hare terus no mukit) ida, maibe mos “ethos” (imperativo atu hasai moris husi terus no mukit) ida; la’os de’it “objecto” maibe mos “sujeito” ba lala’ok tomak iha RENETIL nia laran. Livro ne’e nia folin hatudu iha filosofia “Wirkungsgeschilichliches Bewuβtsein” (al.) – consciência da determinação histórica (kesadaran yang berdaya menyejarah). Katak “o que vivemos hoje não era memoria da história passada mas realmente vivendo-se uma consciência que é, e ao mesmo tempo que se sabe, exposta aos efeitos da história” (cf., Martinho Gusmão, Hans-Georg Gadamer, 2013: 250). Ho liafuan hirak ne’e ha’u defende Carlos Saky atu resiste hasoru “terror político” nebe hakarak fase-kakutak (brain washing) husi partido bo’ot sira (FRETILIN balun no CNRT balun). Saky la hakerek livro tan gosto atu halo nostalgia. Nia hakerek livro hodi fo efeito histórico ba nation building ida katak Timor Leste nebe ohin loron ita moris ba ... Timor Leste nebe ohin loron moris nu’udar Nação ukun-rasik-an la monu tun mai husi kalohan leten, maibe mai husi rai, mai husi ema barak nia kolen; mai husi grupo oi-oin hodi forma identidade nacional ida. Ida ne’e mak ita tenki consciente. La iha ona luta unilateral, maibe multilateral.

Tuir ha’u nia hare, livro ida ne’e hariku liu tan ita nia  literatura konaba autor histórico sira, hanesan mos Biografia Dom Carlos Filipe Ximenes Belo, SDB (1999); Biografia Dom Martinho da Costa Lopes (2000); autobiografia Kay Rala Xanana Gusmão (2000); Mario Viegas Carrascalão (2005); Franciso Xavier Lopes da Cruz (1999); no agora Carlos da Silva L.F.R. Saky. Iha mos livro balun nebe hatudu palestra/ pensamento balun husi José Manuel Ramos Horta, Mari Alkatiri no Taur Matan Ruak. Ita sei falta “suporta” husi político sira atu hakerek konaba Nicolau Lobato no Francisco Xavier do Amaral. Infelizmente, sira na’in 2 mate no la husik hela lia menon ruma. Buat nebe mak ita bele halo mak “reconstrução hermenêutico” ida atu hare efeito histórico.

Lamentável tebes, wainhira ita hasai osan barak ba ema liur – hanesan Max Stahl no fundação seluk – hodi hakerek livro ka halo documentação oi-oin. Ate, livro história konaba Timor Leste mos ita husik ba ema Indonesia mak hakerek. Tinan 2 ka 3 liu ba, ha’u le livro ida iha loja livro nian ida, katak, “integrasi Timor Timur adalah kehendak rakyat sendiri, bukan paksaan dari Indonesia”. Wainhira ita nia ema rasik hakerek no halo reconstrução konaba história, ita nia político sira mak sarkele malu fali. Hau sente de’it buat ida – “moe bo’ot”. Memalukan. Vergonhosa. Hotu tiha, líder katuas sira ko’alia konaba “sarjana supermi”, “sarjana kualidade la iha” no ikus mai “transformação ba geração foun”.

Se ita le livro Saky nian ho fuan laran tomak no néon matenek, ita bele sente kedas oinsa mak “foinsae sira” sai hanesan avant-garde (vanguarda) atu lori inovação no “experimental” wainhira ita nia política no militar labele ona suporta revolução. RENETIL, FECLITIL, OJECTIL (OJC-TL), OPJLATIL, no OPJT hatudu duni evolução no involução iha luta ba independência. RENETIL hakerek ona ninia versão. Ita hein tan FECLITIL, OJECTIL, OPJLATIL no OPJT ... hodi hatudu katak foinsae sira mak hatudu duni utopia fundamental hodi hadau dignidade foun.

Ho teoria husi “Evolução” hatudu katak foinsae sira lori idealismo ho sira nia simplicidade hodi haksoit tama iha arena da luta nebe complexo. Saky bele duni hatudu oinsa mak “rungu-ranga” no “desobediência” barak, to’o traição no ikus mai reconciliação la’o nafatin ... inclui mata-wen no lian halerik barak. Saky hatudu momos pluriformidade no pluralidade iha luta nia laran. Maski ideia única “ukun-rasik-an”, maibe linguagem no aplicabilidade hasoru método oi-oin, dalan oi-oin.

Iha 1997, ha’u hakerek livro ida ho titulo “Menantikan Lorosae” (Seminari Tinggi Giovanni XXIII, Malang) hamutuk ho Padre Jovito do Rego de Araújo; Padre Mouzinho P. Lopes; Padre Marçal D. Ximenes; no Padre Germano Filipe Gusmão. Tuir mai, ha’u publica tan livro ida “Timor Lorosa’e: Perjalanan Menuju Dekolonisasi Hatidiri” (2003). Livro sira ne’e hakarak hatudu oinsa mak Igreja Católica sustenta luta ba libertação liu husi “locus teologicus” foun ida – fo esperança ba ema sira nebe la’o iha nakukun sira tanis, ba ema sira nebe la’o iha rai fuik maran sira halerik. Aliás, frater sira koko atu introduz teologia da libertação iha contexto Timor Lorosa’e nian. Livro ne’e lansa tiha, ha’u hetan kedas “teguran” husi Afonso Aleixo – “Frater, RENETIL ne’e la’os FRETILIN nia oan de’it, maibe foinsae estudante tomak nebe hakarak luta ba independência ho nacionalismo foun”. Tan, iha frase balun ha’u afirma katak FRETILIN/ FALINTIL iha ai-laran kaer kilat, sira bele mate mohu RENETIL iha ai-laran intelectual nian kaer lapizera. Ha’u reconhece duni ha’u nia ingenuidade no imaturidade intelectual!

