Udan Oras Rua, Bee Hoban Dili Hamate Ema Ida

Inundasaun iha Dili be'e invade palasiu Prezidente da Republika (13/3) Inundasaun iha Dili be'e invade palasiu Prezidente da Republika (13/3) Foto suplai

Tempotimor (Dili) - Hafoin udan boot durante oras rua nia-laran husi tuku 16:30 to'o tuku 18:15, mosu inundasaun iha kuaze Dili laran tomak. 

Observasaun www.tempotimor.com, bee sae makaas kuaze sentimu 50 iha kapital Dili tan ba bee naresin husi mota sira iha Dili laran. 

Área ne'ebé afetadu makaas ba inudasaun ne'e maka Kaikoli, Bairru dus Grilos, Santa Cruz, Audian, Bekora, Kolmera. Bidau, Hera, Tasitolu, Bairopite, Bidau Lecidere no kuaze fatin hotu-hotu. 

Kareta barak mate iha liuron Dili nian hodi halo engarafamentu nune’e mos Estrada entre Hera ho Dili mosu engarafamentu naruk.

Instituisaun publiku inklui eskola mós barak maka hetan afetasaun makaas husi inundasaun ne'e hanesan Palasiu Prezidensial, Eskola Portugues no eskola públika sira seluk. 

“Hahu husi efisiu SEFOPE, mai quartel PNTL Dili, RTTL, Ministeiru Saude, tun ba Ministeiru Obras Publikas, Pateo, Palasiu Prezidente be’e tama hotu,” dehan Komandante PNTL municipiu Dili, Superintendente Xefe, Armando Monteiro. 

Entretantu, iha Bekora ho Bekuse komunidade sira ne'ebé hela iha mota ibun. Situasaun hanesan mos akontese ba komunidade sira ne'ebé hela iha Bairru dos Grilos. 

“Ita nia komunidade ida mak mate iha parte Bekora nian. Komunidade sira koko salva maibe lori too ba klinika mate ona,” Armando informa. 

Kauza husi inudasaun ne'e hamosu mos inundasaun iha fatin-fatin. 

Karreta no motorizada labele halai tanba bee sae makaas. 

Bee foin tuun no movimentu la'o hikas hafoin iha tuku 20:00 kalan. 

To'o notisia nee públika seidauk iha informasaun formal kona-ba ema sira ne'ebé sai vitima ba akontesimentu ne'e.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.