Tempo Timor Online

Tempo Timor : Ejiste nu’udar klubu fute bool ida iha Munisipiu Lautem, estrutura Klubu Savarika FC daudauk ne’e hala’o hela preparasaun oinsá atu hametin no dezenvolve diak liu tan klubu ida ne’e iha futuru, tanba iha tinan hirak liu ba estrutura ladun orientadu, ne’e duni jogador balun deside sai husi ekipa ida ne’e hodi tama fali ba klubu seluk. 

 

“Klubu ne’e hahú hari iha tinan 2002 no partisipa ona jogu barak, maibe sei iha buat barak maka presiza hadia, liu-liu kona ba finanseiru klubu nian nomós ekipamentus jogu nian hanesan, farda, bola inklui kampu ba jogador sira hodi treinu.” dehan ulun boot Sawarika FC Olivio dos Santos ba Online Tempo Timor iha Dili, (29/7).

 

Olivio haktuir, klubu fute bool Savarika FC fahe ba ekipa tolu, ekipa senior ne’ebé kompostu husi jogador sira ne’ebé ho idade 20 ba leten, ekipa junior kompostu husi jogador ho idade 17 to’o 19 no ekipa ida seluk mesak labarik sira ne’ebé ho idade 16 mai kraik.

 

Husi ekipa hirak ne’e, ekipa ho idade 16 mai karaik maka iha prestasaun di’ak tanba dala barak ona sai kampionatu ba jogus balun ne’ebé realiza iha Munisipiu Lautem, ezemplu ida maka jogu ba tasa Don Bosco Cub foin lalais ekipa ida ne’e konsege hetan terseiru lugar.

 

“Mesmu nune’e, ami tenke esforsu nafatin hodi hadia no buka atu responde buat hirak ne’ebé maka sei menus, hodi nune’e bele fasilita di’ak liu tan jogador sira para jogador idak-idak bele promove sira nia an iha area fute bool nian.” esklarese Olivio.  

 

Olivio hatutan, daudauk ne’e klubu ida ne’e la iha orsamentu rasik, ne’e duni bainhira atu partisipa jogu ruma inan-aman no juventude sira iha bairo laran maka suporta osan, nune’e mós farda ne’ebé maka jagador sira uza durante ne’e apoiu husi sawarika oan sira ne’ebe maka agora daudauk serbisu iha Inglatera.

 

“ami rekonese ne’e iha buat balun maka sei falta, tan ne’e ami husu ba Sekertariu Estadu juventude Desportu (SEJD) atu ajuda klubu ida ne’e, tanba klubu ne’e hari husi insiativa juventude no inan aman sira iha Bairo Savarika ho objetivu atu promove foin sa’e sira ne’ebé iha talent kona ba fute bool” Olivio esplika.   

 

Entertantu treinador FC Savarica, Mateus Sarmanto hateten, klubu ida ne’e iha jogador barak maibe kuaze ba hotu serbisu ona iha rai liur no balun agora eskola hela iha Dili, tan ne’e presija tebes prepara tan fini foun.

 

“ ekipa senior husi klubu ida ne’e hola partisipa jogu barak ona, maibe nunka sai kampionatu. Ba ami iha etapa ida ne’e  importante la’os atu sai kampionatu maibe oinsa maka bele hasa kualidade jogador sira” tenik Sarmento.

 

Aproveita oportunidade ida ne’e, Sarmanto haktuir katak, aliende hari klubu fute bool, bairo ida ne’e iha mós klubu basket nian ne’ebé kompostu husi ekipa basket mane no ekipa baske feto. 

 

ekipa basket boll hahu hari kedas iha tempu Indonesia no eziste to’o ohin loron. Fundador ba ekipa basket nian ida maka eis Sekertariu Estadu Florindo Pereira.

 

 

“Ekipa ida n’e iha prestasaun di’ak tanba desde ekipa ida ne’e hari sempre manan, dala ruma hetan primemr lugar, segundu lugar no dala ruma terseiru lugar.” Sarmento konta tuir. (**)

Lee kontinua... 0

 

Tempo Timor: Presidente Federasaun Halterolismu Arte Cultura Fisika Peso Timor-Leste(FHACUPTIL), Vicente da Silva haktuir katak, atu dezenvolve kualidade atletismu no bele hetan fini di’ak iha futuru kona modalidade binaraga, hit besi (angkat besi) no angkat berat presija iha kompetisaun hodi ita bele hatene se maka kampionatu.

 

 “Objetivu husi kampetisaun ne’e atu bele hare no identifika atleta ne’ebe maka iha kualidade di’ak hodi prepara ba kompete iha eventu internasional,” dehan Presidente FHACUPTIL, Vicente da Silva ba jornalista sira iha GMT (27/07).

 

Vicente haktuir, eventu hanesan haa’o ona ba dala rua no planu ne’e mai husi governu liu husi Sekertariu Estadu Juventude Desportu (SEJD) ne’e duni kada tinan federasaun hotu hala’o aktividade iha rai laran.

 

Vicente rekoñese katak, dala ruma iha eventu ruma atleta sirane’ebé  ita hatene haruka ba ba de’it, ne’e duni liu husi kompetisaun ida ne’e ita mós bele hetan bibit di’ak hodi bele ba kompete iha eventu internasional.

 

“eventu ne’e involve klubu 12 no atleta iha 125 mak partisipa iha eventu ne’e no orsamnetu ba eventu ne’e rasik U$ 21 mil inklui ho admistrasaun ba tinan ida ne’e. Eventu ne’e iha mós klase 4 ba kada modalidade maka hanesan, binaraga, angkat besi no angkat berat.” Esklarese Vicente. 

Iha fatin hanesan Reprezentante Sekertariu Estadu Juventude Desportu(SEJD) liu husi Direktor Nasional Arte, Luis Oliveira hateten, atu dezenvolve prestasaun atletismu iha rai laran presiza duni iha kompetisaun hanesan daudauk ne’e. 

 

“atu hola parte iha kompetisaun presiza ho laran no tenke simu bainhira manan ka lakon, tanba iha desportu sempre ida manan no ida lakon, atraves kompetisaun mak ita bele dezenvolve ida-idak nia talentu,” tenik Luis.

 

 

Luis afirma liu tan katak, agradese mos ba federasaun FHACUPTIL atu iha susesu ho atleta sira hotu no liu husi atividade ida ne’e bele foti federasaun sira nia oin.(**)

Lee kontinua... 0



Tempo Timor: Federasaun Taekwondo Timor-Leste (FTTL) daudauk ne’e hala’o hela kompetisaun Taekwondo hodi buka atleta ne’ebé maka iha kapasidade ka skill di’ak hodi prepara ba tuir eventu internasional iha futuru oin mai.
Prezidente Federasaun Taekwondo, Angelo Neves hateten, eventu ne’e hanesan etapa preparasaun ida oinsa buka atleta jerasaun foun ne’ebe mak iha talentu di’ak kona ba taekwondo. “Hau espera katak iha futuru, atleta taekwondo preparadu ona atu kompete iha eventu internasional,” dehan Angelo bainhira hala’o diskursu iha eis GMT foin lalais.