1998, ha’u sai padre iha Baucau, kaer kedas pasta nu’udar Director ba Comissão da Juventude iha Diocese Baucau. Husi experiencia discussão no involvimento iha IMPETTU no RENETIL, ha’u hamutuk ho Frater Jacinto Francisco Xavier (mate iha Lautem, 27 de Setembro de 1999, hamutuk ho Madre sira no Titi Sandhora Lopes; milisia ALFA mak oho) – ami hari FOSCA (Foinsae Católica). Agora ha’u halo confessiones publicamente (ha’u mos hakarak husu perdão ba Dom Basilio do Nascimento no Dom Carlos F.X. Belo SDB), katak, ideia hari’i FOSCA ne’e hanesan fo hatais hena foun ba RENETIL no IMPETTU, usa movimento “MUDIKA” (Muda Mudi Katolik) nu’udar uma mahan. FOSCA hanesan expressão ida atu fo esperança, maibe iha biban hanesan mos atu revolta! Ideia ne’e hahu mosu liu husi discussão ho Romo Y.B. Mangunwijaya iha Yogyakarta. Romo Mangun rasik mai iha Baucau (1998), no ami halo discussão franca no aberta ho nia iha GOR. Ne’e duni, FOSCA mos sai hanesan alternativa, maski ha’u ho Frater Jacinto F.X. “jura ba malu” atu subar metin ... lakohi atu sai “pahlawan kesiangan”. Tan, iha Malang ami 2 mos involve ona iha FKMPPB (Forum Komunikasi Mahasiswa Putra/i Baucau) nebe hamosu “confusão”, halo RENETIL no IMPETTU iha Malang “hateke matan-ikun oituan”. Ikus mai, ha’u ho Amaro Ximenes (agora diretor iha MAP) ba Denpasar atu “apresenta-an” hodi halo explicação ba RENETIL.

Ho teoria “Involução” ita hare oinsa mak foinsae sira hahu hetan maturidade, experiencia no determinação; “learning by doing” ... “trial and error” hodi sai tasak liu tan, midar no furak iha luta ba libertação. Husi sikun ida ne’e mak ha’u fiar liu katak, transformação da geração husi barak liu mak husi “foinsae” ba “katuas” sira ... la’os husi “katuas” ba “foinsae”. Carlos Saky nia livro halo ita hanoin ho fuan konaba saída mak ita hotu halo ona iha passado nu’udar foinsae nebe nakonu ho esperança hodi transforma sira nia “caridade” ba hahalok quase “místico” no “martírio”. Husi página ida ba página seluk, Saky halo livro ida ne’e hanesan “cerita bersambung” ida, desenvolve scenario histórico nebe nia husik atu ko’alia rasik husi nia-an. Maibe, liu-liu Saky la “julga”; “... e su questo terreno, traballante e ogni passo, dobbiamo fare il meglio che possiamo per vivere degnamente, da uomini, pensando, operando, coltivando gli effetti gentili; e tenerci sempre pronto alle renunzie sense per esse disanimarci” (Benedetto Croce, 1952) – iha rai leten ida ne’e mak ita la’o kudeuk tun sae atu bele halo di’ak liu tan ba buat nebe ita bele halo atu moris dignamente nu’udar ema, iha kakutak atu hanoin, iha isin lolon atu bele halo netik buat ruma, hodi hamoris sentimento murak, no pronto nafatin hodi husik hela buat hotu, maibe lalika sente namlele/ maten-hamrik.

RENETIL sai nafatin “masin rai nian” ... “naroman mundo nian”. Pessoalmente, ha’u iha afeito ho Carlos Saky nu’udar companheiro iha domin ba “livro” (le no hakerek). Sai escritor iha Timor Leste la’os profissão “elite”, maibe moris ki’ak. Se hakarak hetan osan barak, di’ak liu sai assessor diuk ruma hodi halo coppy and paste ba lei ka regulamento ka relatório bosok sira hodi manan barak. Hanesan dala ida, assessor internacional ida husi Ministerio da Educação (husi Gabinete Vice Ministra Dulce Soares nian) halo entrevista ho ha’u konaba educação, horas 1 resin. Hotu tiha assessor ne’e fo US$ 20.00 ba ha’u (dehan compensasaun ba ha’u nia tempo). Ha’u sente humilhado tebes. Afinal, ha’u hanoin conversa baibain de’it. Lalika selu. Maibe, tan selu mak hau foti oin la sae. Ikus mai, assessor ne’e haruka hikas draft curriculum atu halo comentário, ha’u kaer soe ba lixu fatin. Dala ida ne’e, Carlos Saky hakerek livro mahar ida maibe hetan de’it insulto husi Parlamento Nacional. Maibe, ha’u orgulho nafatin ho Saky, tan “Antes sem titulo, do que sem pátria” ... maibe mos ha’u hanoin “antes sem dinheiro, do que sem personalidade autentica”.

