"Klaru katak atus-lima efetivus PNTL ne'ebé iha ne'e, servisu turnu, para balun bele rezerva, balun bele halo servisu iha terrenu para bele garante di'ak liu tan atividade", Euclides Belo hateten ba jornalísta sira iha nia kna'ar fatin Kaikoli, Kinta (17/12).
Nia dehan, daudaun ne'e mós planeia ona atu kontrola movimentasaun transporte públiku sira neebé tula pasajeiru liu kapasidade, durante natál ho tinan-foun, tanba kareta Bus sira nia kapasidade atu tula de'it ema na'in 24, no labele tula 50 ba leten.
"Ida ne'e proibidu bele hamosu risku, ida ne'e mak ami halo para garante di'ak liu tan. Nune'e mós iha natal dia 24 ho 25 kalan natal nian, ida ne'e mak prioridade ami halo para bele garante buat hotu ho di'ak", Euclides dehan.
Nia hatutan, bainhira mosu aktu kríme, lei hateten tiha ona toleransia laiha, tanba ne'e maka membru PNTL sei servisu maka'as liu tan, no komandante ne’e mós husu apoiu husi komunidade sira inklui membru Konsellu Polisiamentu Komunitáriu (KPK) atu ajuda PNTL garante seguransa.
"Membru KPK suku sira ne'ebé mak ita fó fiar ba sira ona, maski voluntariu, maibé sira voluntáriu atu kontribui", nia dehan.(*)