Tempotimor (Dili)-Vise-Primeira-Ministra no Ministra Solidariedade Sosiál no Inkluzaun (MSSI), Armanda Berta dos Santos no Ministra Saúde (MS), Odete Maria Freitas Belo, hanesan Prezidente no Vise-Prezidente husi Komisaun Interministeriál ba Elaborasaun no Koordenasaun ba Ezekusaun Planu Vasinasaun kontra COVID-19, aprezenta ba Konsellu Ministrus (KM) kona-ba rezultadu no alterasaun ba implementasaun Planu.

Tempotimor (Dili)-Ministra Saúde (MS), Odete Maria Freitas Belo hatete, Estadu Unidus Amérika (EUA) apoiu tan osan millaun US$1 hodi haforsa servisu kombate Covid-19 iha Timor-Leste.

Tempotimor (Dili)-Governu liuhusi Ministériu Saúde (MS) hamutuk ho liña interministérial sira ba kombate surtu Covid-19 nian hahú diskute no halo preparasaun ba sosa vasina Pfizer, nune'e bele vasina labarik sira ho idade tinan 12 to'o 17.

“Imi hatene katak, to'o agora ita sei nafatin hala'o hela kampaña ita-nia vasinasaun nian, prontu vasinasaun ba adultu sira ita kontinua halo ho vasina AstraZeneca nomós vasina Sinovac e agora dadauk ami ko’alia hela oinsá mak atubele hetan asesu vasina ba labarik sira ou ema ne'ebé mak idade husi 12 anus to'o menus husi 18 anus”, dehan Ministra Saúde (MS), Odete Maria Freitas Belo, iha salaun MSSI, Kaikoli, tersa (03/08).

Tanba ne’e, halo aprezentasaun kona-ba planu no preparasaun husi ekipa téknika sira-nian molok aprezenta ba komisaun interministeriál hodi halo apresiasaun hafoin implementa vasina ba labarik sira.

“Ikus liu ita hakarak mós informa preparasaun ida ne'e ba konsellu ministru. Prontu, felizmente ohin korum ne'e la to'o, entaun ami aprezenta, e espera katak segunda-feira ami sei halo aprezentasaun dala-ida tan, e hafoin ida ne'e ita bele aprezenta iha Konsellu Ministrus”, afirma Odete.

Dadaun ne'e, MS nia ekipa téknika sira halo ona preparasaun ba sosa vasina, inklui mós sosa arkar frigorífiku sira, ka jeleira sira ne'ebé mak atu tau vasina Pfizer.

MS mós tau orsamentu iha fundu Covid-19 nian hodi prepara ba sosa vasina, maibé tanba difat iha ona akordu ida ho UNICEF atu apoiu orsamentu ho montante rihun UA$8,1 hodi sosa vasina AstraZeneca.

“Maibé, hanesan ohin ha'u dehan ne'e katak, ho apoiu ne'ebé mak iha ne'e, AstraZeneca bele ona kobre ba ita-nia ema adultu sira. Entaun, orsamentu ida ne'e ami propoin karik bele mós uza atubele sosa vasina Pfizer ne'ebé mak seidauk bele kobre ho Covax Facility ninian remesa ne'ebé mak mai. Orsamentu ida ne'e la'ós uza ba sosa vasina de'it, maibé sosa mós konsumiveis sira hanesan boxes, seringa”, informa nia.

Tuir dadus, labarik ho idade tinan 12 to'o 17 hamutuk ema na'in-rihun 150 mak sei simu vasina Pfizer ne'ebé governu prepara.

“Entaun, ita simu uluk, husi Covax Facility sei haruka uluk sein mill seis centus e vinte (100.620) mai ita, entaun ita administra uluk ba labarik ho númeru 40 to'o 50 atu nune'e, sira bele fó oportunidade ba doze segundu. Tanba ita seidauk iha serteza ba kompra ba, tanba 100 mill ita kobre de'it metade husi labarik sira ne'ebé mak tuir ita-nia estimasaun. Agora, restante ne'e ita tenke sosa e orsamentu ne'e ha'u hanoin ita sei la foti husi ita-nia orsamentu”, esplika nia. (*)