Ha’u orgulho ho saudoso Fernando La’ Sama de Araujo, RENETIL nia Secretario Geral dahuluk. Iha Timor Post hakerek “Saldo La’ Sama Iha Banku Mandiri Mamuk” – US$10 – no, iha BNU US$300.00. Imagina?! Hanesan los profeta Job nia liafuan, “Nu saí do ventre de minha mãe e nu voltarei para lá. Iahweh o deu, Iahweh o tirou, bendito seja o nome de Iahweh” (Jo 1, 21). “Ho molik ha’u sai husi inan nia knotak no ho molik ha’u fila hikas ba neba. Maromak mak fo, Maromak mak hasai, Kmanek wain tebes Maromak nia Naran”. Wainhira monu ona iha susar no todan nia laran, Job nia fen-kaben koko atu halo nia hotar Maromak no hakribit nia fiar. Job dehan, bele halo sala oinsa de’it, naran labele sai traidor ba Maromak. Tuir ha’u nia hanoin, La’ Sama kaer metin nafatin espírito RENETIL nian ... transforma geração no sira nia mentalidade.

Hau taka ho liafuan husi R.G. Collingwood (1956), “History is not contained in books and documents, it lives only as a presente interest and pursuit, in the mind of the historian when he criticizes and interprets those documents, and by so doing relives for himself the states of mind into which he inquires”. Hela furak ema hotu hakerek história hodi husik hela “memoria critica” ba geração tuir mai. Sai at no moe bo’ot wainhira ita hamrik baku malu. Historia ita nian hotu. Sala bo’ot sala ki’ik, ita hotu halo ona. Manan no hetan ksolok, ita hotu nian. ...

Publika iha Opiniaun




Hosi: Moisés Vicente
Telefone: +670 77291406

Loron Diak ba le’e na’in no Povu Doben Timor-Leste.
Uluk nana’in hau respeitu ba Sua Ex. Prezidente da República Taur Matan Ruak ho estrutura tomak Prezidensial da República nian, Primeiru Ministru VI Governu Konstitusional Rui Maria de Araujo, Ministru, Secretariu Estadu, Prezidente Parlamentu Nasional, Prezidente Tribunal Recursu no sauda Reverendísimu Bispu Dom Norberto do Amaral no mós relijiozu no relijioza sira hotu hosi Dioseze Maliana no hosi Timor-Leste tomak.

Wainhira hau le’e notisias iha http://fidelismagalhaes.blogspot.com/2015/05/20-de-maiu-iha-maliana.html le’e ho kontenti tebes iha ne’ebé Chefe Casa Civil Prezidente da República Fidelis Magalhães hatete katak Hau sente haksolok katak Senhor Prezidente da Republika deside atu komemora 20 de Maiu ba tinan ida ne'e iha cidade Maliana, kapital distritu Bobonaro nian. Fulan rua liu ba, wainhira hau hasoru Sua Ex. Prezidente da República durante ami nian enkontru loro-loron nian (tuku 8 dader loro-loron) hau husu hanesan ne'e: "Senhor Prezidente ita bo'ot hakarak celebra 20 de Maiu ida ne'e iha nebe'e? Iha Dili ka iha distritu? "Hatan mai hau Sua Ex. Prezidente da República dehan: "Hau hakarak Fidelis fo instruisaun ba ita nian staff sira no transmite ba Governu no sira seluk katak hau eskolha Celebra 20 de Maiu ba tinan ida ne'e iha Maliana, Distritu Bobonaro" Ho Sua Ex. Prezidente da República nia desizaun ida ne'e maka Maliana sei sai uma nain ba cerimonia Estadu bo'ot ba tinan ida ne'e.

Ita hotu la senti katak loron muda ba kalan, fulan muda ba tinan, República Democrática Timor-Leste (RDTL) komemora nia loron Aniversáriu Restaurasaun Independénsia ba dahuluk iha 20 Maiu 2002. Iha ne’ebé tinan 13 liu ba, liu husi Nasoens Unidas (ONU) ne’ebé lidera husi Kofi Annan administrativamente no politikamente entrega poder ida ne’e ba Prezidente da República Democrática Timor-Leste Xanana Gusmão. Iha momentu ne’ebá iha kalan meia noite hasae isar bandeira RDTL no hananu melodia “Pátria, Pátria, Timor-Leste a Nossa Nação” iha Tasi Tolu, Díli.

Iha tinan ne’e 20 Maiu 2015, Sua Ex. Prezidente da República Taur Matan Ruak foin primeiru vez komemora Aniversariu Restaurásaun Independénsia hamutuk ho povu iha Munisípiu Bobonaro depois Timor-Leste hetan Ukun Rasik-An. Nudar jerasaun foun, orgulhu bo’ot no agradese bo’ot tebes ba Prezidente da República ho laran luak marka prezensa iha povu nia leet.

Rekomendasaun ba futuru mai, Prezidente da República se-sedeit mak ukun tenke realiza loron boot ida hanesan ne’e tenke tun ba iha Munisípiu ida-idak iha territóriu Timor-Leste hodi nune’e populasaun ain tanan iha area rural sira senti duni loron boot Aniversáriu Restaurasaun Independénsia Timor-Leste nian. No inklui mós loron boot Proklamasaun República Democrática Timor-Leste 28 Novembru.