Angelo haktuir, federasaun iha komitmentu boot atu fasilita no fo apoiu ba atleta sira, ne’e duni, husu ba atelta taekwondo tomak bele compete esportif no tenke hatudu ida – idak ninia kapasidade no espritu desportu ne’ebe ho kualidade.


Angelo rekonese katak, kada tinan numeru atleta taekwondo nian sempre aumenta ba bebeik, ne’e duni nia parte konvida atleta hotu-hotu atu hamutuk hodi dezenvolve di’ak liu tan federasaun taekwondo atu nune’e bele ba kompete iha rai liur.


“Ami Federasaun mesak labela halo buat ida. Ne’e duni, liu husi strutura foun federasaun taekwondo Timor-Lesta nian, ami husu ba Embaixador Korea, Koica no Governu Timor-Leste atu kolabora hamutuk ho federasaun hodi bele fó apoiu hodi dezenvolve taekwondo Timor-Lesta.”  Angelo argumenta. (**)

Lee kontinua... 0



Memoria Antiga

Futebol nudar modalidade desportu ne’ebe alemde populer iha mundo nomos Timor-Leste. Populasaun barak mak gosta prátika desportu ne’e hahu husi kiik to’o katuas sira. “Uluk kedas tempu Portugues ami gosta haree joga bola. Semana-semana sempre iha jogu. Agora tanba jogu laiha, maka ami mos gosta ba fali futu-manu”, dehan tio Antonio Sequeira ne’ebe kous hela manu aman ida iha Taibessi.

Evidensia katak futebol ne’e uluk “rame duni” bele haree husi Estadium Munisipal Dili ne‘ebe eziste ona husi tempu Portugues nomos edifisiu klubu futebol famouzu sira hanesan SLB Benfica ne’ebe iha Banku Mandiri aktual nian oin no FC Sporting iha Muzeun resistensia nian oin.

Iha tempu okupasaun Indonesia, biar funu hela maibe futebol rame kedas iha tempu inisiu. Tuir João Paulo, ex-jogador antigu nebe agora hela iha Audian, Dili dehan katak iha tinan 1980-tal eziste ona klubu futebol no kuaze fulan-fulan iha turneiru ka kompetisaun. Nune mos Ze Luis Oliveira – aktivista direitu umanus dehan uluk kedas nia sempre ba asiste jogu futebol ne’ebe joga husi jogador antigu sira ne’ebe famozu hanesan Pedro Baiasa, Chiquito Metan, João Matan, João Li, no seluk tan. “Tanba ami asiste bebeik jogu ne’e mak motiva ami sai mos jogador”, dehan Ze Luis. Nia aumenta tan katak uluk iha tinan 1985 – 1989 nia joga klubu hirak iha Persedil (Perserikatan Sepak Bola Dili). “Hau hahu joga momentu SMP Paulus VI no ami manan kompetisaun futebol entre eskola, depois husi FC Mutiara Timor foti ami hodi joga iha klubu ne’e, tuir fali hau ba FC Putra Timor no ikus molok hau ba eskola iha Jogja, hau joga iha Carsae FC. No hau mos dala-hira joga iha selesaun Persedil tanba selesiona husi klubu hirak ne’e, laos derepente deit joga iha selesaun sein liu husi klubu”, konta Ze Luis.

Iha tempu okupasaun Indonesia eziste torneiru no kompetisaun regular ne’ebe sempre ha’rame populasaun sira. “Uluk televisaun ka jornal la barak, maibe populasaun sira koñese diak jogador sira. Agora media barak loos, maibe publiku ladun koñese ho jogador sira no koñese liu fali mak lider FFTL (Federasaun Futebol Timor-Leste). Ne’e tanba sa? Tuir hau nian haree, ne’e hatudu katak agora modalidade futebol ne’e laos atu dezenvolve jogador sira ne’ebe iha talentu, maibe promove fali lider FFTL sira nian naran!”, dehan Donques Neves ex-jogador Bank Summa ida tempu okupasaun Indonesia.

Donques Neves mos dehan katak iha tempu uluk, biar osan la barak hanesan agora no dala-barak responsavel klubu sira ba esmola tun-sae hodi sustenta movimentu klubu sira, maibe jogu eziste duni. No husi ezistensia jogu futebol sira ne’ebe sei amador (amatir) hela no seidauk profesional, maibe futebol dezenvolvidu duni hodi hamosu ekipa selesaun famozu iha tempu ne’eba hanesan Bank Summa nomos jogador timor-oan barak mak joga iha klubu sira iha Indonesia hanesan Milo Isac, Miro Baldo Bento, João Bosco, Luis no seluk tan. “No sira laos joga deit iha klubu iha Indonesia, maibe mos joga iha ekipa selesaun nasional Indonesia hanesan Miro Baldo Bento ne’ebe sai top-score iha Tiger Cup tinan 2000”, dehan Martinho Sequeira ne’ebe nudar responsavel ba klubu Miro nian iha Timor-Leste, Sporting Taibessi.

Independensia: “Futebol mate-moris”

Ispiritu ba futebol husi populasaun sira la mate bainhira iha tinan 1999 Indonesia ha’rahun Timor-Leste ho operasaun “bumi-hangus”. Bainhira Timor-Leste sei iha ‘ahuk-desan” laran, futebol hahu moris-hikas fali kedas. No nudar nasaun ida ketak ona ho Indonesia, maka Timor-Leste mos iha inisiu halo kedas prosesu hodi bele sai membru FIFA (Federasaun Futebol Internasional). Tuir Francisco Amaro ex-Vise Presidente FFTL momentu ne’eba, katak atu preenxe rekezitu hodi FFTL bele sai membru FIFA mak tenki iha kompetisaun iha rai-laran. No momentu ne’eba, iha tinan 2003 mosu klubu futebol nain-22 ne’ebe organiza malu hodi realiza Pra-Liga iha tinan 2003 – 2004. “Iha tempu sei defisil hela, klubu sira tau osan hamutuk hodi realiza kompetisaun hodi hatudu evidensia ba FIFA atu bele simu FFTL sai membru FIFA”, konta Sr. Amaro ne’ebe momentu ne’aba nudar mos Presidente Pra-Liga.

Tuir Edgar Gusmão responsavel ida husi AD Esperança no momentu ne’eba nudar mos Vise I ba Pra-Liga ne’ebe eleje husi klubu nain-22, konta katak klubu sira selu osan rezistu atu tuir kompetisaun $100,- no osan kontribuisaun ba kompetisaun $500,-. No alemde ne’e, kada klubu tenki hatama osan garantia iha FFTL ho montante $2.000,- Osan garantia ne’e bele foti fali bainhira kompetisaun remata. “Ami husi klubu sira antusias atu realiza kompetisaun ne’e ho ami nian kbiit rasik. Momentu ne’eba seidauk iha orsamentu husi Estado nomos subsidiu husi FIFA. Ami ho vontade boot realiza duni Pra-Liga hodi bele preenxe rekezitu hodi bele rezistu sai membru FIFA”, dehan Adgar Gusmão.