Ikus liu, tuir Sensus Uma Kain 2010 total populasaun iha Munisípiu Bobonaro mane  44,423 feto 45,364 no total hamutuk 89,787. ***

 - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - -
Referénsia:

a.    20 Maiu: Espiritu Nasionalismu Tenke Lori Paz no Dame. Asesu iha Jornál INDEPENDENTE, 19 Maiu 2015.
b.    Fidelis Magalhães, http://fidelismagalhaes.blogspot.com/2015/05/20-de-maiu-iha-maliana.html. Asesu iha loron 15 Maiu 2015.
c.    Kofi Annan,https://www.facebook.com/pages/Kofi-Annan/228449696042?fref=ts
d.    Komisaun Organizadora (KO) ba Komemorasaun loron Restaurasaun da Independénsia 20 de Maiu ba dala-13 preparadu no garantidu. Asesu iha Jornál Timor Post, 16 Maiu 2015.
e.    Komemora 20 de Maiu, Prizioneiru 1 Hetan Indultu PR. Asesu iha Jornál Suara Timor Lorosae, 19 Maiu 2015.
f.    Komemorasaun 20 Maiu, PNTL Hatun Elementus 100. Asesu iha Jornál Nacional Diário, 19 Maiu 2015.
g.    Selebra 20 Maiu, Governu Aloka Osan Rihun 7 ba Kada Munisípiu. Asesu iha Jornál Suara Timor Lorosae, 16 Maiu 2015.
h.    SensusPopulasaunnoUmaKain2010Rezultadu,pajina5.http://www.dne.mof.gov.tl/published/Census%20Preliminary%20Results%202010/Tetum%20English%20Preliminary%20Results%202010.pdf. 

Publika iha Opiniaun



Dili, Tempo Semanal – Tuir nota de imprensa ne’ebe Tempo Semanal simu husi parte Departamentu Relasaun Publika MNEK iha loron 28/05/2015 infoma klean liu tan katak Vise-Ministru Negosiu Estranjeiru no Koperasaun Timor-Leste, Roberto Soares, iha loron 26 Maiu 2015, hasoru malu ho Ilze Juhansone, Reprezentante Permanente Latvia, nudar mos Prezidente Konselhu Europeiu no Yolanda Gallego-Casilda Grau, Reprezentante Komisaun Europeia, hodi assina akordu konaba izensaun vistu ho kurtu durasaun ba Timor-Leste, wainhira tama ba nasaun Uniaun Europeia ho espasu Schengen nian.

“Ohin honra bo’ot tebes ba Timor-Leste tamba ata oan hau reprezenta ita nian Estadu no Governu, ofisialmente assina akordu ne’ebe importante tebes ba relasaun Timor-Leste ho Uniaun Europeia, liu-liu konaba konfiansa tomak Uniaun Europeia nian ba nasaun Timor-Leste hodi fasilita izensaun vistu ba Timor-Leste wainhira tama ba rai sira iha Uniaun Europeia. Liu hosi seremonia assinatura ne’e, hau aprezenta apresiasaun no gratidaun Timor-Leste nian ba Uniaun Europeia liu hosi Presidensia Konselhu Europeiu nian, ne’ebe oras ne’e dadaun nasaun Latvia mak lidera. Ho assinatura dokumentu importante ne’e, dala ida tan manifesta konfiansa ba Timor-Leste nian maturidade politika, diplomasia, progressu ekonomiku no servisu imigrasaun nian, reitera nafatin vontade diak hosi Uniaun Europeia atu fo apoiu ba Timor-Leste iha prosessu konsolidasaun Estadu. Timor-Leste sei aproveita maximu oportunidade ida ne’e, hodi fortifika liu tan koperasaun entre Timor-Leste ho Uniaun Europeia, laos deit hosi governu ba governu maibe mos hosi povu ba povu,” katak Roberto Soares.

Vise-Ministru Negosiu Estranjeiru no Koperasaun, Roberto Soares hatutan katak akordu ida ne’e sei ajuda no fasilita konetividade entre povu Timor-Leste ho povu Uniaun Europeia. Tamba ne’e, dokumentu ne’ebe assina ne’e konsidera nudar dokumentu historiku no bazeia ba prinsipiu resiprosidade katak Timor-Leste bele hela iha nasaun membru sira ne’ebe tama iha espasu Schengen ho durasaun maxima loron 90 iha kada periodu loron 180 nian laran, nune’e mos ba sidadaun hosi nasaun membru bele hela iha Timor-Leste ho durasaun hanesan.

Akordu ne’e la aplika ba ema ne’ebe halao viagem ho objetivu atu buka servisu. Sidadaun Timor oan sira ne’ebe utiliza passaporte validu ho kategoria hotu-hotu, bele tama la ho visto no hela iha nasaun membru sira ne’ebe tama iha espasu Schengen ho esesaun ba Reinu Unidu no Republika Irlanda.

Iha parte seluk, ho konsiderasaun ba relasaun besik entre Uniaun Europeia ho nasaun Islandia, Noruega, Suisa no Liechtenstein ne’ebe hola parte mos iha espasu Schengen, Timor-Leste ho nasaun hirak ne’e halo deklarasaun konjunta hodi konklui iha tempu badak nian laran, akordu bilateral konaba izensaun vistu ho durasaun badak tuir akordu ne’ebe Timor-Leste halo ona ho Uniaun Europeia.    

Akordu ne’e rasik tenke hetan ratifikasaun ka aprovasaun hosi parte rua ne’ebe involve, tuir prosedimentu internu parte rua ne’e nian. Maske nune’e implementasaun provisoria hosi akordu refere hahu kedas hafoin akordu ne’e assina.

Ho assinatura akordu ida ne’e, Vise-Ministru Roberto Soares hein katak Timor-Leste bele introdus no hadiak liu tan kestaun teknika, seguransa no kualidade konaba Timor-Leste nian passaporte atu nune’e ema seluk labele aproveita hodi utiliza fali passaporte Timor-Leste ba sira nian interese.

Akordu ne’e sei fasilita Timor oan sira hodi bele movimenta ba mai iha nasaun membru ho espasu Schengen, iha okaziaun ferias, vizita familia no atividade sira seluk ne’ebe iha ligasaun atu reforsa koperasaun entre Timor-Leste ho Uniaun Europeia.

“Hau aproveita oportunidade ida ne’e fo mos hanoin ba sidadaun Timor oan sira hotu atu bainhira iha hanoin ka planu viagem ba iha rai liur, liu-liu iha rai sira membru Uniaun Europeia nian, Timor-Leste livremente utiliza ita nian passaporte rasik, ne’ebe reprezenta ita nian identidade, ita nian nasaun nian dignidade ba iha Uniaun Europeia. Ne’e duni, husu mos para ita kuidadu no salvaguarda ita nian passaporte rasik,” tenik Roberto Soares.

Entertantu, Vise-Ministru Roberto hato katak atu assegura implementasaun hosi akordu refere, papel Ministeriu Justisa, Ministeriu Finansas liu hosi servisu Alfandegas, Ministeriu Obras Publikas, Transporte i Komunikasaun, Ministeriu Interior liu hosi servisu imigrasaun no Ministeriu Negosiu Estranjeiru no Koperasaun liu hosi parte Konsular importante tebes atu fortifika koordenasaun hodi fasilita implementasaun no koperasaun ba  akordu ne’e.

Iha okaziaun ne’e, Vise-Ministru Roberto Soares agradese mos ministeriu ho entidade hotu-hotu ne’ebe kontribui ona iha prosesu elaborasaun no final hosi dokumentu historiku ida ne’e.

“Hau hakarak agradese no rekunhese ministeriu no entidade tomak ne’ebe kontribui ona iha prosesu finalizasaun ba dokumentu historiku ida ne’e, hanesan, Ministeriu Justisa, Miniseriu Finansas, Ministeriu Obras Publikas, Transporte i Komunikasaun, Ministeriu Interior, inklui ita nian orgaun soberanu sira i konserteza ba servisu diplomasia atraves MNEK ho ita nian embaixada sira, liu-liu embaixada iha Bruxelas ne’ebe halo esforsu no kontribuisaun extraordinaria ba prosesu assinatura dokumentu ida ne’e. Ida ne’e dala ida tan manifesta determinasaun no kompromisu povu Timor-Leste nian atu salvaguarda soberania no independensia Timor-Leste nian, no mos reforsa liu tan koperasaun ho Uniaun Europeia,” dehan Roberto Soares.

Publika iha Nasional


 
Tempo Semanal - Timor Leste ninia Ministru Negosiu Estranjeiru Kooperasaun (MNEK), DR. Hernani Coelho hamutuk ho ninia omologu Ministru Negosiu Estranjeiru husi Nova Zelandia, Murray McCully ofisialmente halo ona inaugurasaun ba Embaixada foun Timor-Leste ninian iha Wellington kapital Nova Zelandia ninian (27/05/20150). Maske edifisiu Embaixada foin maka loke ofisialmente maibe dezde 2014 Timor-Leste nomeia ona Embaixador, DR. Cristiano da Costa hodi hala'o fungsaun iha nasaun ne'ebe hola parte membru pasifiku ninian ne'e.

Ho testamunia husi reprezentante husi nasaun sira iha Azia, illa Pasifiku no nasaun CPLP balun, Ministru Negosiu Estranjeiru Nasaun rua ne’e, kua fita hodi halo inagurasaun ba Edifisiu Embaixada Timor-Leste ne’ebe lokaliza iha rua Johnston, Wellington.

“Ohin onra bo'ot tebes mai ha’u bele mai hamri’ik iha fatin ne’e hamutuk ho ita bo’ot sira, tan ba Embaixada Timor-Leste foin kalan ne’e maka loke no dada tempu liu tan ona”, dehan Ministru Hernani Coelho.

Entidades seluk ne’ebe marka prezensa iha seremonia refere ne’e mos mai husi military balun, reprezentante polisia no ema sivil husi nasaun Nova Zelandia maka hala’o ona servisu ruma iha Timor-Leste dezde 1999.

“Sirkumstansias la admite ami atu estabelese sedu ami nia misaun iha Wellington tuir bu’at ne’ebe ami hakarak halo Senor Ministru. Maibe ha’u hakarak asegura dala ida tan katak New Zeland sempre iha ami nia hanoin. (New Zeland) hanesan belun bo’ot ida iha pasifiku ne’ebe sempre pronto atu fo liman hodi tulun wainhira presiza”, Ministru Negosiu Estranjeiru Timor-Leste ninian ne’e hateten.

Ministru Negosiu Estranjeiru Timor-Leste iha VI Governu ninian ne’e agradese ba povu Nova Zelandia ninia oan sira ne’ebe halo ona sakrifisiu iha nasaun Timor-Leste. Tuir DR. Hernani Sakrifisu sira ne’e sei prezerva eternalmente iha Povu Timor-Leste nia fuan tan Nova Zelandia nia oan liu rihun balun maka presta ona servisu iha military, polisia no balun hanesan asesor iha nasaun Timor-Leste iha tinan 15 ninia laran dezde 1999.