Edgar mos konta katak jogu iha Pra-Liga konsege remata duni hodi hetan klubu nain-8 ne’ebe sei kompete iha Liga Nasional tuir rekezitu FIFA nian. Klubu 8 ne’e mak FC Fima Sporting – Baucau, FC Porto Taibessi, FC Cafe Ermera, FC Zebra Baucau, FC cacusan Becora, AD Esperança Dili, FC Rusa Fuik Bairo Pite Dili, no FC Irmãos Unidos Lospalos.

No husi realizasaun Pra-Liga ne’e mak depois FIFA bele verifika rekezitu husi proposta FFTL hodi simu sai membru FIFA iha tinan 2004. Momentu FIFA simu FFTL sai membru ho kondisaun katak FFTL sei kontinua realiza Liga Nasional ne’ebe sei partisipa husi klubu 8 ne’e. Maibe infelizmente promesa FFTL ne’e la hetan kumprimentu, tanba depois-de FFTL nunka konsege realiza Liga Nasional no ha’mosu tan problema osan ho klubu sira. “Osan garantia ne’ebe ami klubu sira garantia hela iha FFTL, só klubu balu deit mak konsege foti fali, maibe klubu seluk la konsege foti fali hanesan ami-nian FC Santa Cruz”, dehan Francisco Pereira, responsavel ida husi FC Santa Cruz. Nia hatutan tan katak, “Ami tenta dala-hirak ona ba husu Sr. Chico Kalbuady atu entrega osan ne’e, maibe nunka hetan suksesu”.

Desde FFTL sai membru FIFA kompetisaun iha rai-laran mos lao rungu-ranga. FFTL sira nunka konsege tan realiza Liga hanesan rekezitu nudar membru FIFA, no depois aprezenta deit razaun sira ne’ebe la justifikativu. “Durante ne’e ita rona husi FFTL katak sira labele realiza Liga Nasional tanba klubu sira laiha kbiit tuir rekezitu FIFA, katak tenki iha orsamentu no kampu rasik. Ne’e razaun ne’ebe la justu! Ita bele realiza liga nafatin biar ita nian kondisaun klubu sira sei amador. Pra-liga deit ita bele realiza, kok liga labele fali?”, kestiona Martinho Sequeira, responsavel FC Sporting Taibessi.

Nune mos tuir Edgar Gusmão katak FFTL tenta buka razaun atu justifika sira-nian inkapasidade ne’e hodi dehan katak ita nian kondisaun só bele halao deit kompetisaun entre asosiasaun sira hanesan uluk tempu Indonesia Perserikatan sira no laos entre liga klubu. Maibe razaun ne’e deit la konvensidu. “Sira dehan labele halo Liga, maibe bele mak jogu entre 13 asosiasaun deit. Maibe ne’e razaun inventadu deit, tanba de-faktu desde tinan 10-resin la eziste kompetisaun regular entre asosiasaun”, lamenta Martinho Sequeira.

Hanesan publiku akompaña katak dala ruma deit mak FFTL realiza kompetisaun ruma, maibe kompetisaun sira ne’e mos la konsege remata ho suksesu, hanesan iha tinan 2014 liu ba FFTL halao kompetisaun entre asosiasaun 14, ne’ebe ikus paradu tiha no hetan protestu husi ofisial Asosiasaun Dili Leste, João Mintha.

Tuir Martinho Sequeira katak durante ne’e FFTL alemde laiha kbiit atu organiza kompetisaun nomos laiha vontade no vizaun diak kona-ba dezenvolvimentu futebol. Desde FFTL sai membru FIFA laiha tan liga no dala-ruma deit mak eziste jogu maibe laiha kontinuasaun. “Iha tinan hirak liu ba, FFTL halao duni torneiru “Taxa Presidente, momentu sei Xanana Gusmao sei Presidente, no partisipa husi klubu 21, maibe depois-de ne’e laiha ona, nune klubu sira mos mate”, dehan Martinho Sequeira.

Tuir Edgar Gusmao katak kleur tiha FFTL la realiza kompetisaun no foin halao fali mak iha tinan 2010 sira halao ho sponsor husi Kompanhia DIGICEL. Kompetisaun ne’ebe FFTL halao ne’e ho naran “DIGICEL Cup”, no momentu ne’eba Asosiasaun Dili Leste mak sai vensedor. No tuir fali paradu tiha fali no foin mak realiza fali iha 2014 tinan kotuk ne’e mos tanba presaun husi publiku relasiona ho Orsamentu Geral Estado ne’ebe aloka ba FFTL iha tinan 2013 ho montante $500.000,- tuir fali iha tinan 2014 ho montante $1.000.000,-. Maibe realizasaun kompetisaun 2014 ne’e mos “arbiru” deit nune mak mosu protestu husi ofisial sira husi Asosiasaun Dili Leste.

“Ironiku tebes, agora FFTL hetan osan barak, maibe labele halao kompetisaun regular. Uluk tempu susar, ita bele halao kompetisaun regular. Hau uluk tempu Indonesia joga iha klubu Mutiara Timur iha ekipa junior, depois joga bebeik mak foin halibur iha ekipa senior iha Carsae FC”, dehan Ze Luis Oliveira.

Agora dadauk FFTL hetan osan husi fontes oin-oin. Alemde hetan alokasaun husi OGE, FFTL mos hetan osan husi publikasaun (iklan) Timor Telekom (TT) no Digicel iha tinan hirak liu ba. Nune mos FFTL desde tinan hirak ona hetan ajudu osan husi AFC no FIFA. Tuir relatoriu ne’ebe publika iha Website FIFA katak tinan-tinan FFTL hetan subsidiu husi FIFA atu realiza sira nian programa kompetisaun oin-oin hanesan kompetisaun futebol junior, femenina, futsal no senior.

    
Tanba preukupa ho laiha kompetisaun futebol afeta nagativamente ba jovens sira ne’ebe iha talentu futebolista, maka husi “Comite 12 Novembro” foti inisiativa atu organiza kompetisaun. “Nudar lider jovens, ami senti triste katak FFTL la funsiona atu dezenvolve talentu futebolista juventude timorense. Tanba ne’e mak ho ami nian kbiit ne’ebe limitadu, ami hakas-a’an atu hamoris jogu futebol iha nasaun doben ne’e”, dehan Rogerio, Vise Presidente Comite 12 Novembro.

“Comite 12 Novembro” realiza ona kompetisaun ba dala-uluk iha tinan 2009 liu ba ne’ebe partisipa husi ekipa futebol husi asosiasaun 13. No kompetisaun ne’e kontinua iha tinan 2013 liu no agora dadauk “Comite 12 Novembro” perpara atu realiza tan kompetisaun iha tinan ne’e.