“Durante tinan 13 nia laran dezde restaurasaun independensia, ami benefisia barak husi Nova Zelandia”, Ministru Hernani rekuinese.

Hafoin de hato’o ninia lia menon Ministru Hernani konvida ninia belun Ministru Murray hodi halo toast tua atu deseza sorte di’ak ba povu Nova zelandia.

Iha parte seluk Ministru Negosiu Estranjeiru Nova Zelandia ninia sente kontente ho inagurasaun ba Embaixada Timor-Leste iha wellington hodi hametin liu relasaun entaun nasaun rua ne’e.

“Ohin ita selebra ba dala 13 loron restaursaun independensia Timor-Leste no ami mos ho laran haksolok simu estabelesimentu Embaixada foun Timor-Leste iha capital nasaun Nova zelandia ninian mak Wellington”, dehan Ministru Murray.

Iha ema lubun bo’ot ninia oin Ministru Negosiu Estranjeiru Nova Xelandia ne’e relembra hikas hodi dehan durante tinan hirak kotuk ne’e Nova Zelandia apoiu ona Timor-Leste iha area polisia komunitaria, agrikultura, Edukasaun no area seluk tan no Ministru ne’e rekuinese Timor-Leste ninia papel importante hodi lori Nova Zelandia tama ba sai membru naun permanente Konsello seguransa  (KS) nasoeins Unidas ninian.

“De faktu katak (Timor-Leste) eis Prezidenti, Ramos Horta tenke hela iha Nova Yorke durante loron sanolu nia laran, espesialmente iha momentu ikus ba loby ba Nova Zelandia ba kampania ikus atu sai nu’udar membru la permanente ba Konsello Segruransa ONU ninian. Ida ne’e refleta volume amizade ne’ebe ita iha entre povu rai rua ne’e. Ha’u hakarak hato’o apresiasaun bo’ot tebes ba apoiu tomak ne’ebe imi (Timor-Leste) fo ona no ha’u hakarak asegura katak ami (Nova Zelandia) sei la husik imi monu let de’it iha Konsello Seguransa”, Promete Ministru Negosiu estranjeiru Nova zelandia ninian ne’e.

Hafoin remata tiha resepsaun refere Ministru Nain rua kontinua hikas ho sorumutuk bilateral hodi deskute kona ba kooperasaun entre nasaun rua no asuntus bilateral, rejional mos multilateral.

Publika iha Nasional


Tempo Semanal - According to Amnesty International urgent action letter which sent to Tempo Semanal on May 12, 2015 said, “dozens of individuals were arbitrarily arrested and tortured or otherwise ill-treated by Timor-Leste security forces as part of security operations in the Baucau district. There are ongoing concerns for their safety”.

“The Timor-Leste security forces have arbitrarily arrested and allegedly tortured or otherwise ill-treated dozens of individuals in Laga and Baguia in Baucau district over the last few months. These incidents have occurred as part of a series of joint security operations by the police and military to capture Mauk Moruk (Paulino Gama) and his followers”, said in an urgent action letter which sent by Amnesty International to Tempo Semanal.

“Local human rights organizations have documented dozens of cases where individuals, accused of being followers of Mauk Moruk, were beaten and kicked repeatedly by security forces during arrest and detention. Some had their hands and legs tied. Most were released after brief periods of detention and interrogation. Security forces also reportedly destroyed property of individuals suspected of supporting Mauk Moruk, as part of the operations, such as windows, furniture and other household items. Some also allege that food and money were stolen from their houses. Hundreds have been traumatised by these operations”.

“Mauk Moruk, a former independence fighter, leads the banned Maubere Revolutionary Council (KRM) and has been a strong critic of the current government. He has reportedly called for the resignation of the government and the dissolution of parliament. Followers of Mauk Moruk allegedly carried out attacks on the police in Laga and Baguia in January and March 2015. In response, the authorities launched a number of security operations where the use of unnecessary and excessive force has been documented”.

The Amnesty International appeal to the people to immediately write in Portuguese, Tetum or your own language to send to the country Minister of Justice, Ivo Valente, Permanent Representative of Timor- Leste to the UN in Geneva, Marciano da Silva and East Timor Ombudsman, Human Rights and Justice Dr Silverio Pinto Baptista.

“Urging the authorities to halt the arbitrary arrests and torture or other ill-treatment by security forces as part of the joint security operations being conducted in Baucau district”;

“Urging them to ensure that all those tortured or otherwise ill-treated have access to any medical attention they may require, including psychological treatment”;

“Calling on the authorities to urgently initiate an effective and independent investigation into all the allegations of arbitrary detention, torture or other ill-treatment and the destruction of property by security forces, and bring all those responsible to trial, including those with command responsibility”.

East Timor Government have launched HANITA joint Operation between East Timor Police and East Timor defense force to captured Mauk Moruk and his men after several incident in Laga and Baguia early this year.

Publika iha Nasional

 

 

Hosi Primeiru-Ministru Dr. Rui Maria de Araújo

 

Dala barak, iha okaziaun oioin, ha’u reafirma VI Governo Constitucional nia kompromisu hodi halo reforma efetivu ba ita-nia funsaun públika atu ita-nia funsionáriu públiku sira bele sai efisiente liu tan no servisu ho rigór, kualidade, no responsabilidade.

 

Reforma ba funsaun públika la signifika atu hasai funsionáriu sira husi servisu, indiskriminadamente. Reforma atu hadi’a. Atu hamosu fali administrasaun públika ida ne’ebé efisiente, efikás no responsavel iha ninia prestasaun de servisu ba Povu.

 

Iha kontestu ida ne’e mak ha’u nu’udár Primeiru-Minstru,iha ha’u-nia knaar atu serví povu, konsiente katak iha duni nesesidade bo’ot no urjente atu hadi’a ita-nia administrasaun públika,fó ona instrusaun atu hapara rekrutamentu ba funsionáriu públiku foun hodi fó tempu atu hadi’a ita-nia sistema atuál, atu halo lai reflesaun, atu hadi’a lai buat sira ne’ebe nesesáriu atu hadi’a.

 

Bainhira ministériu hotu-hotu halo ona análize ida kle’an no ho rigór ba sira-nia rekursus umanus ne’ebé iha, no bele justifika nesesidade ba funsionáriu foun, mak rekrutamentu foun bele hahú fali.

 

Comissão da Função Pública (CFP) agora iha ha’u-nia tutela no Gabinete do Primeiro-Ministro sei servisu hamutuk ho CFP atu halo estudu ida detalladu liután kona-ba saida, no oinsá, atu reforma.

 

Iha ha’u-nia Gabinete ha’u disponibiliza ona tékniku na’in rua atu halo ligasaun ho funsaun públika atu fasilita prosesu ida ne’e.

 

Ita presiza, no tenke reforma duni ita-nia funsaun públika. Prinsípiu responsabilidade funsionalizmu públiku, ne’ebé bazeia ba sentido-de-Estado, tenke aplika iha setór hotu-hotu iha administrasaun públika, laiha exesaun.

 

Atu bele realiza vizaun ambisioza ne’ebé inkorpora iha Plano Estratégico de Desenvolvimento Nacional 2011-2030, ne’ebé hakarak transforma Timor-Leste ba nasaun ida ho rendimentu médiu-altu, ita presiza administrasaun públika ida forte, ho rekursus umanus de kualidade.

 

Ita hotu hakarak funsaun públika ida ho rekoñesimentu liu hosi prestasaun de servisu ne’ebé efisiente, efikás no responsavel, katak funsionáriu ida-idak tenke hala’o ninia knaar ho rigór, kualidade, no responsabilidade.

 

Momentu ne’e, momentu ida definitivu ba funsionáriu hotu-hotu atu halo introspesaun ba ida-ida nia estatutu profissionál. Imi tenke husu imi nia an rasik: Ha’u servisu ho rigór, ho kualidade no ho responsabilidade ka lae? No servisu ne’e la’ós dala ruma deit; karik dala ruma deit entaun imi falla ona. Servisu ho rigór, kualidade no responsabilidade tenke halo lorloron; prestasaun de servisu labele dala ruma de’it mak di’ak; tenke di’ak beibeik, iha okaziaun no momentu hotu-hotu.

 

Ne’e duni ha’u hakarak konvida funsionáriu sira hotu-hotu atu kontribui no tau hamutuk hanoin kona-ba oinsá atu ita alkansa vizaun ne’e.

 

Ita presiza respostas definitivas kona-ba sistema administrasaun públika saida mak ita hakarak adopta. Ita kontinua ho sistema rejime de karreira ka buka adopta sistema rejime de pozisaun? Ka ita hamosu kombinasaun entre sistema rua ne'e?

 

Iha sistema rejime de karreira, funsionáriu sira hahú ho grau ida no kontinua iha kategoria servisu ida ne’e kontínuamente. Rekrutamentu sira ne’e baibain halo’o iha grupu no avaliasaun bazeia de’it ba kredensiál akadémika ho ezame de entrada. Promosaun ba sistema ida ne’e automátika no bazeia ba senioridade, la’ós méritu.

 

Sistema ida ne’e fó seguransa de traballu ba funsionáriu sira maibé rekrutamentu bele la korresponde ho nesesidade operasionál i loke marjen ba kandidatu sira ne’ebé laiha kualidade ka laiha kompeténsia adekuada atu tama.

 

Iha sistema rejime de pozisaun, rekrutamentu bazeia ba kapasidade no kompeténsia individuál korrespondente ho funsaun espesífika ida. Promosaun mós bazeia ba konkursu por méritu. Tanba ne’e, sistema ida ne’e enkoraja transparénsia no limita oportunidade ba hahalok diskriminatóriu tanba nomeasaun bazeia ba esperiénsia, kapasidade no istória de dezempeñu.

 

Rekrutamentu iha rejime ida ne’e mós dependente ba nesesidade operasionál. Tanba ne’e rekrutamentu sei rezulta iha kreximentu ba produtividade no melloramentu iha atendimentu públiku.

 

Dalan ida tan mak atu buka oinsá institui sistema de avaliasaun de dezempeñu ida apropriadu, ne’ebé bele garante katak funsionáriu hotu-hotu sei hala’o duni ninia knaar tuir kontratu ne’ebé nia assina ho Estadu nu’udár empregadór.

 

Ba oin, ha’u nia hakarak mak funsionáriu hotu-hotu simu Termu de Referénsiaida molok hahú servisu. Termu de referénsia ne’e sei tradús ba planu de traballu anuál ho metas apropriadas atu alkansa. Depois, kada trimestre, jestór sira sei avalia funsionáriu sira nia servisu no dezempeñu hodi determina progresu atu atinje meta anuál ne’e. Karik la atinje meta ne’ebé konkorda tiha ona ita tenke hatene tansá; tenke iha justifikasaun klara.