“Kompetisaun regular ne’e importante, no kompetisaun ne’e nudar instrumentu ba “pembinaan” (dezenvolvimentu) futebol iha nasaun ida. Sé kompetisaun laiha, maka hanesan deit laiha dezenvolvimentu futebol iha nasaun ida”, dehan Donques Neves ne’ebe agora dadauk hetan fiar atu kaer Komisaun Organizadora Copa “12 Novembro” tinan 2015.

Problema iha husi laiha kompetisaun ba ha’mosu irregularidade ba formasaun ekipa selesaun nasional. Durante ne’e publika akompaña katak FFTL sempra haruka ekipa nasional hodi ba tuir jogu internasional sira iha rai-liur ka joga iha ita nian kampu, Estadium Munisipal Dili. Maski ekipa nasional Timor-Leste partisipa iha iventu internasional oin-oin hanesan pra-kualifikasaun Copa Mundial, Tiger Cup, Sea Games, no seluk tan, maibe ekipa nasional ne’e sempre hetan kritika husi parte balu – liuliu husi grupu AMANTES Futebol Timor-Leste. Porta-voz AMANTES, Ze Luis Oliveira dehan katak jogador ekipa nasional ne’e la merese bolu ho naran Selesaun Nasional. “Jogador sira ne’ebe FFTL tau ba joga ne’e la merese ita bolu Selesaun Nasional. Tanba sira ne’e selesiona husi ne’ebe? Husi kompetisaun? Kompetisaun iha ne’ebe? Husi klubu sira, klubu ne’ebe?”, kestiona Ze Luis.

Tanba laiha kompetisaun, maka ekipa nasional ne’e formadu husi jogador sira ne’ebe Dirijente FFTL koñese deit no husi jogador naturalizasaun falsu husi Brasileiru sira. Tuir Edgar Gusmao katak jogador sira ne’ebe FFTL hili ba joga iha Ekipa Nasional ne’e mai husi Centro Juvenil fatin tolu deit, husi SLB Laulara (klubu maun Xanana Gusmao nian), husi Dili Leste no Dili Oeste. “Selesaun nasional labele kompostu deit husi fatin tolu ne’e. Oinsa ho jogador talentu sira husi distritu seluk? Naun-me-digas sira laiha opurtunidade atu joga hodi defende Nasaun Timor-Leste?”, lamenta Edgar.

Kona-ba jogador “Ekipa Nasional” mos dala-barak infrenta problema oin-oin. Tuir Domingos “Dukai” Belo ex-jogador ekipa nasional iha tinan 2005 katak dala-barak ofisial FFTL sira trata jogador timor-oan sira la ho dignidade. “Uluk ami atu ba joga, sai bis ba Kupang mak semo ho aviaun ba Bali, enkuantu lider FFTL sira ba ho fen sira sai aviaun ba Bali. Nomos dala ruma, ami jogador toba iha hotel nian varanda deit, tanba lider FFTL sira la preukupa ami nian kondisaun. Sira selu honorarium deit halo diskriminasaun entre ami ho jogador malae sira. Bainhira ami joga iha Sea Games Jakarta, jogador malae sira lider FFTL fo sapatu diak, enkuantu ami nian ida nebe baratu, nune mos malae sira hetan honoraium boot tebes $2.000, enkuantu ami hetan deit $200”, Dukai konta.

Desde tinan 2014 liu ba AMANTES Futebol mosu hodi halo protestu ba jogador ekipa selesaun nasional ne’ebe mak domina liu husi “marseneiru” (tentara bayaran) husi Brasil. No tratamentu espesial ba “marseneiru” sira ne’e, alemde hamosu diskriminasaun ba jogador timorense, nomos ameasa fama Nasaun Timor-Leste. Tuir Ze Luis Oliveira, porta-voz AMANTES katak irregularidade ne’ebe akontese iha jogador selesaun nasional bele ha’foer naran nasaun Timor-Leste. “Jogador marseneiru husi Brasil sira mesak falsu deit, ka sira hetan naturalizasaun la tuir lei Sidadania Timor-Leste nomos viola regulamentu FIFA. No ne’e bele hamosu situasaun ne’ebe aban-bainrua ekipa nasaun seluk la satisfeitu se karik ita manan, no sira bele halo prosesu ba tribunal atu anula rezultadu jogu. Tanba ita joga ho jogador falsu”, dehan Ze Luis.

Ze Luis mos lamenta tebes ba lider orgaun soberania Estado Timor-Leste ne’ebe hatene ona problema ne’e, maibe hanesan laiha kbiit atu foti desizaun hodi salva patrimoniu nasional no husik hela ema irresponsavel sira uza ba interese privadu. “Organizasaun FFTL ne’e agora viola tan Kodigu Sivil no Estatuto rasik hodi la realiza kongresu ne’ebe loloos ne’e iha fulan Setembru tinan kotuk, maibe hotu-hotu nonok deit”, lamenta Ze Luis.

Nudar modalidade desportu ne’ebe popular liu, dezenvolvimentu futebol iha nasaun doben ne’e bele fo “retornu sosial” ne’ebe boot liu. Tuir Ze Luis katak, dezenvolve futebol laos deit atu buka manan, maibe dezenvolvimentu futebol ne’ebe liu husi kompetisaun regular sei forma juventude timorense sira atu bele iha isin diak no ispiritu forte  ne’ebe importante tebes ba dezenvolvimentu nasaun ne’e. “Liu husi futebol, joven sira aprende atu kompete ho justu, motiva jovens sira atu defende nasaun ho onestidade, no haburas patriotismo”, dehan Ze Luis.

Lee kontinua... 0



Dili, TEMPO SEMANÁL – Iha Dezembru 2014, Federasaun Boxing Timor-Leste (FBTL) kontinua marka istoria boxing iha nasaun ho julukan Lafaek ne’e, liu husi kampionatu mundial ne’ebé vensedor ba kampionatu mundial Asia Pasific ne’e maka Francisco Lisboa, boxista Timor oan ho naturalidade Vikeke.

“Hanesan Timor oan ita orguillu tanba FBTL konsege  realize kampionatu internasional ida iha Dili, ne’ebé partisipa mós husi nasaun boxista sira hanesan Indonezia no Filipina. Orguillu liutan tanba, ema husi Indonezia, Filipina, Australia no nasaun seluk tan hateten katak, Timor-Leste iha pontensialidade boxista”.

“Ita-nia federasaun boxista iha Timor-Leste la hanesan ho federasaun boxista iha Filipina ou iha europa neba. Maibé ita orguillu tanba ho kondisaun ida mínimu ne’e ita konsege marka istoria foun iha mundu boxista nian”.

Atu hatene di’ak liutan dezemvolvimentu modalidade boxista iha Timor-Leste, tuir mai akompana deit intervista eskluzivu TEMPO SEMANÁL ho senhor Joel Maria, nu’udar Sekretariu Jeral ba Federasaun Boxing Timor-Leste.