 

Funsionáriu ne’ebé dezempeña duni ninia knaar sei atinje meta sira ne’e. Se nia la atinje tanba nia laiha kapasidade, ita sei buka maneira seluk atu asiste nia hasa’e ninia kapasidade; ita fó tan oportunidade ida ba nia. Maibé se nia la atinje tanba nia laiha vontade atu servisu, tanbania la iha sentidu-de-Estadu, entaun laiha dalan seluk anaunsér rezigna an husi funsaun públika.

 

Husi parte Estadu nian nu’udár empregadór, ita kontinua nafatin buka meiu atu hadi’a kondisaun de traballu funsionáriu sira nian. Diskusaun la’o nafatin kona-ba oinsá atu remunera di’ak liu tan funsionáriu sira.

 

Ita sei estabelese mós sistema ida atu tau matan ba funsionáriu sira ne’ebé reforma ona. Funsionáriu ne’ebé tama ona idade reforma, tenke reforma. Maibé ita mós tenke iha sistema ida atu garante kontinuasaun ba sira-nia moris, ho kondisaun no ho dignidade.

 

Ita hotu konsiente katak desizaun atu hadi’a funsaunpúblika presiza duni atu akontese i ho urjénsia. Maibé presizamósatu ita hotu servisu hamutuk.

 

Servisu no prestasaun de servisu ho rigór, ho kualidade, no ho responsabilidaderekere dedikasaun no disiplina tomak hosi funsionáriu hotu-hotu. Ida ne’e no la’ós opsaun maibé kondisaun sine qua nonatu serví Povu Timor-Leste.

 

Hamutuk, ita bele! Um Por Todos e Todos Por Um!

 

 

 

Publika iha Opiniaun

 

Dili, Tempo Semanal - Prezidenti Parlamentu Nasional Timor-Leste hahu hasai lian aiknanoik manas hasoru prosesu akuzasaun ba ninia a’an no nia dale nia prontidaun atu tama iha kadeia kalabosi kuandu nia sala duni iha prosesu sosa karreta ba membru Parlamentu Nasional sira..

 

“Kadeia ba EMA MANE la’os ba ASU, (nune’e) ha’u pronto”, Tenik DR. Vicente Guterres, Prezidenti Parlamentu Nasional hafoin sorumutuk ho Prezidenti Da Republika, iha palasiu Aitarak Laran (12/05).

 

Nai ulun husi Uma Fukun Timor-Leste ninian ne’e mos tau kondisaun ba Tribunal atu halo transmisaun direita ba prosesu julgamentu hasoru ninia a’an.

 

“Prezidenti Parlamentu nasional la reseia atu ba Tribunal. Nu’udar Prezidenti Parlamentu Nasional, ha’u (nia) vontade rasik, ha’u hakarak ba julgamentu mas hatene kom kondisaun; Transmite direitamente husi Televizaun no husi Radio I ho prezensa husi ker ONG nasional ho jornais nasionais no mos entidade internasionais ne’ebe tan ba akuzasaun ne’ebe halo ba Prezidenti Parlamentu Nasional, ita nia rain ne’e naran foer tebtebes. Tan ne’e maka hakarak ajensia internasionais ne’ebe maka klasifika ita at tebtebes mai asiste julgamentu para hare se Prezidenti Parlamentu ida ne’e korrupto duni ga la’e I halo duni partisiapasaun ekonomi no negosiu ne’ebe maka akuzadu”, katak nai ulun Parlamentu Nasional ninian ne’e.

 

Maske Vicente Guterres ko’alia sai ona ninia vontade atu koopera ho justica maibe ulun Parlamentu Nasional ne’e dehan nia mos sei rona nafatin pozisaun husi bankadas Parlamentariu sira ne’ebe tuir informasaun sei trava prosesu refere ate mandatu remata iha 2017.

 

“Ida ne’e maka dispozisaun prezidenti Parlamentu mas la depende ha’u. Tambem, Ha’u nia vontade mak ne’e ho kondisaun sira ne’e. Agora husi Bankada Parlamentar nia pozisaun katak neste momentu nao e posivel, husik liu lai mandatu mak saida…..mas ha’u la ta’uk. Rona ga la’e? ha’u la ta’uk nu’udar Prezidenti Parlamentu I nu’udar Timor oan”, dehan DR. Vicente Guterres ho lian maka’as.

 

 

Bele nota husi Prezidenti Parlamentu Nasional ninia ton ho oin wainhira ko’alia ba jornalista sira kona ba asuntus akuzasaun kontra ninia a’an relasiona ba prosesu akizasaun kareta ba membru Parlamentu Nasional sira, DR. Vicente Guterres monstra iha ninia rentos uat hamri’ik no liman fuan tolu komu hodi hatudu fali ba ninia a’an no liman bo’ot ho liman fuan ida maka bainbain uza hodi hatudu ba ema seluk nakdedar hodi doko ba mai.

 

“Hotu-hotu tenke hanoin akuzasoeins ne’ebe falsas ou akuzasoeins ne’ebe hakarak halo atu persege ema, atu vingansa pesoal ou perseguisaun politika ida ne’e todan. Todan ba sira ne’ebe halo aukzasaun falsas no konserteza ke hafoer rai ida ne’e nia naran mos estadu ne’e nia naran, ida ne’e todan tebtebes, matebian sira mos sei hare”, DR. Vicente halerik ho lian wain hodi jura ba matebian sira.

 

0 false 18 pt 18 pt 0 0 false false false

 

Publika iha Nasional
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version