TS : Bele konta oituan  lalaok Boxing  iha Timor-Leste daudaun ne’e to’o iha faze ida ne’ebé no oinsa ita-nia involvimentu iha federasaun ne’e?

Sekjen FBTL : Iha tinan 2009 Asosiasaun Boxing Profesional Timor-Leste halo kongresu, sira eleitu ha’u nu’udar Sekretariu Jeral, depois iha Fevereiru 2013, Federasun Boxing Amador halo kongresu, sira eleitu ha’u hanesan Sekretariu Jeral ho pakote Prezidente maka Jeneral Lere.

Ita haree fila fali ba kotuk ho ita-nia istoria ne’ebé iha hatudu katak, ita iha potensialidade boot iha boxing nian kompara ho modalidade sira seluk, tanba ita iha prestasaun ne’ebé di’ak liu.

Hanesan iha durante okupasaun Indonezia iha Timor-Leste, ita iha boxista barak tantu iha amador liu-liu iha boxing profesional. Ita iha boxista ne’ebé konsege marka istoria ne’ebé ita ho Indonezia rasik labele haluha katak, boxista ida ne’ebé konsege lori Indonezia-nia naran, hodi hadau kampionatu mundial maka Tomas Americo.


I depois iha mós boxista profesional sira seluk hanesan Francisco Lisboa husi Vikeke, ne’ebé sai segundu kampionatu Asia Pasific depois de saudozu Tomas Americo. Alende ne’e, iha mós boxista pontesial sira seluk hanesan Amrozi Fernandes, Gil Roberto Santos no sira seluk tan.

Iha parte boxista amador, ita sei iha legenda moris sira hanesan Vitor Ramos, Rogerio Amaral, Abrao Quintas. Sira ne’e nu’udar membru penghuni ba iha Pusat Latihan Nasional Palapas Indonezia.

Tanba ne’e, depois de independensia, maluk boxista sira ne’ebé uluk hetan prestasaun di’ak, sira koko halibur malu hodi harii fila fali Federasaun Boxing Amador iha Timor-Leste hodi eziste to’o ohin loron. Nune’e ha’u hanesan Sekretariu Jeral, ami koko para hala’o atividade boxista nian, aumesmu tempu buka suporta para  atividade boxista ne’e bele la’o ba oin.

Husi parte boxista amador ne’e rasik, hahú husi 2009 ita konsege estabelese federasaun boxista profesional, no ita konsege kria relasaun di’ak ho nasaun vizinu sira. Tanba ne’e maka, ita konsege hala’o kampionatu mundial boxing profesional.

Kampionatu mundial ne’e foin hala’o iha Dezembru 2014, ne’ebé marka istoria boot ida. Tanba koalker modalidade iha Timor-Leste, nungka hala’o iventu internasional iha rai laran. Liu-liu kampionatu internasional ne’e hala’o iha tempu ida ne’ebé mak ema hotu-hotu pesimista katak, Timor oan husi modalidade ka atleta sira kandu ba partisipa iha iventu internasional, ita sempre lakon iha babak primeiru kedas.

Maske nune’e, modalidade boxing marka istoria ketak ida, tanba ita konsege hamosu kampionatu mundial ida iha Timor-Leste, ne’ebé desde uluk kedas nungka akontese. Iha jogus ne’e, saudozu Tomas Americo koko para atu hadau kampionatu mundial ne’e  maibé la konsege. Maibé Francisco Lisboa konsege sai kampionatu Asia Pasific. Ida ne’e sai orguillu boot ida mai ita nu’udar Timor oan.

TS : Baibain atleta sira ladun koileta rejultadu di’ak iha kompetisaun nivel internasional, tanba tuir sosiedade ninia haree katak, responsavel atletizmu sira ladun fó atensaun di’ak ba sira-nia membrus liu husi  hadia sira-nia mental, fiziku no profesionalidade. Oinsa ho federasaun boxista rasik?

Sekjen FBTL : Se ita hakarak ko’alia ho onestu konaba apoiu fasilidade no rekursu ne’ebé iha, ha’u bele dehan ita seidauk bele to’o iha estandarte loloos. Maibé ita tenke kumpriende katak, rekursu liu-liu finansiamentu ba area desportivas sei limitadu. Maibé tanba ita nasaun foun, ita moris iha situasaun ke ita lebele haluha.

Ko’andu ita haree ba orsamentu estadu nian ba iha area desportus, ne’e sei dok husi estandarte seharusnya. Maibé ita labele fó sala ba guvernu, tanba guvernu iha prioridade seluk ne’ebé boot liu iha setores mak hanesan, edukasaun, saúde, infraestruktura no agrikultura. Setores sira ne’e sai hanesan setores mais prioridade iha politika guvernu nian.

Guvernu liu husi Sekretariu Estadu Juventude no Desportu, fó apoiu ba aktividades desportiva sira, tuir kbiit ne’ebé sira iha. Ha’u hakarak dehan, durante ne’e guvernu fó ona apoiu no iha kolaborasaun di’ak ho federasaun hotu-hotu, liu-liu federasaun sira ne’ebé maka hakarak hatudu ba guvernu katak sira bele halo buat ruma ba dezemvolvimentu desportivus iha Timor-Leste.

Husi parte federasaun boxista nian ha’u bele dehan katak, guvernu fó apoiu mai ami tuir kapasidade guvernu nian. Maibé modalidade boxista konsege hatudu ona katak, maske ho kapasidade no apoiu ne’ebé limitadu, maibé federasaun boxista konsege halo buat ruma ne’ebé bele hatudu ba liur katak, la’ós ho osan maka ita bele rezolve buat hotu. Tanba se ita halo ho espiritu nasionalizmu, maske ho apoiu uituan maibé ita konsege halo buat ruma.

Tuir ha’u-nia haree, tanba ha’u koñese boxing desde kiik to’o agora i ha’u mai husi familia boxista, ne’ebé ha’u hakarak dehan katak, osan importante maibé importante liu maka espiritu no esperansa.

Tanba iha nasaun barak hatudu katak, mezmu ho rekursu ne’ebé menus maibé sira konsege hamosu boxista hirak ne’ebé maka iha prestasaun di’ak iha mundu. Purezemplu Cuba, ema hotu hatene katak sira ekonomikamente hetan sansaun husi Amérika.

Maibé ko’andu ko’alia konaba boxing amador, sasukat iha mundu desde uluk to’o ohin loron nian maka Cuba. Ne’e tanba sira iha politika ne’ebé klaru iha area desportivus liu-liu dezemvolvimentu modalidade boxista.

Ita iha Timor, ita-nia saudozu Tomas Americo hatudu prestasaun di’ak no marka istoria boxista nian, maibé susesu ne’e atinjidu la’ós tanba apoiu fasilidade ne’ebé di’ak hanesan iha Amérika ho ninia boxista Floid Myweder, Mani Paqueao iha Filipina.

Iha Elias Pical nia tempu, Tomas Americo nia tempu, Francisco Lisboa nia tempu, sira susesu iha fasilidade ne’ebé seadanya. Mas tanba sira disiplina ho espiritu forte maka lori sira ba marka istoria iha mundu boxista nian.

TS : Maibé disiplina ne’ebé ita hakarak ne’e disiplina ba boxista deit ka disiplina mós ba estrutura tomak boxista nian inklui ninia lideransa sira?

Sekjen FBTL : Disiplina iha parte hotu, iha parte boxista, lideransa no treinador sira. Signifika katak, iha modalidade boxing nian koandu iha disiplina ne’ebé forte, iha nasionalizmu no espiritu forte, entaun ita bele halo. Klaru ke fasilidade, orsamentu sai sasukat importante iha dezemvolvimentu desportu inklui boxing. Maibé ida ne’e la’os satu-satunya faktor.

TS : Iha kampionatu mundial 2014 ne’ebé hala’o iha GMT Dili, sosiedade kestiona konaba orsamentu ba iventu internasional ne’e. Karik iha problema ruma ho ezekusaun?

Sekjen FBTL : Ha’u hakarak dehan katak, foin daudaun ne’e atu kompara orsamentu ne’ebé guvernu fó ba iha modalidade sira seluk  ne’ebé boot tebe-tebes, maibé orsamentu ba boxing nian uituan liu. Se ita atu temi los karik, dala ruma ema bele dehan ho osan ne’ebé maka uituan ne’e ita bele halo kampionatu mundial ida.

Mas hanesan ha’u dehan ona, ita labele haree buat ne’e ho osan, tanba ho guvernu-nia komitmentu liu husi Sekretariu Estadu Juventude no Desportu ne’ebé forte, relasaun familia entre familia boxing Timor nian nomos nasaun sira seluk. Buat sira ne’e fó mai ita kbiit hodi realiza iventu boot ida ne’e maske ho orsamentu kiik.

TS : Ita haree modalidade sira seluk purezemplu fute bola nian, treinador mai husi rai seluk. Karik federasaun boxing mós hanoin atu komvida treinador husi rai liur hodi fó treinamentu ba boxista sira iha Dili?

Sekjen FBTL : Ohin loron husi Federasaun Boxing Amador rasik hetan apoiu treinador husi Cuba, liu husi servisu hamutuk entre estadu Timor-Leste ho Cuba ne’ebé hala’o tiha ona iha tinan hirak ba kotuk. Iha parte profesional nian, iha kubu balu hanesan Tomas Americo, sira uza sira-nia rekursu rasik i halo kontratu ho treinador husi Indonezia para mai fó treinamentu ba sira-nia boxista sira.

Ba tempu oin mai, tuir ami-nia planu hamutuk ho Sekretariu Estadu Juventude no Desportu, ami iha ona ligasaun ho Federasaun Boxing Amador Indonezia nian (Pertina), atu asina akordu ida atu oinsa bele kria kolaborasaun hodi dezemvolve boxing.

Tuir planu, iha fulan Abril nia laran, ekipa nasional husi Timor-Leste sei ba halo try out iha torneiu ida ne’ebé maka koñesidu President Cup iha Palembang. Iha neba ita sei prepara asina akordu entre Federasaun Boxing Amador Timor-Leste ho Pertina Indonezia.

Tanba ne’e, husi parte guvernu nian ita-nia Sekretariu Estadu Juventude no Desportu sei sai sasin iha asina akordu ne’e. Ida ne’e hanesan kontinuasaun husi 2008 ne’ebé estrutura ida uluk asina tiha ona, maibé agora ita renova fila fali para atu haree oinsa ba futuru ninia implementasaun ne’e bele la’o di’ak liu.

TS : Iha federasaun boxing ne’e rasik iha klase hira?

Sekjen FBTL : Tuir estandarte nasional no internasional iha klasifikasaun tolu, ne’ebé maka iha klase primeiru naran Youth, depois Junior no ikus maka Senior. Purtantu iha kada nivel iha klase i klase sira ne’e mós bazea ba todan purezemplu husi 49kg depois husi 49kg to’o 52kg to’o 64kg. Ida ne’e klasifikasaun todan ba boxing amador.
   
TS : Entre klase hirak ne’e, klase ida ne’ebé maka sira-nia partisipasaun iha kampionatu nivel internasional ne’e makaas liu?

Sekjen FBTL : Depende ita haree ba kiblat ne’e ba iha benua ne’ebé. Tanba se kiblat ne’e iha Asia, ita haree katak genetikamente ema Asia  ninia todan maximu 74kg, entaun iha nivel Asia nian, klase-klase kiik paling rame.

Purezemplu, Mani Paquaeo hahú ho ninia todan husi klase 50kg fly wight. Maibé nia sai kampionatu mundial iha klase lima ne’ebé  la hanesan. Nia hahú husi klase 50kg to’o agora nia sa’e to’o klase 74kg wealter wight.

Mas agora se ita haree fali ba Amérika ne’ebé genetikamente ema-nia todan as liu Asia, entaun klase ne’ebé maka kompetisaun makaas ne’e iha klase sira 57kg ba leten, liu-liu iha klase 70kg, 74kg ka kalse heavy weight. Tanba ne’e maka ita koñese boxista koinesidu sira hanesan Floid Myweder junior ne’ebé mak hela iha klase 74kg. Klase ida ne’e maka sai klase ida karun tebe-tebes iha eropa hanesan iha Amérika.

Ita bele haree Floid Myweder  ne’ebé atu sae ring ho Mani Paquiao iha dia 2 de Maiu 2015, osan ne’ebé atu investe ba boxista nain rua ne’e deit maka USD300 miloens. Osan ida ne’e boot liu orsamentu ne’ebé aloka ba ministeriu sira iha Timor-Leste.

TS : Se Mani Paquiao ultrapasa klase lima laiha intendimentu, iha Timor boxista balu liu klase hira?

Sekjen FBTL : Iha nivel nasional se ita hakarak ko’alia ho onestu karik, boxing ne’e iha potensia modalidade boot atu fó ba nasaun. Maibé se enkoandu ita ko’alia ba iha nivel rejional, hanesan tinan kotuk koandu ami hala’o kampionatu mundial, maluk sira husi Filipina, Indonezia mai partisipa iha kampionatu ne’e.

Ita bele imazina katak, sira ne’ebé mai husi Filipina, sira ne’e mai husi nasaun Mani Paquiao nian, sira hateten Timor-Leste iha pontensialidade boxista. Tanba iha durante inventu ne’e, sira haree labarik kiik sira ho idade 8 to’o 14 anus, menikmati tebe-tebes iventu ne’e. Entaun sira haree husi labarik sira-nia ekspresaun oin, entaun sira foti konkluzaun katak, afinal iha Timor iha pontensialidade boot.

Maluk sira husi Australia mós fó ekspresaun ne’ebé hanesan, tanba bainhira sira haree Timor oan sira liu husi treinu. Ne’e sira fó konkluzaun katak, Timor-Leste iha potensialidade boot ba boxing.

Neduni ha’u hakarak hateten deit katak, se enkuandu situasaun ne’e favorese, maka ita sei bele halo, dala ruma la boot hanesan saida maka Mani Paquiao halo iha klase lima berbeda mas pelu menus ita hatudu deit katak ita bele berbicara iha parte rejional, ha’u komfia katak ita bele.

TS : Se nune’e, saida maka Federasaun Boxista Timor-Leste  halo hodi atrai joven sira atu involve an iha boxing?

Sekjen FBTL : Atu atrai joven sira klaru tenke liu husi atividade jogu, tanba boxista ida koandu tuir treinu, nia la’os tuir treinu deit maibé nia mós bele joga. Husi parte seluk, presiza apoiu husi ema hotu nian, liu-liu husi Guvernu, seitor privadu, sosiedade no familia tomak. Tanba sekoandu atividade boxing iha rai laran bele la’o ho di’ak tanba hetan apoiu husi partes hotu, ne’e ha’u bele garante katak ita bele.

Dala ruma ha’u imazina, sekoandu guvernu bele investe USD100 mill kada tinan ba boxing, tanba ha’u hatene katak iha federasaun balu guvernu fó liu USD100 mill. Mas enkuandu boxing maka hetan USD100 mill kada tinan, ne’e boxing bele halo buat ruma ba nasaun. Ha’u fiar tanba esperiensia hatudu katak, mesmu ho osan kiik maibé boxing bele halo buat ruma ona ba nasaun ne’e.

TS : Iha modalidade balu  hanoin ona atu loke eskola  iha Timor-Leste. Karik Federasaun Boxing hanoin mós atu loke eskola boxing iha Timor-Leste?

Sekjen FBTL : Iha V Guvernu nia tempu, ami koalia ona ho Sekretariu Estadu Juventude no Desportu, atu harii Sentru Treinamentu ba Boxing. Mas dala ida tan, dala ruma ita bele iha planu atu halo buat barak, maibé rekursu orsamentu ne’ebé limitadu ne’e bele sai impedimentu ba iha ita-nia mehi.

Maske nune’e ha’u sempre fiar katak, mezmu susar maibé labele lakon esperansa. Tanba importante liu maka unidade iha federasaun nian tenke forti nafatin, atu nune’e ita bele hatudu ba sosiedade no guvernu katak, boxing bele halo buat ruma nasaun ne’e iha area desportivus.

TS : Atletas hotu-hotu iha mundu, sira-nia responsavel koidadu atleta sira-nia fiziku liu husi aihan ho vitamina. Oinsa ho boxista Timor nian, karik federasaun prepara aihan ho vitamina ne’ebé sufisiente ba boxista sira?

Sekjen FBTL : Iha faktores barak mak sai fator determinante ba prestasaun atleta sira nian. Purezeplu,  fator nutrisaun, maneira treinamentu, apoiu fasilidade. Buat sira ne’e hotu sai fatores ida ne’ebé maka bele hamosu prestasaun atleta sira nian.

Maibé ita tenke realistiku, tanba guvernu tenta fó apoiu tuir kbiit guvernu nian. iha federasaun nia laran mós klaru iha hanoin atu fó apoiu ne’ebé di’ak ba atleta sira. Tanba klaru katak, lideransa ida koandu nia kaer federasaun, nia tenki iha ambisaun atu halo buat di’ak ba federasaun.

Maibé ita tenke realistiku tanba iha tinan kotuk se ha’u bele temi karik iha valor subsidi ne’ebé ami hetan maka USD20 mill. Osan ida ne’e se ita konta, ita atu halo saida. Tanba ita atu  tau matan ba boxista sira, apoiu  fasilidade depois o tenki halo nusa jere sistema administrasaun federasaun nian. ne’ebé ho osan kiik ne’e ita atu halo saida.

Joga deit mós ho USD20 mill ho labele espera katak jogu atu halo dala rua iha nivel nasional no rejional. Tanba koandu atu halo joga la’os ho osan uituan, tanba o tenke selu boxista, selu komisaun organizadora, selu ofisiais no bua seluktan. Ho despeza sira hanesan ne’e, o seidauk koalia konaba apoiu akipamentus ba klubu, ba asosiasaun, entaun ita la konsege.

Mas iha tinan kotuk depois de ha’u asumi kargu Sekreteraiu Jeral, ha’u halo politika ida katak, osan ne’ebé mak uituan iha tempu neba, alende halo joga, ami mós koko para atu buka apou ba iha klubu sira ne’ebé maka presiza tebes. Tanba atu koalia konaba presiza ne’e, klubu hotu-hotu, asosiasaun hotu-hotu iha rai laran ne’e presiza, mas ida ne’ebé mak presiza tebes.

Tanba klubu balu hakarak hala’o aktividade maibé ekipamentu baziku tebes mós laiha, entaun ita bele fó apoiu sem pursentu ba sira, maibé hanesan ikan ida karik ita soe hela deit kail ba sira.

Tanba ne’e maka ami hamutuk ho Jeneral Lere, ami tenta halo politika ida katak, alende halo jogu, ita mós tenta atu prepara apoiu ekipamentu balu ba klubu. Depois iha mós terobosan ida ne’ebé husi parte boxing nian koko atu  dezemvolve, tanba ami ko’alia ona ho Primeiru Ministru anterior, nia aseita konaba oinsa bele adeptu sira, komunidade sira, koandu ba haree iventu sira hanesan ne’e, bele fó sumbangan ruma ba iha federasaun liu husi sosa bilete.

Tanba ne’e maka wainhira implementasaun kampionatu mundial iha Dezembru tinan kotuk, ami fan karcis ba jogu amatir nian USD1.00 no ba iha boxing profesional nian maka USD5.00 no USD10.00. Iha neba saida maka akontese di luar ami-nia espektativa tanba penonton adeptu mós barak ba asiste.

Ida ne’e sai sasukat ida katak ita komunidade Timor ne’e iha interese ba boxing, tanba sira la menolak koandu federasaun halo buat ruma para bele eleva liutan federasaun ninia kbiit hodi tau matan ba boxista sira. Neduni, ba oin ita tenke eduka ona ita-nia povu para bele fó apoiu ba federasaun desportiva sira, liu-liu iha parte boxing nian, atu nune’e federasaun boxista ne’e bele la’o di’ak liutan ba futuru.

Se lae ita depende deit ba guvernu, i koandu ita depende deit ba guvernu maka ita sei la la’o di’ak ba oin. Entaun ita-nia sosiedade tenke fó apoi no seitor privadu mós tuir loloos ne’e tenke fó apoiu. Tanba ita bele haree desportu iha rai barbarak konsege abansa ba oin ne’e tanba apoiu makaas husi seitor privadu.

Purezemplu ita koalia konaba Bola, iha Indonezia sira halo liga bola ida naran Jarum Super Legue. Ne’e katak, sira investe ba iha bola mas ida ne’e sai bisnis ida tanba alende sira investe, sira mós hetan osan husi neba. Ne’ebé tanba sa maka Timor labele? Karik tanba ita-nia koñesimentu maka la to’o karik ou tanba balu haree desportu ne’e hanesan sekedar gosta deit.

Mas la’os seitor privadu hotu iha Timor-Leste la fó apoiu. Iha ida rua purezemplu, Dellos ativa tebe-tebes fó apoiu ba federasaun boxing  iha Timor-Leste. Sira ho laran ksolok apoiu federasaun, ne’e la’os atu promove Dellos, mas hakarak onestu katak setor privadu balu iha ona interese atu fó apoiu. Kestaun mak ne’e, se Dellos bele, nusa maka sira seluk labele. Afinal iha nasaun ida ne’e business man barak mak avansadu ona i balu boot liu Dellos mas ternyata sira labele halo hanesan saida maka Dellos halo.

TS : Konaba guvernu nia apoiu, saida mak pelumenus federasaun ninia komfiansa ba Sekretariu Estadu Juventude no Desportu foun bele halo ba federasaun sira liu-liu ba Federasaun Boxing Timor-Leste?

Sekjen FBTL : Ba ha’u pesoal koandu ha’u hetan kargu Sekretariu Jeral, ha’u hanoin ona katak iha buat barak mak ita tenke halo. Liu-liu konaba problema internal. Tanba ne’e maka depois de simu kargu ne’e, ha’u ho Prezidente federasaun, Jeneral Lere, ami-nia komitmentu primeiru ne’e maka, hadia uma laran para sai baze ida atu la’o ba oin.

Ezemplu, uluk federasaun iha estatutu mas laiha lei organiku. Entaun halo nusa maka o bele maneza lalaok no atividade federasaun nian se enkuandu regras laiha. Ne’e imposible, tanba situasaun hanesan ne’e  bele halo ema ida-idak uza nia poder rasik hodi intervein no ikus mosu nepotizmu, kolusaun no korrupsaun. Tanba ne’e maka ami hadia ona situasaun sira ne’e.

I depois, prosesu tranparensia iha orsamentu, maneira saida deit ami koalia aberta katak, orsamentu husi guvernu sekian para ema hotu-hotu tenke hatene. Ita servisu ba rai ida ne’e, entaun tenke iha hanoin ida ke los. Tanba ne’e maka lei organiku tenke iha para regula ita hotu, tanba ita labele foti desizaun tuir ita-nia hakarak deit.

Purezemplu ha’u hanesan Sekretariu Jeral, ha’u iha direitu atu inpoin buat balu, maibé tenke iha transparensia no tuir regras. Tanba ne’e maka ami tenke hadia uluk uma laran, atu nune’e bainhira jestaun interna di’ak ona, automatikamente guvernu sei fó apoiu. Tanba guvernu sei la fó apoiu koandu jestaun internal ladiak.

Ha’u komprova tiha ona situasaun ne’e, tanba tinan kotuk guvernu fó USD20 mill, mas tinan ida ne’e guvernu hasae tan ona ninia subsidiu ba boxing. Iha iha Natal bersama iha tinan kotuk, guvernu  fó apresiasaun ba boxing. Sekretariu Estadu hateten katak, bxong konsege marka istoria ida ne’ebé maka durante ne’e nungka akontese.  

TS : Daudaun ne’e ita boot asumi kargu Sekretariu Jeral Federasaun Boxing Timor-Leste, aumezmu tempu ita mós asumi kargu balu iha guvernu. Oinsa ita bele fahe tempu?

Sekjen FBTL : Ha’u koalia ida ne’e orsida ema dehan  komflitu de interese,... mas ha’u bele dehan katak, primeiru ha’u involve iha boxing tanba ha’u moris mai husi familia boxing. Ha’u uza inan-aman nia kosar wen husi boxing ne’e maka bele lori ha’u mai to’o ohin loron. Ne’ebé boxing sai nu’udar darah daging tiha ona, maske la’os boxista.

Segundu, tanba hobby mós mak halu ha’u involve an iha boxing. Terseiru tanba bainhira ha’u seidauk tama iha boxing, ha’u haree buat balu presiza hadia iha modalidade boxing ne’e rasik. Tanba ne’e maka nu’udar Timor oan i mai husi ran boxing ne’e duni maka iha panggilan katak se ha’u bele involve an karik hodi hadi’a modalidade boxing tuir kapasidade ne’ebé ha’u iha.

Klaru katak la’os fasil tanba ha’u mós kumpri hela ha’u-nia dever iha guvernu, ne’ebé dala ruma atu fahe tempu ne’e susar. Maibé ha’u tenta tanba buat sira ne’e hanesan fiar ida ne’ebé ha’u simu mai husi asembleia, ne’ebé maka ha’u labele ses.

Ha’u iha prinsipiu ba buat ne’ebé maka ha’u sempre hateten mós ba kolega sira seluk katak, pelu menus ita bele sibuk demais ba mós, iha oras ida ka rua nia laran, ita fó netik tempu atu hanoin konaba boxing. Hanesan ne’e deit mós to’o ona, la’os dehan ita presiza oras 8 nia laran hodi hanoin konaba boxing. Maibé oras ida ka rua deit mós to’o ona tanba, ho nune’e maka ita bele hamosu ideias hodi  kontribui ba dezemvolvimentu boxing iha Timor-Leste.

TS : Saida maka Boxing atu halo iha tinan ida ne’e?

Sekjen FBTL : Tinan kotuk ita halo kampionatu mundial ne’ebé maka iha tempu neba ita halo perebutan sabuk Xanana ka Xanana Golden Belt. Iha tempu neba eis Primeiru Ministru rasik mós hateten katak, nia hakarak halo iventu ne’e iha 2015. Neduni, iventu ne’e sei sai inventu ida ke boot iha tinan ida ne’e.

Ita iha ona jestaun iha boxing profesional nian ne’ebé maka Tomas Americo hanesan boxing promotion. Iventu ne’e sei hala’o iha Juñu ou Jullu nia laran. Purezemplu iha Amérika iha haree Golden Boy Promotion, Top Rank Promotion. Tanba ne’e maka iha Timor-Leste ita iha Tomas Americo hanesan Boxing Promotion.

Maske nune’e keta haluha katak, agora daudaun ita-nia ekipa nasional husi boxing amador sei ba partisipa iha Sea Games. Ne’ebé ha’u bele dehan katak, prontu la’os sombong maibé ami konsege halo gebrakan foun. remata

Lee kontinua... 0
Joomla SEF URLs by Artio

Copyright © 2015 Agora Tempo Intermedia Ltd. All Rights Reserved.
Online since February 01, 2013
Creative Commons License
This work by Tempo Semanal is licensed under a Creative Commons Attribution-NonCommercial-ShareAlike 4.0 International License.

Top Desktop version